హైదరాబాద్‌లోని అత్యంత రద్దీ ప్రాంతమైన కేబీఆర్ పార్క్ పరిసరాల్లో ట్రాఫిక్ చిక్కులను వదిలించేందుకు చేపట్టిన మౌలిక వసతుల ప్రాజెక్టు రీ-అలైన్‌మెంట్‌కు జీహెచ్‌ఎంసీ అధికారులు గ్రీన్ సిగ్నల్ ఇచ్చారు. ఈ రీ-అలైన్‌మెంట్ పనులను జీహెచ్‌ఎంసీ కమిషనర్ ఆర్.వి. కర్ణన్ స్వయంగా క్షేత్రస్థాయిలో పరిశీలించారు. గతంలో ప్రతిపాదించిన సంక్లిష్టమైన 7 ఫ్లైఓవర్లు, 7 అండర్‌పాస్‌ల ప్రణాళికను మార్చి, దానికి బదులుగా ఒకే ఒక భారీ ఎలివేటెడ్ ఫ్లైఓవర్, ఒక అండర్‌పాస్ నిర్మాణంతో నూతన రీ-అలైన్‌మెంట్‌కు శ్రీకారం చుట్టినట్లు ఆయన వెల్లడించారు.
నాగార్జున సర్కిల్ నుంచి జూబ్లీహిల్స్ చెక్‌పోస్ట్ వరకు 6 లైన్ల ఫ్లైఓవర్
నూతన ప్రణాళిక ప్రకారం బంజారాహిల్స్ రోడ్ నెంబర్ 3లోని ముఫ్ఫాకమ్ జా (MJ) ఇంజనీరింగ్ కాలేజీ, నాగార్జున సర్కిల్ పరిసరాల నుంచి జూబ్లీహిల్స్ చెక్‌పోస్ట్ వరకు సుమారు 4.4 కిలోమీటర్ల పొడవునా భారీ ఎలివేటెడ్ ఫ్లైఓవర్‌ను నిర్మించనున్నారు. దీంతో పాటు బంజారాహిల్స్ రోడ్ నెంబర్ 10 నుంచి రోడ్ నెంబర్ 12కు అనుసంధానంగా ఒక అండర్‌పాస్‌ను ఏర్పాటు చేయనున్నారు. రాబోయే రోజుల్లో వాహనాల రద్దీని తట్టుకునేలా ఈ ఫ్లైఓవర్‌ను పూర్తిగా 6 లైన్ల కారిడార్‌గా తీర్చిదిద్దనున్నట్లు కమిషనర్ తెలిపారు.
శాశ్వతంగా వన్-వే విధివిధానాలు.. రూ.400 కోట్ల నిధుల ఆదా
కేబీఆర్ పార్క్ చుట్టూ ప్రస్తుతం అమల్లో ఉన్న వన్-వే ట్రాఫిక్ విధానంపై ప్రజల నుంచి అత్యంత సానుకూల స్పందన వచ్చిందని, అందుకే ఈ వన్-వే రూట్‌ను శాశ్వతంగా కొనసాగించాలని ప్రభుత్వం ఆదేశాలు జారీ చేసిందని జీహెచ్‌ఎంసీ కమిషనర్ స్పష్టం చేశారు. వన్-వే మార్గంలో ఉన్న డివైడర్ల పరిమాణాన్ని తగ్గించి ఆ రహదారిని కూడా పూర్తిగా 6 లైన్ల విస్తీర్ణంలోకి తీసుకురానున్నారు. గతంలో అనుకున్న బహుళ ఫ్లైఓవర్ల స్థానంలో ఈ నూతన రీ-అలైన్‌మెంట్ చేపట్టడం వల్ల ప్రభుత్వానికి సుమారు రూ.400 కోట్ల వరకు నిధుల వ్యయం తగ్గిందని, ప్రాజెక్టు పనులను త్వరితగతిన పూర్తి చేసి నగరవాసులకు అందుబాటులోకి తెస్తామని అధికారులు వివరించారు.