Konda Surekha : కాంగ్రెస్ అధ్యక్షుడితో కొండా సురేఖ భేటీ.. కూతురి వ్యాఖ్యలపై ఖర్గే ఆరా

తెలంగాణ రాష్ట్ర మంత్రి కొండా సురేఖ, కాంగ్రెస్ జాతీయ అధ్యక్షుడు మల్లికార్జున ఖర్గేతో హఠాత్తుగా సమావేశమయ్యారు. బెంగళూరులో జరిగిన ఈ భేటీ సుమారు 15 నిమిషాల పాటు సాగింది. ఇటీవల తన కుమార్తె సుస్మిత చేసిన వ్యాఖ్యలు, ఆ తర్వాత చోటుచేసుకున్న రాజకీయ పరిణామాల నేపథ్యంలో ఈ సమావేశం ప్రాధాన్యత సంతరించుకుంది.

కూతురి వ్యాఖ్యలపై ఖర్గే ఆరా

ఇటీవల కొండా సురేఖ కుమార్తె చేసిన కొన్ని వ్యాఖ్యలు తీవ్ర దుమారం రేపిన సంగతి తెలిసిందే. ఈ అంశంపై మల్లికార్జున ఖర్గే నేరుగా ఆరా తీశారు. పార్టీకి నష్టం కలిగించేలా మాట్లాడటం ఎంతమాత్రం సరికాదని ఖర్గే మంత్రికి స్పష్టం చేసినట్లు తెలుస్తోంది. క్రమశిక్షణ తప్పకుండా చూసుకోవాలని, బాధ్యతాయుతమైన పదవుల్లో ఉన్నవారు మరింత జాగ్రత్తగా వ్యవహరించాలని సూచించారు.

ఘటనపై వివరణ ఇచ్చిన కొండా సురేఖ

ఖర్గే లేవనెత్తిన ప్రశ్నలకు మంత్రి కొండా సురేఖ సుదీర్ఘంగా వివరణ ఇచ్చారు. అసలు ఏం జరిగింది, ఆ వ్యాఖ్యల వెనుక ఉన్న ఉద్దేశం ఏంటి, ఆ తర్వాత చోటుచేసుకున్న వరుస పరిణామాలను ఆయనకు వివరించారు. రాష్ట్రానికి చెందిన కొందరు ముఖ్య నేతల అపాయింట్‌మెంట్ కోరినప్పటికీ వారు సమయం ఇవ్వకపోవడంతోనే, విషయం తీవ్రతను వివరించేందుకు నేరుగా ఏఐసీసీ అధ్యక్షుడిని కలవాల్సి వచ్చిందని సురేఖ తెలిపినట్లు సమాచారం.