ఒప్పో రెనో8 సిరీస్ మేలో చైనాలో లాంచ్ చేసిన అనంతరం జూలై 18న భారతదేశంలో లాంచ్ అవుతుందని పుకారు వచ్చింది. ఆ రూమర్‌ని నిజం చేస్తూ ఒప్పో రెనో 8 సిరీస్ భారతదేశంలో జూలై 18న సాయంత్రం 6 గంటలకు లాంచ్ చేయనున్నట్లు ఒప్పో ప్రకటించింది. అతిపెద్ద స్మార్ట్‌ఫోన్ దిగ్గజం అయిన ఒప్పో.. కొవిడ్ కేసులు పెరుగుతున్నందున లాంచ్ ఈవెంట్‌ను గ్రాండ్‌గా నిర్వహిస్తుందా.. లేక వర్చువల్‌గా వెళ్తుందా అనేది తెలియాల్సి ఉంది. ఈ ఈవెంట్‌ను నిర్వహించాలా వద్దా అనేది ఆలోచిస్తున్నామని ఒప్పో ప్రకటించింది. రెనో 8 సిరీస్‌లో చైనాలో వనిల్లా, ప్రో, ప్రో+ మోడల్‌లు ఉన్నాయి, ఐరోపాలో లైట్ వేరియంట్ ఉంది. అయినప్పటికీ, ఒప్పో తన రెనో 8, రెనో 8 ప్రోలను జూలై 18 వరకు భారత్‌కు తీసుకురాదు. ఈ తరుణంలో ఒప్పో రెనో 8, రెనో 8 ప్రోకు సంబంధించిన వివరాలు బయటికి వచ్చాయి.
ఒప్పో రెనో 8 మొబైల్‌లో మీడియాటెక్ డైమన్సిటీ 1300 ప్రాసెసర్ ఉంటుంది. 6.43 ఇంచుల అమోల్‌డ్ డిస్ప్లేతో వస్తుంది. 90Hz రిఫ్రెష్ రేట్, గొరిల్లా గ్లాస్ 5 ప్రొటెక్షన్ ఉంటుంది. ఈ ఫోన్‌లో 4,500ఎంఏహెచ్ బ్యాటరీ ఉండనుండగా, 80వాట్ల ఫాస్ట్ చార్జింగ్‌కు సపోర్ట్ చేస్తుంది. రెనో 8 వెనుక మూడు కెమెరాల సెటప్ ఉంటుంది. 50 మెగాపిక్సెల్ ప్రైమరీ, 2 మెగాపిక్సెల్ బ్లాక్ అండ్ వైట్, 2 మెగాపిక్సెల్ మాక్రో కెమెరాలు ఉంటాయి. 32 మెగాపిక్సెల్ ఫ్రంట్ కెమెరాతో రెనో 8 రానుంది. షిమ్మర్ బ్లాక్, షిమ్మర్ గోల్డ్ కలర్ ఆప్షన్‌లలో రెనో 8 లభ్యం కావొచ్చు. 8జీబీ ర్యామ్+128జీబీ స్టోరేజీ ఉండే ఒప్పో రెనో 8 ప్రారంభ ధర రూ.30,000 నుంచి రూ.33,000 మధ్య ఉంటుందని సమాచారం.
ఒప్పో రెనో 8 ప్రో మొబైల్‌లో స్నాప్‌డ్రాగన్ 7 జెన్ 1 ప్రాసెసర్ ఉంటుంది. 4,500ఎంఏహెచ్ బ్యాటరీ, 80 వాట్ల ఫాస్ట్ చార్జింగ్ సపోర్ట్‌తో రానుంది. 120Hz రిఫ్రెష్ రేట్, గొరిల్లా గ్లాస్ 5 ప్రొటెక్షన్ ఉండే 6.62 ఇంచుల అమోల్‌డ్ ఈ4 డిస్‌ప్లేను ఈ మొబైల్ కలిగి ఉంటుంది. ప్రో మోడల్ కూడా మూడు వెనుక కెమెరాలతో వస్తుంది. 50 మెగాపిక్సెల్ ప్రధాన, 8 మెగాపిక్సెల్ అల్ట్రా వైట్, 2 మెగాపిక్సెల్ మాక్రో కెమెరాలు ఉంటాయి. సెల్ఫీలు, వీడియో కాల్స్ కోసం ఈ మొబైల్‌కు కూడా 32 మెగాపిక్సెల్ ఫ్రంట్ కెమెరాను ఒప్పో పొందుపరిచింది. గ్లేజ్డ్ బ్లాక్, గ్లేజ్డ్ గ్రీన్ కలర్ ఆప్షన్‌లలో ఈ మొబైల్ లభించే అవకాశం ఉంది. 8జీబీ ర్యామ్ + 128జీబీ స్టోరేజ్ ఉండే ఒప్పో రెనో 8 ప్రో ప్రారంభ ధర ఇండియాలో రూ.45,000 నుంచి రూ.46,000 మధ్య ఉంటుందని సమాచారం.
