Motorola Razr Flex 2027: 12GB RAM, 50MP కెమెరా, 165Hz డిస్‌ప్లే.. Motorola కొత్త ఫోల్డబుల్ ఫోన్ వచ్చేస్తోంది!

Motorola Razr Flex 2027

Motorola Razr Flex 2027

Motorola Razr Flex 2027: ప్రముఖ స్మార్ట్‌ఫోన్ తయారీ సంస్థ Motorola మరో కొత్త ఫోల్డబుల్ స్మార్ట్‌ఫోన్‌ను మార్కెట్లోకి తీసుకొచ్చేందుకు సిద్ధమవుతున్నట్లు తెలుస్తోంది. ఈ ఫోన్‌ను Motorola Razr Flex 2027 పేరుతో విడుదల చేసే అవకాశం ఉందని టెక్ వర్గాల్లో ప్రచారం జరుగుతోంది. తాజాగా లీకైన వివరాల ప్రకారం ఈ ఫోన్‌లో Qualcommకు చెందిన నెక్ట్స్ జెన్ Snapdragon చిప్‌సెట్, అధునాతన OLED డిస్‌ప్లేలు, పవర్ ఫుల్ కెమెరాలు ఉండవచ్చని సమాచారం. అయితే కంపెనీ ఇప్పటివరకు ఈ ఫోన్ గురించి అధికారికంగా ప్రకటించలేదు.

ఒక మీడియా నివేదిక ప్రకారం, Motorolaకు చెందిన Parker అనే కోడ్‌నేమ్‌తో ఉన్న స్మార్ట్‌ఫోన్ సెక్యూరిటీ సర్టిఫికేషన్ డాక్యుమెంట్‌లో కనిపించింది. ఈ డివైజ్ మోడల్ నంబర్ XT2761గా ఉంది. ఇందులో Android 17 ఆధారిత ఆపరేటింగ్ సిస్టమ్ ఉండనున్నట్లు సమాచారం. ఈ స్మార్ట్‌ఫోన్‌లో Qualcomm Snapdragon SM8845 Pro చిప్‌సెట్‌ను ఉపయోగించవచ్చని లీకులు సూచిస్తున్నాయి. ఈ ప్రాసెసర్ ఇంకా అధికారికంగా విడుదల కాలేదు. దీనిని Snapdragon 8 Gen 5 Pro పేరుతో మార్కెట్లోకి తీసుకొచ్చే అవకాశం ఉందని అంచనా. గతంలో ఇదే మోడల్ నంబర్ UAEలో Motorola Razr Flex 2027కు సంబంధించిన రెగ్యులేటరీ ఫైలింగ్‌లో కనిపించినట్లు నివేదికలు పేర్కొంటున్నాయి.

Motorola Razr Flex 2027లో రెండు OLED డిస్‌ప్లేలు ఉండవచ్చని సమాచారం. ఇందులో ప్రధాన ఇన్నర్ డిస్‌ప్లే 6.92 అంగుళాల పరిమాణంతో, 1,728 × 2,364 పిక్సెల్స్ రిజల్యూషన్‌ను కలిగి ఉండవచ్చు. దీనికి 165Hz రిఫ్రెష్ రేట్ సపోర్ట్ ఉండనున్నట్లు లీకులు వెల్లడిస్తున్నాయి. అలాగే బయటి కవర్ స్క్రీన్ 4.97 అంగుళాల OLED డిస్‌ప్లేతో రావచ్చని తెలుస్తోంది. ఇది 1,736 × 1,140 పిక్సెల్స్ రిజల్యూషన్‌ను కలిగి ఉండవచ్చని సమాచారం.

కెమెరా విభాగంలోనూ Motorola ఈ ఫోన్‌కు మంచి ఫీచర్లను అందించనున్నట్లు తెలుస్తోంది. ఇందులో 50 మెగాపిక్సెల్ ప్రైమరీ కెమెరాతో పాటు 50 మెగాపిక్సెల్ అల్ట్రా వైడ్ కెమెరా ఉండవచ్చని లీకులు సూచిస్తున్నాయి. ప్రైమరీ కెమెరాలో 30x డిజిటల్ జూమ్ సపోర్ట్ ఉండే అవకాశం ఉంది. ఫోన్ వెనుక భాగంలో పిల్ ఆకారంలో ఉండే కెమెరా మాడ్యూల్‌ను అందించవచ్చని సమాచారం. ఈ ఫోల్డబుల్ స్మార్ట్‌ఫోన్‌లో 5,000mAh బ్యాటరీని అందించవచ్చని తెలుస్తోంది. దీనికి Qi2 వైర్‌లెస్ ఫాస్ట్ ఛార్జింగ్ సపోర్ట్ కూడా ఉండే అవకాశం ఉంది.

భద్రత కోసం అండర్ డిస్‌ప్లే ఫింగర్‌ప్రింట్ సెన్సార్‌ను అందించనున్నట్లు సర్టిఫికేషన్ వివరాలు సూచిస్తున్నాయి. అలాగే ఈ ఫోన్‌లో 12GB వరకు RAM ఉండవచ్చని సమాచారం. Android 17 ఆధారంగా పనిచేసే కొత్త Hello UI వెర్షన్‌ను ఇందులో అందించవచ్చని అంచనా. డిజైన్ విషయానికి వస్తే Motorola Razr Flex 2027 ఫ్లాట్ రియర్ ప్యానెల్‌తో రావచ్చని తెలుస్తోంది. ఈ ఫోన్‌ను Pantone Dark Botanical Garden, Pantone Coriander అనే రెండు కలర్ ఆప్షన్లలో తీసుకొచ్చే అవకాశం ఉంది. Motorola Razr Flex 2027ను ఎంపిక చేసిన అంతర్జాతీయ మార్కెట్లలో విడుదల చేయవచ్చని సమాచారం. మార్కెట్లోకి వస్తే Samsung Galaxy Z Fold 8, Xiaomi 18 Fold వంటి ఫోల్డబుల్ స్మార్ట్‌ఫోన్లకు పోటీ ఇచ్చే అవకాశం ఉంది. అయితే Motorola Razr Flex 2027 ధర, లాంచ్ తేదీ, భారతదేశంలో అందుబాటులోకి వచ్చే వివరాలపై ఇంకా అధికారిక ప్రకటన వెలువడలేదు.