హైదరాబాద్ శివార్లలోని నాదర్‌గుల్‌ ఎంబీఎస్ఆర్ (MVSR) ఇంజనీరింగ్ కళాశాలలో దసరా వేడుకల సందర్భంగా నిర్వహించిన దాండియా కార్యక్రమంలో జరిగిన తీవ్ర విషాదంపై పోలీసులు కఠిన చర్యలు చేపట్టారు. లైటింగ్ పోల్ కూలిపడిన ఘటనలో ఒక విద్యార్థిని మృతి చెందగా, మరో 25 మంది గాయపడిన సంగతి తెలిసిందే. ఈ ప్రమాదానికి కారకులైన ఈవెంట్ మేనేజ్‌మెంట్ కంపెనీకి చెందిన ముగ్గురు వ్యక్తులను ఆదిభట్ల పోలీసులు అరెస్టు చేశారు.
స్టూడెంట్ సోనీ నారాయణ దాస్ మృతి..
ఈ ఘోర ప్రమాదంలో తీవ్రంగా గాయపడిన విద్యార్థిని సోనీ నారాయణ దాస్ చికిత్స పొందుతూ మృతి చెందగా, గాయపడిన మిగతా 25 మందికి వైద్య సేవలు అందిస్తున్నారు. ఈ ఘటనపై కేసు నమోదు చేసిన ఆదిభట్ల పోలీసులు ముమ్మరంగా దర్యాప్తు చేపట్టారు. శంషాబాద్‌లోని డీసీపీ కార్యాలయంలో ఏర్పాటు చేసిన మీడియా సమావేశంలో శంషాబాద్ జోన్ డీసీపీ రాజేష్ ఈ కేసుకు సంబంధించిన పూర్తి వివరాలను వెల్లడించారు.
సురక్షిత ప్రమాణాలు గాలికి..
ఈవెంట్ నిర్వహించిన ‘సాకేత్’ ఈవెంట్ మేనేజ్‌మెంట్ కంపెనీ తీవ్ర అలసత్వాన్ని ప్రదర్శించిందని విచారణలో తేలింది. భారీ లైటింగ్ పోల్‌ను సరైన సపోర్ట్ లేదా గట్టి పునాది లేకుండా నాసిరకంగా ఏర్పాటు చేయడం వల్లే అది అకస్మాత్తుగా కూలిపడి ఈ ప్రమాదం జరిగినట్లు పోలీసులు గుర్తించారు. నిర్లక్ష్యంగా వ్యవహరించిన ఈవెంట్ మేనేజర్ సాకేత్ కంపెనీకి చెందిన ముగ్గురు సభ్యులను పోలీసులు అరెస్టు చేశారు. దీనితో పాటు, క్యాంపస్‌లో విద్యార్థుల భద్రతా ప్రమాణాలను విస్మరించి, సరైన అనుమతులు, పర్యవేక్షణ లేకుండా ఈవెంట్‌కు అనుమతించినందుకు గాను ఎంబీఎస్ఆర్ కళాశాల యాజమాన్యం (Management) పై కూడా పోలీసులు కేసు నమోదు చేశారు. యువత భద్రతతో చెలగాటమాడే ఎలాంటి నిర్లక్ష్యాలను సహించేది లేదని అధికారులు స్పష్టం చేశారు.