Sound Glow ఫీచర్‌తో Apple HomePod Mini 2 లాంచ్.. ఫీచర్లు మాత్రం మైండ్ బ్లోయింగ్ అంతే.!

Apple HomePod Mini 2: ఆపిల్‌ (Apple) కొత్త HomePod Mini 2 స్మార్ట్‌ స్పీకర్‌ను అధికారికంగా పరిచయం చేసింది. ఒరిజినల్‌ HomePod Miniలోని గోళాకార (Spherical) డిజైన్‌ను కొనసాగిస్తూనే.. ఇందులో ఇంటర్నల్‌ హార్డ్‌వేర్‌ను అప్‌గ్రేడ్‌ చేసింది. అలాగే టాప్‌ ప్యానెల్‌లో కొత్త లైటింగ్‌ ఎఫెక్ట్‌, భవిష్యత్తులో అందుబాటులోకి రానున్న Siri AI ఫీచర్లను జోడించింది. దీని ధర 149 డాలర్లుగా నిర్ణయించింది. అంటే గత మోడల్‌తో పోలిస్తే 50 డాలర్లు ఎక్కువ.

ఈ HomePod Mini 2లో అప్‌గ్రేడ్‌ చేసిన Siri AI సపోర్ట్‌ ఉంటుంది. అయితే లాంచ్‌ సమయంలో ఈ ఫీచర్‌ అందుబాటులో ఉండదు. భవిష్యత్తులో సాఫ్ట్‌వేర్‌ అప్‌డేట్‌ ద్వారా అందించనున్నట్లు ఆపిల్‌ తెలిపింది. ఈ అప్‌డేట్‌ వచ్చిన తర్వాత Siriతో మరింత సహజంగా సంభాషించడంతో పాటు క్లిష్టమైన ప్రశ్నలు, అభ్యర్థనలకు కూడా సమాధానాలు పొందవచ్చు. Apple Intelligenceకు సపోర్ట్‌ చేసే ఐఫోన్‌, ఐప్యాడ్‌లతో HomePod Mini 2ను కనెక్ట్‌ చేస్తే వ్యక్తిగత సమాచారాన్ని కూడా Siri ఉపయోగించుకోగలదు. ఉదాహరణకు ఈమెయిల్‌లో ఎవరైనా పంపిన రెసిపీని వెతకమని లేదా మెసేజ్‌లో వచ్చిన పాటను ప్లే చేయమని Siriని అడగవచ్చు.

వినియోగదారుల వ్యక్తిగత డేటాను రక్షించేందుకు ఆన్‌-డివైజ్‌ ప్రాసెసింగ్‌ లేదా Apple Private Cloud Compute వ్యవస్థను ఉపయోగిస్తామని కంపెనీ తెలిపింది. Apple Intelligenceకు అనుకూలమైన ఐఫోన్‌, ఐప్యాడ్‌ లేని వారికి కూడా మెరుగైన సంభాషణ సామర్థ్యాలు అందుతాయి. అయితే వ్యక్తిగత సందర్భానికి సంబంధించిన ఫీచర్లు మాత్రం అందుబాటులో ఉండవు. ఇక ఇందులో S10 చిప్‌సెట్‌ను ఉపయోగించారు. వాల్యూమ్‌, డైనమిక్‌ రేంజ్‌ వంటి ఆడియో అంశాలను రియల్‌ టైమ్‌లో సర్దుబాటు చేయడంలో ఈ చిప్‌ కీలకంగా పనిచేస్తుందని ఆపిల్‌ చెబుతోంది. సింగిల్‌ స్పీకర్‌గా లేదా స్టీరియో పెయిర్‌గా ఉపయోగించుకునే సదుపాయం కొనసాగుతుంది.

అయితే ఇప్పుడు కొత్త హోమ్‌ థియేటర్‌ సెటప్‌ కూడా అందుబాటులోకి వచ్చింది. కొత్త 4వ తరం Apple TV 4K ఉన్నవారు నాలుగు HomePod స్పీకర్లను ఒకేసారి కనెక్ట్‌ చేసుకోవచ్చు. గదిలో స్పీకర్లు ఎక్కడ అమర్చారో గుర్తించి సిస్టమ్‌ ఆటోమేటిక్‌గా ఆడియోను క్యాలిబ్రేట్‌ చేస్తుంది. అలాగే HomePod Mini 2ను Macకు డిఫాల్ట్‌ ఆడియో అవుట్‌పుట్‌గా కూడా సెట్‌ చేసుకోవచ్చు. ఇక దీని పైభాగంలోని టచ్‌ ప్యానెల్‌ను కూడా రీడిజైన్‌ చేశారు. Sound Glow అనే కొత్త ఫీచర్‌ ఇందులో ఉంది. సాధారణ Siri యానిమేషన్‌కు బదులుగా.. మీరు ప్లే చేస్తున్న పాట ఆల్బమ్‌ ఆర్ట్‌కు అనుగుణంగా టాప్‌ ప్యానెల్‌ రంగు మారుతుంది. అంతేకాకుండా మ్యూజిక్‌కు అనుగుణంగా లైట్‌ పల్స్‌ అవుతుంది.

HomePod Mini 2ను స్మార్ట్‌ హోమ్‌ హబ్‌గా కూడా ఉపయోగించుకోవచ్చు. ఇందులోని సౌండ్‌ రికగ్నిషన్‌ ఫీచర్‌ పొగ లేదా కార్బన్‌ మోనాక్సైడ్‌ అలారాలను గుర్తించి మీ ఫోన్‌కు అలర్ట్‌ పంపగలదు. అలాగే ఆపిల్‌ కొత్తగా ప్రకటించిన Home Collection వీడియో డోర్‌బెల్స్‌తో ఫేస్‌ రికగ్నిషన్‌ ఫీచర్‌ పనిచేస్తుంది. ఇది పింక్‌, గ్రీన్‌, బ్లూ, వైట్‌, మిడ్‌నైట్‌ కలర్‌ ఆప్షన్లలో తీసుకొచ్చింది. ప్రస్తుతం ప్రీ-ఆర్డర్లు ప్రారంభమయ్యాయి. అక్టోబర్‌ 30 నుంచి స్టోర్లలో విక్రయాలు ప్రారంభం కానున్నాయి. దీని ధర 149 డాలర్స్ గా ఉంది.