రాజధాని నగరంలోని ఐటీ కారిడార్‌లో నిత్యం నరకం చూపిస్తున్న ట్రాఫిక్ సమస్యకు శాశ్వత పరిష్కారం చూపే దిశగా సైబరాబాద్ ట్రాఫిక్ పోలీసులు కీలక నిర్ణయం తీసుకున్నారు. జూబ్లీహిల్స్‌లోని కాసు బ్రహ్మానందరెడ్డి (కేబీఆర్) పార్క్ చుట్టూ అమలవుతూ విజయవంతమైన ‘వన్-వే లూప్’ విధానాన్ని ఇప్పుడు సైబరాబాద్ పరిధిలోనూ అమలు చేసేందుకు రంగం సిద్ధం చేశారు. హైటెక్ సిటీ, బయోడైవర్సిటీ పరిసర ప్రాంతాల్లో గంటల తరబడి వాహనాలు నిలిచిపోయే సమస్యకు చెక్ పెట్టేందుకు ఈ సరికొత్త ప్రణాళికను రూపొందించారు.
పీక్ అవర్స్‌లో తప్పనున్న నరకం ఉదయం, సాయంత్రం వేళల్లో ఆఫీసులకు వెళ్లే, వచ్చే ఉద్యోగులతో బయోడైవర్సిటీ, నాలెడ్జ్ సిటీ పరిసర ప్రాంతాలు కిక్కిరిసిపోతున్నాయి. రోడ్లపై వాహనాలు నెమ్మదిగా కదులుతూ ట్రాఫిక్ స్థంభించిపోతోంది. దీనికి ప్రధాన కారణమైన 4 కీలక బాటిల్‌నెక్ పాయింట్లను శాశ్వతంగా ఎత్తివేయాలని పోలీసులు నిర్ణయించారు. కూడళ్ల వద్ద వాహనాలు ఆగిపోకుండా ఉండేలా నిరంతరాయ ‘సిగ్నల్ ఫ్రీ వన్-వే లూప్’ విధానాన్ని తీసుకురానున్నారు.
ప్రతిపాదిత ‘వన్-వే లూప్’ రూట్ మ్యాప్:
* బయోడైవర్సిటీ జంక్షన్ నుంచి ప్రారంభం
* ఐకియా (IKEA) రోటరీ మీదుగా రహేజా మైండ్‌స్పేస్ (సి-గేట్)
* అక్కడి నుంచి నాలెడ్జ్ సిటీ, డల్లాస్ సెంటర్ మార్గం
* అనంతరం మై హోమ్ భూజా వద్ద కుడి మలుపు (రైట్ టర్న్) తీసుకుని తిరిగి బయోడైవర్సిటీ జంక్షన్‌కు చేరుకునేలా రూట్‌ను రూపొందించారు.
రోడ్ల పూర్తి వినియోగం.. త్వరలోనే ట్రయల్ రన్
ఈ వన్-వే లూప్ అందుబాటులోకి వస్తే రహదారుల పూర్తి వెడల్పు సమర్థవంతంగా వినియోగంలోకి వస్తుంది. సిగ్నళ్ల వద్ద వేచి ఉండే అవసరం లేకుండా వాహనాలు సాఫీగా ముందుకు సాగిపోతాయి. సొసైటీ ఫర్ సైబరాబాద్ సెక్యూరిటీ కౌన్సిల్ (SCSC) భాగస్వామ్యంతో రూపుదిద్దుకున్న ఈ సమగ్ర ట్రాఫిక్ ప్రణాళికను అమలు చేయడానికి ముందు క్షేత్రస్థాయిలో ట్రయల్ రన్ నిర్వహించేందుకు సైబరాబాద్ పోలీసులు సన్నాహాలు చేస్తున్నారు. ఈ ప్రయోగం సత్ఫలితాలనిస్తే ఐటీ కారిడార్ ప్రయాణికులకు ట్రాఫిక్ తిప్పలు తప్పినట్టేనని భావిస్తున్నారు.