Vaibhav Sooryavanshi: విరాట్ కోహ్లీ రికార్డు బద్దలు కొట్టిన వైభవ్ సూర్యవంశీ.. విధ్వంసం స్పష్టిస్తున్న బుడ్డోడు..

టాటా ఐపీఎల్ (TATA IPL) చరిత్రలో సరికొత్త అధ్యాయం లిఖించబడింది. ఒకే ఒక ఐపీఎల్ సీజన్‌లో కేవలం బౌండరీల (ఫోర్లు, సిక్సర్లు) ద్వారానే అత్యధిక పరుగులు సాధించిన బ్యాటర్ల జాబితాలో యువ సంచలనం వైభవ్ సూర్యవంశీ అగ్రస్థానానికి చేరుకుని సంచలనం సృష్టించాడు. ఇప్పటివరకు ప్రపంచ క్రికెట్ దిగ్గజాల పేరిట ఉన్న రికార్డులను బద్దలు కొడుతూ, ఈ యువ ఆటగాడు సరికొత్త మైలురాయిని అందుకోవడం విశేషం. మైదానంలో ఫోర్లు, సిక్సర్లతో విరుచుకుపడుతూ అత్యంత వేగంగా పరుగుల వరద పారించడం ద్వారా అతను ఈ అరుదైన ఘనతను తన సొంతం చేసుకున్నాడు.

తాజా గణాంకాల ప్రకారం.. వైభవ్ సూర్యవంశీ 2026 ఐపీఎల్ సీజన్‌లో కేవలం 14 ఇన్నింగ్స్‌ల్లోనే బౌండరీల ద్వారా మాత్రమే 632 పరుగులు రాబట్టాడు. అతని సుడిగాలి ఇన్నింగ్స్‌లలో మొత్తం 59 ఫోర్లు, ఏకంగా 66 సిక్సర్లు ఉన్నాయి. అంటే అతను సాధించిన పరుగులలో అత్యధిక భాగం కేవలం బౌండరీల రూపంలోనే రావడం అతని హిట్టింగ్ సామర్థ్యానికి నిదర్శనం. ఈ అసాధారణ ప్రదర్శనతో వైభవ్ సూర్యవంశీ.. జోస్ బట్లర్, విరాట్ కోహ్లీ వంటి మేటి అంతర్జాతీయ ఆటగాళ్లను సైతం వెనక్కి నెట్టేశాడు.

ఇంతకుముందు ఈ రికార్డు రాజస్థాన్ రాయల్స్ స్టార్ బ్యాటర్ జోస్ బట్లర్ పేరిట ఉండేది. బట్లర్ 2022 ఐపీఎల్ సీజన్లో 15 ఇన్నింగ్స్‌లలో 83 ఫోర్లు, 45 సిక్సర్ల సాయంతో బౌండరీల ద్వారా 606 పరుగులు సాధించి అప్పట్లో సరికొత్త రికార్డు సృష్టించాడు. తర్వాత రాయల్ ఛాలెంజర్స్ బెంగళూరు రన్ మెషిన్ విరాట్ కోహ్లీ సైతం ఈ జాబితాలో టాప్‌లో ఉన్నాడు. కోహ్లీ తన అద్భుతమైన ఫామ్‌లో ఉన్న 2016 సీజన్లో 15 ఇన్నింగ్స్‌లలో 83 ఫోర్లు, 38 సిక్సర్ల ద్వారా కేవలం బౌండరీల నుంచే 564 పరుగులు రాబట్టాడు.

అయితే ఇప్పుడు వైభవ్ సూర్యవంశీ వీరిద్దరికంటే తక్కువ ఇన్నింగ్స్‌ల్లోనే (14 ఇన్నింగ్స్) అత్యధిక సిక్సర్ల (66 సిక్సర్లు) సాయంతో 632 పరుగులు చేసి అగ్రపీఠాన్ని కైవసం చేసుకున్నాడు. ఎంతో అనుభవం ఉన్న అంతర్జాతీయ స్టార్ క్రికెటర్లకు సైతం సాధ్యం కాని రికార్డును, ఈ యువ ఆటగాడు ఇంత చిన్న వయసులోనే బద్దలు కొట్టడం క్రికెట్ ప్రపంచాన్ని ఆశ్చర్యపరిచింది. అతని పరుగుల వేగం, సిక్సర్లు బాదే శైలిని చూస్తుంటే భవిష్యత్తులో అతను ప్రపంచ క్రికెట్‌ను శాసించే సూపర్ స్టార్ అవుతాడని క్రీడా విశ్లేషకులు బలంగా విశ్వసిస్తున్నారు.