Worker Funny Idea : గుండు తెచ్చిన తంటా.. జుట్టుతో భలే ఐడియా వేసిన వ్యక్తి..!

Worker Funny Idea : మహబూబాబాద్ జిల్లాలో ఒక వింత, నవ్వులు పూయించే సంఘటన వెలుగుచూసింది. కేంద్ర ప్రభుత్వం ఉపాధి హామీ పథకం (MGNREGS) కూలీల హాజరు కోసం ప్రవేశపెట్టిన ‘ఫేస్ రికగ్నిషన్ యాప్’ (Face Recognition App) టెక్నాలజీ ఒక కూలీని చిత్రమైన కష్టాల్లోకి నెట్టింది. చివరికి అతను చేసిన ఒక క్రేజీ ప్రయోగం ఇప్పుడు సోషల్ మీడియాలో విపరీతంగా వైరల్ అవుతోంది.

మహబూబాబాద్ జిల్లా ఇనుగుర్తి మండలం కొమటిపల్లి గ్రామానికి చెందిన మాల్యాల శ్రీనివాస్ అనే కూలీ ప్రతిరోజూ ఉపాధి హామీ పనులకు వెళ్తుంటాడు. అయితే, ఇటీవల అతను గుండు చేయించుకొని పనికి వెళ్లాడు. అక్కడ కూలీల హాజరు నమోదు చేసే సమయంలో ఫేస్ రికగ్నిషన్ యాప్ శ్రీనివాస్ ముఖాన్ని గుర్తించడానికి నిరాకరించింది. గతంలో జుట్టు ఉన్నప్పటి ముఖచిత్రం రికార్డుల్లో ఉండటంతో.. గుండుతో ఉన్న శ్రీనివాస్ ముఖాన్ని చూసి యాప్ పదే పదే రిజెక్ట్ (Reject) చేసింది.

ఫీల్డ్ అసిస్టెంట్ ఎంత ప్రయత్నించినా హాజరు నమోదు కాకపోవడంతో శ్రీనివాస్‌కు ఒక విచిత్రమైన, తెలివైన ఆలోచన వచ్చింది. పక్కనే ఉన్న ఒక మహిళా కూలీ జుట్టు ను తన తలపై విగ్‌లాగా పెట్టుకుని యాప్ కెమెరా ముందుకు వచ్చాడు. అంతే.. మరుక్షణమే యాప్ ఆ ముఖాన్ని గుర్తించి హాజరును ‘సక్సెస్’ అంటూ నమోదు చేసింది!

సాంకేతికతను సాదాసీదా కూలీ తన గృహోపకరణ ఐడియాతో బురిడీ కొట్టించడంతో అక్కడున్న తోటి కూలీలంతా ఒక్కసారిగా అవాక్కయ్యారు. టెక్నాలజీ తెస్తున్న తిప్పలకు నవ్వుకోవాలో, ఆ కూలీ సమయస్ఫూర్తికి మెచ్చుకోవాలో తెలియక అందరూ నవ్వుకున్నారు. ఈ వింత సంఘటనకు సంబంధించిన వీడియో, ఫోటోలు ప్రస్తుతం సోషల్ మీడియాలో హల్‌చల్ చేస్తున్నాయి. “టెక్నాలజీ కంటే మనోళ్ల మాస్ ఐడియాలే తోపు” అంటూ నెటిజన్లు ఫన్నీ కామెంట్లు పెడుతున్నారు.