Cricket Helmet History: ప్రస్తుత క్రికెట్ ప్రపంచంలో ఏ బ్యాటర్ అయినా ‘‘హెల్మెట్’’ లేకుండా బ్యాటింగ్ చేయడం దాదాపుగా అసాధ్యం. కానీ, ఒకప్పుడు బ్యాటర్లు ఎలాంటి హెల్మెట్ లేకుండా జెంటిల్మెన్ గేమ్ ఆడేవారు. గంటకు 140 కిలోమీటర్ల వేగంగా వచ్చే బంతుల్ని ఎదుర్కొనేవారు. ఒక వేళ ఇవి తలకు తాకితే ప్లేయర్ చనిపోవడం గ్యారెంటీ. అలాంటి సమయంలోనే క్రికెట్లోకి హెల్మెట్ వచ్చింది. ఇంగ్లాండ్ దిగ్గజ క్రికెటర్ ఆలోచన నుంచి పుట్టిందే ఈ హెల్మెట్.
ఇంగ్లండ్ మాజీ బ్యాట్స్మన్ డెన్నిస్ అమిస్ క్రికెట్ చరిత్రలో తొలిసారిగా హెల్మెట్ ధరించి బ్యాటింగ్ చేసిన ఆటగాడిగా గుర్తింపు పొందారు. తన కాలంలో ఇతను అత్యుత్తమ బ్యాటర్లలో ఒకరిగా పేరొందారు. బ్యాటింగ్ చేస్తు్న సమయంలో బౌలర్లు విసిరే బాల్స్ తన తలకు తగిలితే పరిస్థితి ఏంటనే ఆలోచన అమిస్లో ఉండేది. ప్యాకర్ వరల్డ్ సిరీస్లో సమయంలో 90 మైళ్ల వేగంతో బౌలింగ్ చేసే బౌలర్లను ఎదుర్కోవడం కష్టంగా ఉండేదని ఆయన చెప్పారు. ఇలాంటి సమయంతో తన సహచర ఆటగాడు టోనీ గ్రేగ్తో మాట్లాడుతుండగా ఒక వ్యక్తి హెల్మెంట్ ధరించి బైక్పై వెళ్తుండటం గమనించారు. దీని ద్వారానే ‘‘క్రికెట్ హెల్మెంట్’’ పుట్టింది.
బైక్ రైడర్ల భద్రత కోసం హెల్మెట్లు వాడితే, బ్యాటర్లు ప్రమాదాలు ఎదుర్కోవడానికి హెల్మెట్లు అవసరమని అమిస్ బలంగా వాదించారు. దీంతోనే హెల్మెట్ ప్రతిపాదనకు ఆమోదం లభించింది. దీంతో ప్రత్యేకంగా ఆట కోసం హెల్మెట్లను రూపొందించడం ప్రారంభమైంది. క్రమంగా ప్రపంచవ్యాప్తంగా క్రికెటర్లు హెల్మెట్లను వాడటం ప్రారంభమైంది.
డెన్నిస్ అమిస్ అద్భుతమైన అంతర్జాతీయ కెరీర్ కలిగి ఉన్నారు. ఇంగ్లాండ్ తరపున 50 టెస్టులు మరియు 18 వన్డేలు (ODIs) ఆడారు. టెస్ట్ క్రికెట్లో 11 సెంచరీలు, 11 అర్ధ సెంచరీలతో సహా మొత్తం 3612 పరుగులు చేశారు. టెస్టుల్లో ఆయన అత్యధిక స్కోరు 263 నాటౌట్. వన్డే క్రికెట్లో ఆయన 859 పరుగులు మరియు నాలుగు సెంచరీలు సాధించారు.