Harmanpreet Kaur History: హర్మన్‌ప్రీత్‌ కౌర్ నయా చరిత్ర.. క్రికెట్‌ హిస్టరీలోనే మొట్టమొదటి కెప్టెన్!

Most matches as captain in Women’s T20Is: భారత మహిళల క్రికెట్ జట్టు కెప్టెన్ హర్మన్‌ప్రీత్ కౌర్ అరుదైన ప్రపంచ రికార్డు నెలకొల్పింది. టీ20 అంతర్జాతీయ క్రికెట్‌లో 150 మ్యాచ్‌లకు కెప్టెన్‌గా వ్యవహరించిన తొలి క్రికెటర్‌గా చరిత్ర సృష్టించింది. మహిళల ఆసియా కప్ 2026లో భాగంగా శనివారం పాకిస్థాన్‌తో జరిగిన మ్యాచ్‌లో భారత జట్టుకు నాయకత్వం వహించడంతో హర్మన్‌ప్రీత్ ఖాతాలో ఈ రేర్ రికార్డు చేరింది. పురుషులు, మహిళలు అంతర్జాతీయ టీ20 క్రికెట్‌లో ఇప్పటివరకు ఏ ప్లేయర్ 150 మ్యాచ్‌లకు కెప్టెన్‌గా వ్యవహరించలేదు.

టీ20 అంతర్జాతీయ క్రికెట్‌లో అత్యధిక మ్యాచ్‌లకు కెప్టెన్‌గా వ్యవహరించిన ఆటగాళ్ల జాబితాలో హర్మన్‌ప్రీత్ కౌర్ చాలా ముందంజలో ఉంది. శ్రీలంక మహిళల కెప్టెన్ చామరి ఆటపట్టు 121 మ్యాచ్‌లతో రెండో స్థానంలో ఉండగా.. ఆస్ట్రేలియా దిగ్గజం మెగ్ లానింగ్ 100 మ్యాచ్‌లతో మూడో స్థానంలో ఉంది. ఇంగ్లండ్‌కు చెందిన హీథర్ నైట్, రువాండా కెప్టెన్ డయాన్ బిమన్యిమనా చెరో 96 మ్యాచ్‌లతో టాప్ 5లో ఉన్నారు. పురుషుల అంతర్జాతీయ టీ20ల్లోనూ అత్యధిక మ్యాచ్‌లకు కెప్టెన్‌గా వ్యవహరించిన ఆటగాడు హర్మన్‌ప్రీత్‌కు ఆమడ దూరంలో ఉన్నారు. నమీబియా కెప్టెన్ గెర్హార్డ్ ఎరాస్మస్ 91 టీ20 అంతర్జాతీయ మ్యాచ్‌లకు నాయకత్వం వహించి.. పురుషుల విభాగంలో అగ్రస్థానంలో ఉన్నాడు. భారత మాజీ కెప్టెన్ ఎంఎస్ ధోనీ 72 టీ20 మ్యాచ్‌లకు నాయకత్వం వహించాడు.

150 మ్యాచ్‌ల కెప్టెన్సీ ఘనతపై హర్మన్‌ప్రీత్ కౌర్ స్పందించింది. మ్యాచ్‌ల సంఖ్యల కంటే ఆటను ఆస్వాదించడం ముఖ్యమని పేర్కొంది. ‘ఇది గొప్ప, అరుదైన రికార్డు. కానీ మైదానంలో ఆటను ఆస్వాదిస్తూ కొనసాగడం ఎంతో ముఖ్యం. నేను ఎప్పుడూ అదే ప్రయత్నిస్తాను’ అని చెప్పింది. హర్మన్‌ప్రీత్ ఎన్నో సంవత్సరాలుగా భారత మహిళల టీ20 జట్టులో కీలక ప్లేయర్‌గా కొనసాగుతోంది. బ్యాటర్‌గా మాత్రమే కాకుండా.. నాయకురాలిగా కూడా జట్టులో కీలక పాత్ర పోషిస్తోంది. ఆమె అద్భుత కెప్టెన్సీ కారణంగానే భారత మహిళల టీ20 క్రికెట్‌లో ఎంతో అనుభవం, స్థిరత్వం ఏర్పడింది.

మహిళల టీ20లో కెప్టెన్‌గా అత్యధిక మ్యాచ్‌లు:
150* – హర్మన్‌ప్రీత్ కౌర్
121 – చమరి అటపట్టు
100 – మెగ్ లానింగ్
96 – హీథర్ నైట్
96 – డయాన్ బిమెనియిమాన