Ind Vs Ned: పసికూన నెదర్లాండ్‌పై భారీ స్కోర్.. విధ్వంసం స్పష్టించిన ఓపెనర్లు స్మృతి మంధాన, షెఫాలీ వర్మ..

మహిళల టీ-20 ప్రపంచ కప్ 2026లో భాగంగా లీడ్స్ వేదికగా జరుగుతున్న తన రెండో గ్రూప్ మ్యాచ్‌లో భారత మహిళల జట్టు నెదర్లాండ్‌పై అద్భుత బ్యాటింగ్ ప్రదర్శనతో విరుచుకుపడింది. టాస్ ఓడి మొదట బ్యాటింగ్‌కు దిగిన టీమిండియా నిర్ణీత 20 ఓవర్లలో 5 వికెట్ల నష్టానికి 209 పరుగుల భారీ స్కోరు సాధించింది. మహిళల టీ20 ప్రపంచకప్ చరిత్రలో భారత జట్టు 200 పరుగుల మార్కును అందుకోవడం ఇదే తొలిసారి కావడం విశేషం.

భారత ఓపెనర్లు స్మృతి మంధాన, షెఫాలీ వర్మ ఆరంభం నుంచే ప్రత్యర్థి బౌలర్లపై దాడి చేస్తూ ఫోర్లు, సిక్సర్లతో స్టేడియాన్ని హోరెత్తించారు. షెఫాలీ వర్మ 35 బంతుల్లోనే తన అర్ధ శతకాన్ని పూర్తి చేసుకుని, మొత్తం 38 బంతుల్లో 55 పరుగులు చేసి అవుటయింది. మరోవైపు అద్భుతమైన ఫామ్‌ను కొనసాగించిన స్మృతి మంధాన 47 బంతుల్లో 75 పరుగులతో టాప్ స్కోరర్‌గా నిలిచింది. వీరిద్దరూ కలిసి మొదటి వికెట్‌కు 115 పరుగుల భారీ భాగస్వామ్యాన్ని నెలకొల్పి జట్టుకు గట్టి పునాది వేశారు.

ఆ తర్వాత వచ్చిన జెమిమా రోడ్రిగ్స్ 19 పరుగులు, కెప్టెన్ హర్మన్‌ప్రీత్ కౌర్ 12 పరుగులు చేసి పెవిలియన్ చేరారు. ఆఖరి ఓవర్లలో వికెట్ కీపర్ రిచా ఘోష్ (20 నాటౌట్), దీప్తి శర్మ (10 నాటౌట్) ధాటిగా ఆడటంతో భారత్ చివరి ఓవర్లోనే 19 పరుగులు రాబట్టింది. నెదర్లాండ్స్ బౌలర్లలో కరోలిన్ డి లాంగే రెండు వికెట్లు తీయగా, మైర్తే వాన్ డెన్ రాడ్, హీథర్ సీగర్స్, ఐరిస్ జ్విల్లింగ్ తలో వికెట్ పడగొట్టారు.

గ్రూప్‌లో దక్షిణాఫ్రికా, ఆస్ట్రేలియా వంటి బలమైన జట్లు ఉన్నందున సెమీఫైనల్ రేసులో నిలవాలంటే భారత్‌కు ఈ మ్యాచ్ గెలవడం అత్యంత కీలకం. తొలి మ్యాచ్‌లో పాకిస్తాన్‌ను 64 పరుగుల తేడాతో ఓడించిన భారత్, ఇప్పుడు నెదర్లాండ్స్‌ విధించిన 210 పరుగుల లక్ష్యంతో మరో భారీ విజయంపై కన్నేసింది.