Huawei Mate XT 2: ఫోల్డబుల్ స్మార్ట్ఫోన్ మార్కెట్లో ప్రత్యేక గుర్తింపు తెచ్చుకున్న Huawei మరో కొత్త Tri-Fold స్మార్ట్ఫోన్ను తీసుకొస్తోంది. కంపెనీ Huawei Mate XT 2 పేరుతో ఈ కొత్త ఫోన్ను సెప్టెంబర్ 7న చైనాలో లాంచ్ చేయనుంది. కంపెనీ వెల్లడించిన సమాచారం ప్రకారం, ఈ ఫోన్ను చైనా కాలమానం ప్రకారం మధ్యాహ్నం 2:30 గంటలకు (CST) ఆవిష్కరించనున్నారు. భారత కాలమానం ప్రకారం ఇది మధ్యాహ్నం 12 గంటలకు జరుగుతుంది. ఇదే ఈవెంట్లో Huawei తన HarmonyOS 7 ఆపరేటింగ్ సిస్టమ్కు సంబంధించిన కన్జ్యూమర్ రోలౌట్ను కూడా ప్రారంభించే అవకాశం ఉంది. కొత్త Mate XT 2లో డిజైన్, డిస్ప్లే, పనితీరు, బ్యాటరీ వంటి అంశాల్లో పలు అప్గ్రేడ్లు ఉండనున్నట్లు రిపోర్టులు చెబుతున్నాయి.
కొత్త Wing Fold డిజైన్
Huawei Mate XT 2లో ప్రధాన మార్పుల్లో ఒకటి దీని ఫోల్డింగ్ మెకానిజం. ఈసారి కంపెనీ కొత్త Wing Fold మెకానిజాన్ని ఉపయోగించనున్నట్లు సమాచారం. ఈ డిజైన్లో డిస్ప్లేకు సంబంధించిన రెండు భాగాలు లోపలి వైపు ఫోల్డ్ అయ్యే అవకాశం ఉంది. దీంతో ఫోన్ను ఫోల్డ్ చేసినప్పుడు ప్రధాన ఇన్నర్ ఫోల్డబుల్ డిస్ప్లే బయటకు కనిపించకుండా మరింత సురక్షితంగా ఉండే అవకాశం ఉంటుంది. ఫోన్ బయటివైపు మరో డిస్ప్లే అందించనున్నట్లు తెలుస్తోంది. దీనిలో 3D Face Recognition సపోర్ట్ ఉండే అవకాశం ఉందని రిపోర్టులు పేర్కొంటున్నాయి.
కేవలం 3.5mm మందం!
Huawei Mate XT 2లో అత్యంత ఆకర్షణీయమైన అంశాల్లో దీని స్లిమ్ డిజైన్ ఒకటి. ఫోన్ అన్ఫోల్డ్ చేసినప్పుడు అత్యంత పలుచని భాగం కేవలం 3.5mm మందంగా ఉండే అవకాశం ఉందని సమాచారం. ఈ కారణంగా మార్కెట్లో అత్యంత సన్నని Tri-Fold స్మార్ట్ఫోన్లలో Huawei Mate XT 2 ఒకటిగా నిలిచే అవకాశం ఉంది.
16GB RAM.. 2TB వరకు స్టోరేజ్
ప్రీ-ఆర్డర్ వివరాల ద్వారా ఫోన్కు సంబంధించిన నాలుగు వేరియంట్లు బయటకు వచ్చినట్లు రిపోర్టులు చెబుతున్నాయి. ఇందులో బేస్ వేరియంట్ 16GB RAM + 512GB స్టోరేజ్ తో ఉండవచ్చని తెలుస్తోంది. టాప్-ఎండ్ మోడల్లో ఏకంగా 16GB RAM + 2TB స్టోరేజ్ అందించే అవకాశం ఉంది. టాప్ వేరియంట్లో ప్రైవసీ డిస్ప్లే, స్టైలస్ సపోర్ట్ వంటి అదనపు ఫీచర్లు కూడా ఉండవచ్చని సమాచారం.
మూడు కలర్ ఆప్షన్లు
Huawei Mate XT 2ను Obsidian Black, White, Purple కలర్ ఆప్షన్లలో తీసుకురావచ్చని రిపోర్టులు పేర్కొంటున్నాయి. అయితే 2TB స్టోరేజ్తో కూడిన టాప్ మోడల్ను Purple కలర్లో మాత్రమే అందించే అవకాశం ఉందని సమాచారం.
6000mAh బ్యాటరీ, Kirin చిప్సెట్
పనితీరు విషయానికి వస్తే Huawei Mate XT 2లో Kirin 9050 Pro చిప్సెట్ను అందించవచ్చని రిపోర్టులు చెబుతున్నాయి. అయితే దీనిపై Huawei నుంచి పూర్తి అధికారిక నిర్ధారణ ఇంకా రావాల్సి ఉంది. అదే విధంగా ఫోన్లో సుమారు 6,000mAh బ్యాటరీ ఉండవచ్చని సమాచారం. Tri-Fold డిజైన్ ఉన్న ఫోన్కు ఇంత పెద్ద బ్యాటరీ ఇవ్వడం వల్ల బ్యాటరీ బ్యాకప్పై వినియోగదారుల్లో ఆసక్తి పెరిగే అవకాశం ఉంది.
మెరుగైన హింజ్ సిస్టమ్
కొత్త ఫోన్లో హింజ్ మెకానిజాన్ని కూడా గత తరం మోడల్తో పోలిస్తే మెరుగుపరిచినట్లు తెలుస్తోంది. Tri-Fold ఫోన్లో హింజ్ కీలకమైన భాగం కావడంతో, దీని డ్యూరబిలిటీ, ఫోల్డింగ్ అనుభవాన్ని మెరుగుపరచడంపై Huawei దృష్టి పెట్టినట్లు సమాచారం.