Chanchalguda Jail : చంచల్‌గూడ జైలు సూపరింటెండెంట్‌పై ఆరోపణలు.. జైళ్ల శాఖ క్లారిటీ

హైదరాబాద్‌లోని చంచల్‌గూడ కేంద్ర కారాగార సూపరింటెండెంట్‌పై వచ్చిన ఆరోపణలను తెలంగాణ జైళ్ల శాఖ తీవ్రంగా ఖండించింది. ఒక న్యాయవాది హత్య కేసులో ప్రమేయం ఉన్న రౌడీషీటర్‌కు లంచం తీసుకుని జైలు సూపరింటెండెంట్ బెయిల్ ఇప్పించారని, ఆ తర్వాత బయట దాడులకు ప్రణాళికలు రూపొందించడంలో సదరు నిందితుడికి సహకరిస్తున్నారని మీడియాలో వచ్చిన కథనాలు పూర్తిగా నిరాధారమైనవని స్పష్టం చేసింది. హైదరాబాద్ పార్లమెంట్ సభ్యుడు అసదుద్దీన్ ఒవైసీ ప్రస్తావించిన అంశాల నేపథ్యంలో జైళ్ల శాఖ హైదరాబాద్ రేంజ్ ఉపశాఖాధికారి ప్రత్యేక ప్రకటన విడుదల చేశారు. అధికారాన్ని దుర్వినియోగం చేయడం, అవినీతికి పాల్పడటం లేదా ఏ వ్యక్తికైనా అనవసరమైన లబ్ధి చేకూర్చడం వంటి ఆరోపణల్లో ఎలాంటి వాస్తవం లేదని తేల్చిచెప్పారు.

బెయిల్ మంజూరు కోర్టుల పరిధిలోని అంశం

ఏ నిందితుడికైనా బెయిల్ మంజూరు చేయడం అనేది పూర్తిగా గౌరవ న్యాయస్థానం పరిధిలోని అంశమని జైళ్ల శాఖ వివరించింది. ఖైదీలకు బెయిల్ ఇప్పించడంలో జైలు అధికారులకు ఎలాంటి పాత్ర లేదా అధికారం ఉండవని స్పష్టం చేసింది. కోర్టులు జారీ చేసే ఉత్తర్వులను జైలు పరిపాలనా నిబంధనలకు అనుగుణంగా అమలు చేయడం మాత్రమే అధికారుల విధులని పేర్కొంది. ఒకవేళ సూపరింటెండెంట్‌పై వచ్చిన ఆరోపణలకు సంబంధించి ఎవరి వద్దైనా నిర్దిష్టమైన ఆధారాలు ఉంటే, వాటిని సంబంధిత అధికారుల ముందు సమర్పించాలని సూచించింది. అటువంటి సాక్ష్యాలను పరిశీలించిన తర్వాత చట్ట ప్రకారం తగిన చర్యలు తీసుకుంటామని వెల్లడించింది.

చట్టప్రకారమే నిర్వహణ.. అక్రమాలపై కఠిన చర్యలు

తెలంగాణలోని జైళ్ల నిర్వహణ పారదర్శకత, జవాబుదారీతనంతో సాగుతోందని జైళ్ల శాఖ స్పష్టం చేసింది. ఖైదీల ప్రవేశం, భద్రత, స్థానచలనం, విడుదల వంటి ప్రక్రియలన్నీ అమల్లో ఉన్న చట్టాల ప్రకారమే జరుగుతాయని తెలిపింది. జైలు ప్రాంగణంలో ఖైదీలు అనధికారికంగా సమావేశం కావడానికి ఎలాంటి అనుమతీ ఉండదని, భద్రతా వర్గీకరణకు అనుగుణంగా వారిని వేర్వేరుగా ఉంచి పర్యవేక్షిస్తున్నామని పేర్కొంది. జైలు సౌకర్యాలను ఉపయోగించుకుని బయట నేరాలకు లేదా కుట్రలకు పాల్పడే అవకాశం ఏ ఖైదీకీ ఉండదని, ఒకవేళ నిబంధనలు ఉల్లంఘించినట్లు తేలితే ఖైదీలతో పాటు బాధ్యులైన సిబ్బందిపై కూడా తీవ్ర చర్యలు ఉంటాయని హెచ్చరించింది.