Asian Para Games 2026 : భారత్ కు మరో స్వర్ణం.. స్ప్రింటర్‌ సిమ్రాన్‌కు స్వర్ణం..

జపాన్ వేదికగా జరుగుతున్న ఏషియన్ పారా గేమ్స్ 2026లో భారత క్రీడాకారులు అద్భుత ప్రదర్శనతో సత్తా చాటుతున్నారు. పారా అథ్లెటిక్స్‌లో భారత్ మరోసారి జాతీయ జెండాను సగర్వంగా ఎగరవేసింది. మహిళల 100 మీటర్ల టీ12 (T12) ఫైనల్ రేసులో భారత స్టార్ అథ్లెట్ సిమ్రాన్ అంచనాలను తలకిందులు చేస్తూ అద్భుతమైన విజయం సాధించింది. ఈ ఈవెంట్‌లో బంగారు పతకాన్ని కైవసం చేసుకుని దేశం గర్వపడేలా చేసింది.

రికార్డు టైమింగ్‌తో గోల్డ్ మెడల్ సాధించిన సిమ్రాన్

మహిళల 100 మీటర్ల టీ12 ఫైనల్స్ లో పోటీపడిన సిమ్రాన్ కేవలం 24.80 సెకన్లలోనే గమ్యస్థానాన్ని చేరుకుని సరికొత్త గేమ్స్ రికార్డును (Games Record) సృష్టించింది. ఆమె వేగం, పట్టుదల ఈ ఈవెంట్‌లో ప్రత్యేక ఆకర్షణగా నిలిచాయి. ఇదే పోటీలో ఇరాన్ అథ్లెట్ హజార్ సఫర్జాదే 25.02 సెకన్లలో లక్ష్యాన్ని చేరుకుని రజత (Silver) పతకాన్ని దక్కించుకోగా.. భారత్‌కే చెందిన మరో క్రీడాకారిణి తేజిబెన్ దామోర్ అద్భుతమైన ప్రతిభ కనబరిచింది. ఆమె 25.23 సెకన్ల వ్యక్తిగత ఉత్తమ సమయంతో (Personal-best) కాంస్య (Bronze) పతారాన్ని ముద్దాడింది.

ఒకే ఈవెంట్‌లో భారత్‌కు రెండు పతకాలు

ఒకే ఈవెంట్‌లో దేశానికి రెండు పతకాలు (స్వర్ణం, కాంస్యం) దక్కడంతో క్రీడా వర్గాల్లో, అభిమానుల్లో హర్షాతిరేకాలు వ్యక్తమవుతున్నాయి. పట్టుదల ఉంటే వైకల్యాన్ని సైతం జయించి విజయాల శిఖరాలను అధిరోహించవచ్చని సిమ్రాన్, తేజిబెన్ దామోర్‌లు మరోసారి నిరూపించారు. పారా గేమ్స్‌లో పతకాల పట్టికలో భారత్ తన స్థానాన్ని మరింత మెరుగుపరుచుకుంటూ ముందుకు సాగుతుండగా, విజేతలకు దేశవ్యాప్తంగా అభినందనలు వెల్లువెత్తుతున్నాయి.