CM Revanth Reddy : ఇది కాంగ్రెస్‌ సమస్య కాదు.. దేశ ప్రజల సమస్య

దేశ రాజధాని ఢిల్లీలో విపక్షాల ఆందోళనలతో తీవ్ర ఉద్రిక్త పరిస్థితులు నెలకొన్నాయి. నిరసనల సందర్భంగా అదుపులోకి తీసుకున్న లోక్‌సభ ప్రతిపక్ష నేత రాహుల్ గాంధీని పోలీసులు బారాఖంబ పోలీస్ స్టేషన్‌కు తరలించారు. ఈ విషయం తెలిసిన వెంటనే తెలంగాణ ముఖ్యమంత్రి రేవంత్ రెడ్డి, రాహుల్ గాంధీని కలవడానికి బారాఖంబ పీఎస్‌కు చేరుకున్నారు. అయితే పోలీస్ స్టేషన్ వద్దే ముఖ్యమంత్రి రేవంత్ రెడ్డిని పోలీసులు అడ్డుకోవడంతో తీవ్ర కలకలం రేగింది. మరోవైపు బ్రిటీష్ కౌన్సిల్ సమీపంలో నిరసన తెలుపుతున్న ఎంపీలపై పోలీసులు ప్రయోగించిన లాఠీఛార్జ్‌లో ఖమ్మం ఎంపీ రఘురాంరెడ్డి తీవ్రంగా గాయపడ్డారు. ఆయనకు లాఠీ దెబ్బలు తగలడంతో ఆ ప్రాంతమంతా తీవ్ర ఉద్రిక్త వాతావరణం అలుముకుంది.

‘సైమన్ గో బ్యాక్’ తరహాలోనే ‘ఎస్ఐఆర్ గో బ్యాక్’: రేవంత్ రెడ్డి

ఈ సందర్భంగా సీఎం రేవంత్ రెడ్డి తీవ్రస్థాయిలో కేంద్ర ప్రభుత్వంపై ధ్వజమెత్తారు. “ఓట్ల అక్రమాలు, నమోదు ప్రక్రియలో జరుగుతున్న మోసాలపై రాహుల్ గాంధీ నాయకత్వంలో మా పోరాటం నిరంతరం కొనసాగుతుంది. ప్రధానంగా ఎస్ఐఆర్ (SIR) విధానాన్ని రద్దు చేయడంతో పాటు కేంద్ర చీఫ్ ఎలక్షన్ కమిషనర్ (CEC) జ్ఞానేశ్ కుమార్ వెంటనే తన పదవికి రాజీనామా చేయాలి” అని డిమాండ్ చేశారు. వందేళ్ల క్రితం దేశంలో ‘సైమన్ గో బ్యాక్’ ఉద్యమం ఎలా నడిచిందో, ప్రస్తుతం కేంద్రం తీసుకొచ్చిన విధానాలకు వ్యతిరేకంగా అంతే స్థాయిలో ‘ఎస్ఐఆర్ గో బ్యాక్’ ఉద్యమం సాగుతోందని పేర్కొన్నారు.

ఈడీ, సీబీఐల తరహాలోనే ఈసీ వినియోగం: రాహుల్ అరెస్ట్‌పై మండిపాటు

రాహుల్ గాంధీ అరెస్టుతో ప్రధాని నరేంద్ర మోదీ, కేంద్ర హోంశాఖ మంత్రి అమిత్ షాల తీవ్ర అసహనం స్పష్టంగా బయటపడిందని రేవంత్ రెడ్డి విమర్శించారు. ఇప్పటివరకు ప్రతిపక్షాలను వేధించడానికి ఈడీ, సీబీఐ వ్యవస్థలను వాడుకున్న కేంద్రంలోని బీజేపీ ప్రభుత్వం, ఇప్పుడు స్వతంత్ర వ్యవస్థ అయిన కేంద్ర ఎన్నికల సంఘాన్ని (EC) కూడా రాజకీయ ప్రయోజనాల కోసం దారుణంగా వాడుకుంటోందని ఆరోపించారు. దేశ వ్యాప్తంగా కోట్లాది మంది అర్హులైన ఓటర్ల పేర్లను జాబితా నుంచి తొలగించారని, ప్రజాస్వామ్య రక్షణ కోసం రాహుల్ గాంధీ అడుగుజాడల్లో తాము పోరాటం ఆపేది లేదని రేవంత్ రెడ్డి స్పష్టం చేశారు.