200MP కెమెరా, 8600mAh బ్యాటరీ, Dimensity 8550 Elite చిప్‌తో HONOR 600 సిరీస్ లాంచ్.!

HONOR 600 Series Launched: HONOR 600 సిరీస్‌ను చైనా మార్కెట్‌లో హానర్ లాంచ్ చేసింది. ఇందులో HONOR 600, HONOR 600 Pro మోడళ్లతో పాటు HONOR 600 విటాలిటీ ఎడిషన్ కూడా ఉన్నాయి. ఇప్పటికే గ్లోబల్ మార్కెట్‌లో పరిచయమైన ఈ ఫోన్లు ఇప్పుడు చైనాలో కొన్ని అప్‌గ్రేడ్ స్పెసిఫికేషన్లతో లాంచ్ అయ్యాయి. హానర్ 600, హానర్ 600 ప్రో ఫోన్లలో డిజైన్ పరంగా స్వల్ప మార్పులు ఉన్నపటికీ.. డిస్‌ప్లే & కెమెరా ఫీచర్లు దాదాపు ఒకేలా ఉన్నాయి.

హానర్ 600లో Qualcomm Snapdragon 7 Gen 4 ప్రాసెసర్ ఉండగా, HONOR 600 Proలో కొత్త మీడియాటెక్ డిమెంసిటీ 8550 ఎలైట్ చిప్‌సెట్‌ను కంపెనీ అందించింది. ఈ స్మార్ట్‌ఫోన్లలో 6.57 అంగుళాల 1.5K OLED డిస్‌ప్లేను కంపెనీ అందించింది. 120Hz రిఫ్రెష్ రేట్, 8000 నిట్స్ పీక్ బ్రైట్‌నెస్, DCI-P3 కలర్ గామట్ వంటి ఫీచర్లు వీటికి ప్రత్యేకతను జోడిస్తున్నాయి.

ఫోటోగ్రఫీ విషయంలో కూడా హానర్ ఈసారి భారీ అప్‌గ్రేడ్ చేసింది. రెండు ఫోన్లలోనూ 200MP ప్రధాన కెమెరా, 12MP అల్ట్రా వైడ్ కెమెరాలను అందించింది. హానర్ 600 ప్రోలో అదనంగా 50MP టెలిఫోటో పోర్ట్రెయిట్ లెన్స్‌ను అందించారు. సెల్ఫీల కోసం 50MP ఫ్రంట్ కెమెరా ఉంది. ముందు, వెనుక కెమెరాలతో 4K వీడియో రికార్డింగ్‌కు సపోర్ట్ లభిస్తుంది. బ్యాటరీ విషయంలో HONOR 600 సిరీస్ నిజంగా సంచలనం సృష్టించింది. HONOR 600లో 8600mAh భారీ బ్యాటరీని కంపెనీ అందించగా, HONOR 600 Proలో 8000mAh బ్యాటరీ ఉంది. ఈ రెండు ఫోన్లూ 80W SuperCharge ఫాస్ట్ చార్జింగ్‌ను సపోర్ట్ చేస్తాయి. ప్రో మోడల్‌లో 50W వైర్‌లెస్ చార్జింగ్ సౌకర్యం కూడా ఉంది.

ఇవి IP68, IP69, IP69K వాటర్ అండ్ డస్ట్ రెసిస్టెన్స్‌తో వస్తున్నాయి. స్టీరియో స్పీకర్లు, ఇన్‌డిస్‌ప్లే ఫింగర్‌ప్రింట్ సెన్సర్, NFC, Wi-Fi 6, 5G వంటి ప్రీమియం ఫీచర్లు కూడా అందుబాటులో ఉన్నాయి. ధరల విషయానికి వస్తే HONOR 600 ప్రారంభ ధర 3299 యువాన్ కాగా, HONOR 600 Pro ప్రారంభ ధర 3899 యువాన్‌గా నిర్ణయించారు. HONOR 600 విటాలిటీ ఎడిషన్ ధర 2699 యువాన్ నుంచి ప్రారంభమవుతుంది. ఈ ఫోన్లు ప్రస్తుతం చైనాలో ప్రీ-ఆర్డర్‌కు అందుబాటులో ఉండగా.. HONOR 600, 600 Pro మే 29 నుంచి.. విటాలిటీ ఎడిషన్ జూన్ 3 నుంచి అమ్మకాలు ప్రారంభం కానున్నాయి.