Jofra Archer May Have Spotted Vaibhav Sooryavanshi Weakness: ఇంగ్లండ్, భారత్ జట్ల మధ్య ఈరోజు నుంచి ఐదు మ్యాచ్ల టీ20 సిరీస్ ప్రారంభం కానుంది. నేడు చెస్టర్ లీ స్ట్రీట్లో రాత్రి 10 గంటలకు తొలి టీ20 ఆరంభం కానుంది. భారత్తో జరగనున్న టీ20 సిరీస్కు ముందు భారత యువ సంచలనం వైభవ్ సూర్యవంశీపై ఇంగ్లండ్ మాజీ స్పిన్నర్ గ్రేమ్ స్వాన్ ఆసక్తికర వ్యాఖ్యలు చేశాడు. వైభవ్ ప్రస్తుతం ఇంగ్లండ్ బౌలర్లకు అత్యంత కఠినమైన సవాల్గా మారాడని పేర్కొన్నాడు. ఇప్పటివరకు అతడిని ఎదుర్కొన్న బౌలర్లలో ఎవరూ సక్సెస్ కాలేదని, ప్రతి ఒక్కరు పరుగులు సమర్పించుకున్నారు అని చెప్పాడు. ప్రతి బౌలర్ సవాల్కు వైభవ్ సమాధానం చెబుతున్నాడని కొనియాడాడు. అయితే ఇంగ్లండ్ స్టార్ పేసర్ జోఫ్రా ఆర్చర్కు మాత్రం అతడిపై కాస్త ఆధిక్యం ఉండొచ్చని స్వాన్ అభిప్రాయపడ్డాడు.
వ్యూహాలు సిద్ధం చేయడం కష్టం:
వైభవ్ సూర్యవంశీ ఇంకా అంతర్జాతీయ క్రికెట్లో కొత్త ఆటగాడే అయినప్పటికీ.. ఇప్పటికే రెండు ఐపీఎల్ సీజన్లు ఆడాడని గ్రేమ్ స్వాన్ గుర్తు చేశాడు. అతని బ్యాటింగ్కు సంబంధించిన వీడియోలు అందుబాటులో ఉన్నాయని, ఇంగ్లండ్ బౌలర్లలో కొందరు ఐపీఎల్లో అతడికి బౌలింగ్ కూడా చేశారని చెప్పాడు. ‘వైభవ్ లాంటి ఆటగాడికి వ్యూహాలు సిద్ధం చేయడం చాలా కష్టం. అతడు అంతర్జాతీయ క్రికెట్లో కొత్తవాడే అయినా.. ఐపీఎల్లో ఇప్పటికే తన సామర్థ్యాన్ని నిరూపించాడు. అతడి వీడియోల ద్వారా కొంత సమాచారం మా బౌలర్లకు అందుబాటులో ఉంది’ అని స్వాన్ వివరించాడు.
ఇప్పటివరకు ఆపిన బౌలర్ లేడు:
వీడియోలు, విశ్లేషణలు ఉన్నప్పటికీ వైభవ్ సూర్యవంశీని ఔట్ చేయడానికి స్పష్టమైన ప్రణాళిక మాత్రం ఎవరి వద్ద లేదని స్వాన్ పేర్కొన్నాడు. ‘నిజం చెప్పాలంటే ఇప్పటివరకు సూర్యవంశీపై ఏ బౌలర్ ఆధిపత్యం చెలాయించలేదు. అతడు దాదాపుగా అడ్డుకోలేని బ్యాటర్లా కనిపిస్తున్నాడు. టాప్ బౌలర్ ఎలాంటి బంతులు వేసినా సమాధానం చెప్పాడు’ అని ప్రశంసించాడు. ‘ఇంగ్లండ్ పేస్ దళంలో ఆర్చర్ మాత్రమే వైభవ్ను పరీక్షించే సామర్థ్యం ఉన్న బౌలర్. ఐపీఎల్ సమయంలో వైభవ్ను అతడు దగ్గరగా గమనించాడు. నెట్స్లో అతడికి బౌలింగ్ కూడా చేశాడు. అందుకే ఆర్చర్కు మాత్రమే కొంత ప్రయోజనం ఉండొచ్చు. మిగతా బౌలర్ల కంటే అతడికి వైభవ్ ఆట గురించి ఎక్కువ అవగాహన ఉండొచ్చు’ అని స్వాన్ చెప్పాడు.
బలహీనత కనిపెట్టాడేమో:
వైభవ్ బ్యాటింగ్లో ఏదైనా బలహీనతను ఆర్చర్ గుర్తించి ఉండొచ్చని, దాన్ని ఉపయోగించేందుకు ప్రత్యేక ప్రణాళిక సిద్ధం చేసి ఉండవచ్చని స్వాన్ అన్నాడు. ఆర్చర్ వేగం కూడా అతడికి అదనపు బలం అవుతుందని తెలిపాడు. ‘వైభవ్లో ఏదైనా బలహీనతను ఆర్చర్ గుర్తించి ఉండొచ్చు. అతడి వద్ద ప్రత్యేక ప్రణాళిక ఉండవచ్చు. ఆ ప్రణాళికను అమలు చేసేంత వేగం కూడా అతడికి ఉంది. అయితే ఇప్పటివరకు ప్రపంచ స్థాయి బౌలర్లు ఎవరైనా వైభవ్ను పరీక్షించినా.. అతడు ప్రతిసారి సరైన సమాధానం చెప్పాడు. అందుకే ఇంగ్లండ్కు కూడా అతడు పెను సవాల్ విసురుతాడు’ అని గ్రేమ్ స్వాన్ అభిప్రాయపడ్డాడు.