ఐపీఎల్ 2027 సీజన్కు ముందు ఆటగాళ్ల ట్రేడింగ్ వ్యవహారం ఆసక్తికరంగా మారుతోంది. కోల్కతా నైట్రైడర్స్ (కేకేఆర్) స్టార్ ఆల్రౌండర్ సునీల్ నరైన్ను తమ జట్టులోకి తీసుకోవాలని రాజస్థాన్ రాయల్స్ (ఆర్ఆర్) ప్రయత్నించినట్లు సమాచారం. నరైన్ కోసం యువ ఓపెనర్ యశస్వి జైస్వాల్తో పాటు మరో ఆటగాడిని బదులుగా ఇచ్చేందుకు రాజస్థాన్ ప్రతిపాదించినట్లు స్పోర్ట్స్ టాక్ కథనం వెల్లడించింది. అయితే ఈ ట్రేడ్ ఆఫర్ను కేకేఆర్ సున్నితంగా తిరస్కరించినట్లు తెలుస్తోంది.
సునీల్ నరైన్ను జట్టులోకి తీసుకురావాలని తొలుత రాజస్థాన్ రాయల్స్ భావించిందని సదరు నివేదిక పేర్కొంది. అయితే తమ జట్టులో కీలక ఆటగాడిగా ఉన్న నరైన్ను వదులుకోవడానికి కేకేఆర్ ఆసక్తి చూపలేదట. నరైన్కు బదులుగా ఆస్ట్రేలియా ఆల్రౌండర్ కామెరూన్ గ్రీన్ను తీసుకోవాలని కేకేఆర్ సూచించినట్లు సమాచారం. కానీ గ్రీన్ ఫిట్నెస్, అందుబాటుపై ఉన్న సందేహాల కారణంగా రాజస్థాన్ ఈ ప్రతిపాదనకు అంగీకరించలేదని తెలుస్తోంది. 2027లో ఆస్ట్రేలియా బిజీ అంతర్జాతీయ షెడ్యూల్ కూడా దీనికి ఓ కారణంగా నివేదిక పేర్కొంది. ఆ తర్వాత మరో ప్రతిపాదనతో రాజస్థాన్ ముందుకొచ్చినట్లు సమాచారం. జైస్వాల్కు బదులుగా యువ బ్యాటర్ అంక్రిష్ రఘువంశీని తీసుకునే అవకాశం గురించి చర్చించినట్లు తెలుస్తోంది. అయితే ఈ ప్రతిపాదనను కూడా కేకేఆర్ తిరస్కరించిందని నివేదిక పేర్కొంది. ఐపీఎల్ 2026లో నిరాశాజనక ప్రదర్శన చేసినప్పటికీ, జట్టుకు సానుకూలాంశంగా నిలిచిన కొద్దిమంది ఆటగాళ్లలో రఘువంశీ ఒకడిగా ఉన్నాడు.
యశస్వి జైస్వాల్తో ఏడేళ్ల అనుబంధానికి ముగింపు పలకడానికి రాజస్థాన్ సిద్ధంగా ఉందనే చర్చ కూడా ఈ ట్రేడ్ వార్తతో మొదలైంది. ఇప్పటివరకు రాజస్థాన్ తరఫున 2,500కు పైగా పరుగులు చేసిన జైస్వాల్.. ఐపీఎల్లో అత్యంత ప్రతిభావంతమైన యువ బ్యాటర్లలో ఒకడిగా గుర్తింపు పొందాడు. అతడిని వదులుకోవడం రాజస్థాన్కు పెద్ద నిర్ణయమే అవుతుంది. మరోవైపు కేకేఆర్కు జైస్వాల్ వస్తే ఫిన్ అలెన్తో కలిసి ఓపెనింగ్ చేసే అవకాశం ఉంటుంది. అంతేకాకుండా రహానే రిటైర్మెంట్ తర్వాత జట్టుకు నాయకత్వం వహించగల భారత ఆటగాడిగా కూడా జైస్వాల్ను పరిగణించే అవకాశం ఉందని నివేదిక పేర్కొంది. ఇక నరైన్ కేకేఆర్కు ఎంతో కీలకమైన ఆటగాడు. 2012 నుంచి ఆ జట్టుకు ప్రాతినిధ్యం వహిస్తున్న అతడు.. కేకేఆర్ మూడు ఐపీఎల్ టైటిళ్లు సాధించడంలో కీలక పాత్ర పోషించాడు. అందుకే అతడిని వదులుకోవడం కంటే కెరీర్ ముగిసిన తర్వాత కూడా కేకేఆర్తోనే కొనసాగిస్తూ కోచింగ్ బాధ్యతలు అప్పగించాలనే ఆలోచన ఫ్రాంచైజీకి ఉండవచ్చనే అభిప్రాయాలు వ్యక్తమవుతున్నాయి. చూడాలి మరి ఏం జరుగుతుందో.

