Auto Fare Hike: తెలంగాణలో ఆటో ఛార్జీల పెంపు.. ఇక మీటర్ లెక్క ఇదే.!

Auto Fare Hike: రాష్ట్రంలో ఆటోరిక్షా ప్రయాణ ఛార్జీల సవరణకు సంబంధించి నూతన నిబంధనలు, రుసుముల వివరాలను ప్రభుత్వం సవరించింది. ప్రయాణికులపై పడే భారాన్ని, ఆటో డ్రైవర్ల నిర్వహణ వ్యయాన్ని పరిగణనలోకి తీసుకుని కొత్త విధానాన్ని ఖరారు చేశారు. నూతన నిబంధనల ప్రకారం తొలి 1.6 కిలోమీటర్ల ప్రయాణానికి కనీస ఛార్జీగా రూ. 30 నిర్ణయించారు. ఆ తర్వాత ప్రయాణించే ప్రతి అదనపు కిలోమీటరుకు రూ. 14 చొప్పున వసూలు చేయనున్నారు. ఇక ప్రయాణంలో ట్రాఫిక్ లేదా ఇతర కారణాల వల్ల వాహనం నిలిచిపోయినప్పుడు వర్తించే  వెయిటింగ్ ఛార్జీలను నిమిషానికి 75 పైసలుగా నిర్ణయించారు.

రాత్రి వేళల్లో అదనపు ఛార్జీలు.. లగేజీపై స్పష్టత

రాత్రి వేళల్లో ప్రయాణించే ప్రయాణికులకు ప్రత్యేక ఛార్జీల విధానం వర్తించనుంది. రాత్రి 11.00 గంటల నుంచి ఉదయం 5.00 గంటల మధ్య నడిచే ఆటోలకు సాధారణ ఛార్జీ కంటే ఒకటిన్నర రెట్లు (1.5 రెట్లు) అధికంగా చెల్లించాల్సి ఉంటుందని అధికారులు స్పష్టం చేశారు. అలాగే ప్రయాణికులతో పాటు ఉండే సామాను విషయంలోనూ స్పష్టమైన సడలింపులు ఇచ్చారు. చిన్న తరహా బ్రీఫ్ కేస్, హ్యాండ్ బ్యాగ్, 60×40 సెంటీమీటర్ల కంటే తక్కువ కొలతలు కలిగిన అటాచ్డ్ కేసులు లేదా బ్యాగులకు ఎలాంటి అదనపు రుసుము ఉండదు. వీటి కంటే పెద్దగా ఉండే ప్రతి ప్యాకేజీకి రూ. 0.50 పైసల చొప్పున లగేజీ ఛార్జీ చెల్లించాల్సి ఉంటుంది. ఒక ఆటోలో గరిష్టంగా 100 కిలోగ్రాముల వరకు లగేజీని అనుమతిస్తారు.

డిజిటల్ ఆటో మీటర్ల రీసెట్టింగ్ నిబంధనలు

నూతన టారిఫ్‌కు అనుగుణంగా ఆటోల్లో ఉండే డిజిటల్ మీటర్లలో మార్పులు చేయాలని స్పష్టం చేశారు. ప్రయాణం ప్రారంభంలో డిజిటల్ మీటర్‌ను ఆన్ చేసిన వెంటనే కనీస ఛార్జీగా రూ. 30.00 నమోదు కావాలి. ప్రారంభ 1.60 కిలోమీటర్ల ప్రయాణం పూర్తయిన తర్వాత, తదుపరి ప్రయాణంలో ప్రతి 1/10వ కిలోమీటరుకు (ప్రతి 100 మీటర్లకు) రూ. 1.40 పైసల చొప్పున ఛార్జీ పెరుగుతూ ఉండేలా మీటర్ సెట్టింగ్‌లను మార్చాల్సి ఉంటుంది. పారదర్శకమైన సేవల కోసం ఈ నియమాలను ఖచ్చితంగా పాటించాలని రవాణా శాఖ స్పష్టం చేసింది.