అన్నింటికి ఆధార్ తప్పనిసరి అయిపోయింది.. చిన్నా పెద్ద తేడా లేకుండా ఆధార్ కార్డు చూపించడం, అవసరం అయితే జీరాక్స్‌ కాపీ ఇవ్వడం జరుగుతోంది.. ఇక, పుట్టగానే ఆధార్ నంబర్ కేటాయించేందుకు ప్రభుత్వం సిద్ధం అవుతుంది.. ఆస్పత్రిలో పుట్టిన వెంటనే ఆ పసికూనలకు ఆధార్ నంబర్ కేటాయించేలా చర్యలు తీసుకుంటున్నారు. అప్పుడే పుట్టిన శిశువులకు ఆస్పత్రుల్లోనే ఆధార్ నంబర్ కేటాయించేలా చర్యలు తీసుకుంటున్న ప్రభుత్వం.. పైలట్ ప్రాజెక్టు కింద సంగారెడ్డి ఎంసీహెచ్, జహీరాబాద్ ఏరియా ఆస్పత్రిని ఎంపిక చేసింది..
Read Also: Astrology: జూన్ 17 శుక్రవారం దినఫలాలు
అప్పుడే పుట్టిన చిన్నారులకు తల్లి వేలిముద్రను తీసుకుని శిశువు ఫొటోను పోర్టల్లో అప్లోడ్ చేసి.. తాత్కాలిక యూఐడీని కేటాయించనున్నట్టు.. దాని కోసం పైలట్ ప్రాజెక్టు కింద సంగారెడ్డి ఎంసీహెచ్, జహీరాబాద్ ఏరియా ఆస్పత్రిని ఎంపిక చేసినట్టు వైద్యారోగ్య శాఖ అధికారులు వెల్లడించారు. ఇక, ఎన్‌రోల్‌మెంట్‌ ఐడీ ఆధారంగా 45 రోజుల తర్వాత మీసేవ కేంద్రాల్లో శిశువు పేరు నమోదుచేసి ఆధార్ డౌన్‌లోడ్‌ చేసుకునే అవకాశం ఉంటుందని చెబుతున్నారు.
మరోవైపు, ఐదేళ్ల లోపు చిన్నారులకు ఇంటి వద్దే ఆధార్ సేవలు అందించేందుకు కూడా ప్రభుత్వం సిద్ధం అవుతోంది. సమీపంలోని పోస్ట్ ఆఫీసులో సమాచారం ఇవ్వడం లేదంటే పోస్టు‌మెన్‌కు ఫోన్ చేసినా.. వారే ఇంటికి వచ్చి వివరాలు నమోదు చేసుకునే విధంగా చర్యలు తీసుకుంటున్నారు.. ఇందుకోసం పిల్లల బర్త్ సర్టిఫికెట్, తల్లిదండ్రుల బయోమెట్రిక్ వివరాలను పోస్టల్ సిబ్బందికి అందించాల్సి ఉంటుంది. వాటి ఆధారంగా పోస్టల్ సిబ్బంది ఆధార్ కార్డ్ అందించనున్నారు.. పోస్టల్ శాఖ ఈ సేవలను ఉచితంగా అందిస్తోంది.