Robotic Cockroach Spy: ‘స్పై’గా బొద్దింకలు..! రోబోటిక్ కాక్రోచ్ రెడీ.. ఎలా పనిచేస్తుందంటే..?

Robotic Cockroach Spy: బొద్దింకలను స్పైగా ఉపయోగించే అత్యాధునిక టెక్నాలజీని అభివృద్ధి చేశారు.. డ్రోన్ల తర్వాత ఇప్పుడు గూఢచర్యంలో కొత్త టెక్నాలజీగా రోబోటిక్ బొద్దింకలు రంగంలోకి రాబోతున్నాయి. జర్మనీలోని SWARM Biotactics అనే స్టార్టప్ సంస్థ ప్రత్యేకమైన సైబోర్గ్ బొద్దింకలను అభివృద్ధి చేస్తోంది. ఇవి నిఘా, సైనిక కార్యకలాపాలు, అలాగే రక్షణ చర్యల్లో ఉపయోగపడేలా రూపొందిస్తున్నారు. టెక్నాలజీ ప్రపంచంలో తరచూ సైన్స్ ఫిక్షన్ సినిమాల్లో కనిపించే ఆలోచనలు ఇప్పుడు నిజం అవుతున్నాయి. ఈ కొత్త టెక్నాలజీ ద్వారా నిజమైన బొద్దింకలకు చిన్న ఎలక్ట్రానిక్ పరికరాలను అమర్చి వాటిని సైబోర్గ్‌లుగా మార్చుతున్నారు.

ఎలా పనిచేస్తుంది?
ఈ బొద్దింకల వెనుక భాగంలో చిన్న మైక్రో బ్యాక్‌ప్యాక్ అమర్చబడుతుంది. అందులో కెమెరాలు, సెన్సార్లు మరియు కమ్యూనికేషన్ పరికరాలు ఉంటాయి. ఇవి సేకరించిన సమాచారాన్ని రియల్ టైమ్‌లో పంపగలవు. శాస్త్రవేత్తలు చిన్న విద్యుత్ సంకేతాల ద్వారా ఈ బొద్దింకల కదలికలను కూడా నియంత్రించగలరు. దూరం నుంచే వీటి దిశను మార్చి శత్రు ప్రాంతాల్లోకి పంపడం సాధ్యమవుతుంది. ఈ టెక్నాలజీలో బొద్దింకలు ఒక్కొక్కటిగా మాత్రమే కాకుండా సమూహాలుగా కూడా పనిచేయగలవు. దీనిని SWARM టెక్నాలజీగా పిలుస్తారు. ఇలా ఒకేసారి పెద్ద ప్రాంతాలను పర్యవేక్షించడం సులభమవుతుంది.

బొద్దింకలనే ఎందుకు ఎంపిక చేశారు?
శాస్త్రవేత్తల ప్రకారం బొద్దింకలు ప్రకృతిలో అత్యంత దృఢమైన జీవుల్లో ఒకటి. ఇవి ఇరుకైన ప్రదేశాల్లో కూడా సులభంగా చొరబడగలవు. కఠిన పరిస్థితుల్లో కూడా జీవించగల సామర్థ్యం వీటికి ఉంటుంది. అదేవిధంగా వీటి శరీరంపై తేలికపాటి పరికరాలను కూడా మోసుకెళ్లగలవు. ప్రస్తుతం సుమారు 10–15 గ్రాముల బరువున్న మైక్రో బ్యాక్‌ప్యాక్‌ను వీటికి అమర్చవచ్చు.

యుద్ధంలోనే కాదు.. రక్షణ చర్యల్లో కూడా
ఈ టెక్నాలజీని సైనిక నిఘా కోసం మాత్రమే కాకుండా ఇతర ముఖ్యమైన పనుల్లో కూడా ఉపయోగించవచ్చు. ఉదాహరణకు భూకంపం లేదా ఇతర ప్రకృతి విపత్తుల తర్వాత కూలిపోయిన భవనాల్లో చిక్కుకున్న వారిని గుర్తించడానికి ఈ రోబోటిక్ బొద్దింకలు సహాయపడతాయి. ప్రస్తుతం డ్రోన్లు, AI మరియు రోబోలు యుద్ధ వ్యూహాల్లో కీలక పాత్ర పోషిస్తున్నాయి. ఈ నేపథ్యంలో బయో-రోబోటిక్స్ భవిష్యత్తులో మరో కీలక సాంకేతిక విప్లవంగా మారవచ్చని నిపుణులు భావిస్తున్నారు.