Virat Kohli Diet : భారత క్రికెట్లో ఫిట్నెస్కు కొత్త నిర్వచనం చెప్పిన ఆటగాడు ఎవరంటే చాలా మంది వెంటనే విరాట్ కోహ్లీ పేరే చెబుతారు. ఒకప్పుడు చోలే భటూరే, రాజ్మా చావల్ వంటి రుచికరమైన వంటకాలను ఇష్టపడే ఫుడ్ లవర్గా ఉన్న విరాట్.. ఇప్పుడు అత్యంత క్రమశిక్షణతో కూడిన ఆహార నియమాలను పాటిస్తూ ప్రపంచవ్యాప్తంగా ఫిట్నెస్ ఐకాన్గా నిలిచాడు. అతని శరీరాకృతి, ఎనర్జీ లెవెల్స్, మైదానంలో చూపించే చురుకుదనం వెనుక ఉన్న అసలు రహస్యం ఏమిటి? ఈ మార్పు ఒక్కసారిగా జరిగిందా? లేక మరేదైనా ఉందా ? అనే ప్రశ్నలు అభిమానుల్లో ఎప్పుడూ ఆసక్తిని రేకెత్తిస్తూనే ఉంటాయి. మరి అసలు విషయం ఏంటో ఇప్పుడు తెలుసుకుందాం.
రీసెంట్ గా సెలబ్రిటీ చెఫ్ అరుణ్ చౌహాన్ వెల్లడించిన వివరాలు ప్రకారం, కెరీర్ ప్రారంభ దశలో విరాట్ పూర్తిస్థాయి తిండిపోతు. చోలే భటూరే, రాజ్మా చావల్ వంటి ఉత్తర భారత వంటకాలంటే అతనికి ప్రత్యేకమైన ఇష్టం. అంతేకాదు, అప్పట్లో మాంసాహారం కూడా తరచూ తీసుకునేవాడు. అయితే కాలక్రమేణా తన జీవనశైలిని పూర్తిగా మార్చుకుని కఠినమైన శాకాహార విధానాన్ని ఎంచుకున్నాడు. ఈ మార్పు వెనుక అనుష్క శర్మ ప్రభావం కూడా ఉందని చెఫ్ వెల్లడించారు. విరాట్ లో ఆలోచనా విధానం, జీవనశైలి, ఆహారపు అలవాట్లలో వచ్చిన మార్పుకు అనుష్క ప్రేరణగా నిలిచిందని చెప్పాడు. ఒకప్పుడు శరీరంలో కండరాలు పెంచుకోవాలనే ఉద్దేశంతో ట్రైనర్ సూచన మేరకు రెడ్ మీట్ ఎక్కువగా తీసుకునేవాడినని, మధ్యాహ్న భోజనంలో గ్రిల్డ్ చికెన్, మాష్డ్ పొటాటోస్, పాలకూర, కూరగాయలు, రాత్రి భోజనంలో సీఫుడ్ తరచుగా ఉండేదని విరాట్ పాత ఇంటర్వ్యూలలో చెప్పడం కూడా జరిగింది.
ప్రస్తుతం మాత్రం అతని ఆహారపు అలవాట్లు పూర్తిగా మారిపోయాయి. పనీర్కు బదులుగా టోఫూను ప్రాధాన్యంగా తీసుకుంటూ, సలాడ్లు, మొలకలు, పప్పులు, తాజా కూరగాయలను రోజువారీ ఆహారంలో భాగం చేసుకుని పూర్తి శాకాహారిగా మారిపోయాడు విరాట్. అయితే ఇన్ని మార్పులు వచ్చినా తన చిన్ననాటి ఇష్టమైన చోలే భటూరేపై ప్రేమ మాత్రం తగ్గలేదట. అవకాశం దొరికితే దానిని ‘చీట్ మీల్’గా ఇప్పటికీ ఆస్వాదించాలని అనుకుంటాడని చెఫ్ తెలిపారు. క్రికెట్లో రికార్డులతో పాటు ఫిట్నెస్లోనూ ఆదర్శంగా నిలిచిన విరాట్ కోహ్లీ ప్రయాణం ఎంతో మందికి స్ఫూర్తిగా మారింది. ఆహారపు అలవాట్లు మార్చుకుంటే శరీరంలోనే కాదు, ఆలోచనల్లో కూడా ఎంత పెద్ద మార్పు వస్తుందో అతని జీవితం మరోసారి నిరూపిస్తోంది. ఇక మైదానంలో అదే ఫిట్నెస్తో ఇంకా ఎన్నో రికార్డులు సృష్టించాలని అభిమానులు కూడా ఆసక్తిగా ఎదురుచూస్తున్నారు.