Harmanpreet Kaur 91 Runs: హర్మన్‌ప్రీత్ కౌర్ సంచలనం.. స్మృతి మంధాన రికార్డు బద్దలు!

Harmanpreet Kaur 91 Runs: భారత మహిళా క్రికెట్ జట్టు స్టార్ బ్యాటర్ హర్మన్‌ప్రీత్ కౌర్ అద్భుతమైన ఇన్నింగ్స్‌తో సరికొత్త రికార్డు సృష్టించింది. జింబాబ్వేతో జరిగిన మూడో టీ20 మ్యాచ్‌లో కేవలం 41 బంతుల్లోనే అజేయంగా 91 పరుగులు చేసి భారత జట్టుకు భారీ స్కోరు అందించింది. ఈ క్రమంలో భారత గడ్డపై మహిళల టీ20 అంతర్జాతీయ క్రికెట్‌లో భారత బ్యాటర్ చేసిన అత్యధిక వ్యక్తిగత స్కోరు రికార్డును తన ఖాతాలో వేసుకుంది. అక్టోబర్ 20న రాయ్‌పూర్‌లోని షహీద్ వీర్ నారాయణ్ సింగ్ అంతర్జాతీయ స్టేడియంలో భారత్, జింబాబ్వే జట్ల మధ్య మూడో టీ20 మ్యాచ్ జరిగింది. ఈ మ్యాచ్‌లో టాస్ గెలిచిన భారత కెప్టెన్ స్మృతి మంధాన తొలుత బ్యాటింగ్ ఎంచుకుంది.

నాలుగో స్థానంలో బ్యాటింగ్‌కు వచ్చిన హర్మన్‌ప్రీత్ కౌర్ ఆరంభం నుంచే దూకుడుగా ఆడింది. జింబాబ్వే బౌలర్లపై విరుచుకుపడుతూ కేవలం 41 బంతుల్లోనే 91 పరుగులు చేసి నాటౌట్‌గా నిలిచింది. ఆమె ఇన్నింగ్స్‌లో 10 ఫోర్లు, 5 సిక్సర్లు ఉన్నాయి. హర్మన్‌ప్రీత్ మెరుపు ఇన్నింగ్స్‌తో భారత్ నిర్ణీత 20 ఓవర్లలో 7 వికెట్ల నష్టానికి 216 పరుగుల భారీ స్కోరు సాధించింది. భారత గడ్డపై మహిళల టీ20 అంతర్జాతీయ మ్యాచ్‌లో భారత బ్యాటర్ సాధించిన అత్యధిక వ్యక్తిగత స్కోరు రికార్డు ఇంతకుముందు స్మృతి మంధాన పేరిట ఉండేది. 2025 డిసెంబర్ 28న తిరువనంతపురంలో శ్రీలంకతో జరిగిన మ్యాచ్‌లో మంధాన 48 బంతుల్లో 80 పరుగులు చేసింది.

తాజాగా హర్మన్‌ప్రీత్ కౌర్ అజేయంగా 91 పరుగులు చేసి మంధాన రికార్డును అధిగమించింది. ఈ జాబితాలో షఫాలీ వర్మ మూడో స్థానంలో ఉంది. 2025 డిసెంబర్ 26న శ్రీలంకతో జరిగిన మ్యాచ్‌లో షఫాలీ 42 బంతుల్లో అజేయంగా 79 పరుగులు చేసింది. అయితే, భారత గడ్డపై జరిగిన మహిళల టీ20 అంతర్జాతీయ మ్యాచ్‌లో అత్యధిక వ్యక్తిగత స్కోరు చేసిన బ్యాటర్‌గా ఇంగ్లండ్‌కు చెందిన డానీ వ్యాట్-హాడ్జ్ కొనసాగుతోంది. ఆమె 2018 మార్చి 25న ముంబైలోని బ్రబోర్న్ స్టేడియంలో భారత్‌పై 64 బంతుల్లో 124 పరుగులు చేసింది.

మహిళల టీ20 అంతర్జాతీయ క్రికెట్‌లో భారత బ్యాటర్లు ఇప్పటివరకు నాలుగు శతకాలు సాధించినప్పటికీ, భారత గడ్డపై మాత్రం ఇప్పటివరకు ఒక్క శతకం కూడా నమోదు కాలేదు హర్మన్‌ప్రీత్ కౌర్ 2018లో వెస్టిండీస్‌లో జరిగిన మ్యాచ్‌లో టీ20 అంతర్జాతీయ శతకం సాధించింది. షఫాలీ వర్మ 2026 ఆసియా క్రీడల్లో జపాన్‌లో బంగ్లాదేశ్‌పై సెంచరీ చేసింది. స్మృతి మంధాన ఇంగ్లండ్, యూఏఈల్లో ఒక్కో టీ20 అంతర్జాతీయ శతకం నమోదు చేసింది. హర్మన్‌ప్రీత్ కౌర్ 91 పరుగుల అద్భుత ఇన్నింగ్స్‌తో రికార్డు సృష్టించినప్పటికీ, భారత గడ్డపై మహిళల టీ20 అంతర్జాతీయ క్రికెట్‌లో తొలి భారతీయ శతకం కోసం ఎదురుచూపులు కొనసాగుతున్నాయి.