CSK Vs SRH: సీఎస్కే జట్టులోకి మరో విధ్వంసకర బ్యాట్స్‌మెన్.. SRH ప్లే ఆఫ్ ఆశలు గల్లంతేనా..?

ఐపీఎల్ 2026 సీజన్‌లో వరుస గాయాలతో సతమతమవుతున్న చెన్నై సూపర్‌ కింగ్స్ (CSK) జట్టు కీలక నిర్ణయం తీసుకుంది. గాయపడిన యువ ఆల్‌రౌండర్ రామకృష్ణ ఘోష్ స్థానంలో కర్ణాటకకు చెందిన మెక్నీల్ హాడ్లీ నోరోన్హాను జట్టులోకి తీసుకున్నట్లు సమాచారం. ముంబై ఇండియన్స్‌తో జరిగిన మ్యాచ్‌లో రామకృష్ణ ఘోష్ ఐపీఎల్ అరంగేట్రం చేశారు. అయితే.. అదే మ్యాచ్‌లో బౌలింగ్ చేస్తూ కింద పడటంతో అతని కుడి కాలికి తీవ్రమైన ఫ్రాక్చర్ అయ్యింది. దీంతో అతను ఈ సీజన్ మొత్తానికి దూరమయ్యాడు. ఈ విషయాన్ని ధృవీకరించిన సీఎస్కే సీఈఓ కాశీ విశ్వనాథన్, నోరోన్హాను జట్టులోకి తీసుకునేందుకు బీసీసీఐ అనుమతి కోరినట్లు తెలిపారు.

ఎవరీ నోరోన్హా?
24 ఏళ్ల నోరోన్హా కర్ణాటక దేశవాళీ క్రికెట్‌లో అద్భుతమైన ప్రదర్శనతో ఆకట్టుకున్నాడు. గతేడాది జరిగిన మహారాజా ట్రోఫీలో మంగళూరు డ్రాగన్స్ తరపున ఆడిన అతను.. 13 మ్యాచ్‌ల్లో 148.82 స్ట్రైక్ రేట్‌తో 253 పరుగులు చేశాడు. అందులో ఏకంగా 19 సిక్సర్లు బాది తన పవర్‌ హిట్టింగ్ సత్తా చాటాడు. ఆఫ్ స్పిన్ బౌలింగ్‌తో 10 వికెట్లు పడగొట్టి ఆల్‌రౌండర్‌గా మెరిశాడు. అతని నిలకడైన ఆట తీరుతో కర్ణాటక సయ్యద్ ముస్తాక్ అలీ ట్రోఫీ జట్టులోనూ చోటు దక్కించుకున్నాడు. రామకృష్ణ ఘోష్ దూరం కావడంపై హెడ్ కోచ్ స్టీఫెన్ ఫ్లెమింగ్ విచారం వ్యక్తం చేశారు. “ఘోష్ చాలా వేగంగా ఎదుగుతున్నాడు. అతను కేవలం బౌలర్ మాత్రమే కాదు, బ్యాటింగ్‌లోనూ మెరుగుపడి మంచి ఆల్‌రౌండర్‌గా తయారవుతున్నాడు. ఈ సమయంలో అతను గాయపడటం జట్టుకు పెద్ద లోటు” అని ఫ్లెమింగ్ పేర్కొన్నారు.

కష్టాల్లో చెన్నై..
ఈ సీజన్ చెన్నైకి గాయాల సీజన్‌గా మారింది. ఇప్పటికే ఖలీల్ అహ్మద్, ఆయుష్ మ్హాత్రే వంటి ఆటగాళ్లు గాయపడగా, స్టార్ ప్లేయర్ MS ధోనీ కూడా కాలి కండరాల గాయంతో ఇబ్బంది పడుతున్నారు. బౌలింగ్ విభాగంలో నాథన్ ఎల్లిస్ అందుబాటులో లేకపోవడం, స్పెన్సర్ జాన్సన్ ఆలస్యంగా చేరడం జట్టును ఆందోళనకు గురిచేస్తోంది. ఇలాంటి క్లిష్ట పరిస్థితుల్లో నోరోన్హా రాక చెన్నై జట్టుకు ఎంతవరకు బలాన్నిస్తుందో వేచి చూడాలి.

అయితే ఎంత మంది వచ్చినా.. సన్ రైజర్స్ హైదరాబాద్ మాత్రం ప్లే ఆఫ్స్ కు వెళ్లడం ఖాయం అంటూ ఫ్యాన్స్ సోషల్ మీడియాలో పోస్టులు పెడుతున్నారు. హైదరాబాద్ జట్టు మే 18న చెన్నైలోనే సీఎస్కేతో తలపడనుంది.