నటి వరలక్ష్మి శరత్ కుమార్ దర్శకురాలిగా మారి చేసిన సినిమా ‘సరస్వతి’. స్వతహాగా తమిళ నటి అయినా, ఈ మధ్యకాలంలో తెలుగులో మంచి గుర్తింపు తెచ్చుకున్న ఆమె, ఈ సినిమాని తెలుగులోనే ప్రేక్షకుల ముందుకు తీసుకురావడం గమనార్హం. రిలీజ్కి ఒక రోజు ముందు సెన్సార్ అభ్యంతరాలతో ‘ఎస్ సరస్వతి’గా ప్రేక్షకుల ముందుకు ఈ సినిమా వచ్చింది. వరలక్ష్మి శరత్ కుమార్ మొదటిసారి దర్శకత్వం చేస్తూ ఉండటం, ప్రమోషన్ కంటెంట్ వర్కౌట్ కావడంతో సినిమా మీద ప్రేక్షకులలో అంచనాలు ఏర్పడ్డాయి. మరి ఈ సినిమా ఎలా ఉంది? ప్రేక్షకులను ఎంతవరకు ఆకట్టుకుంది? అనేది ఇప్పుడు రివ్యూలో చూద్దాం.
‘ఎస్ సరస్వతి’ కథ:
లక్ష్మి (వరలక్ష్మి శరత్ కుమార్) ఒక ఆసుపత్రిలో నర్సుగా పనిచేస్తూ ఉంటుంది. ఆగస్టు 15వ తేదీన తన కుమార్తె, 12 ఏళ్ల సరస్వతి పుట్టినరోజున స్కూల్లో దింపి, ఆసుపత్రికి వెళ్లి వచ్చేటప్పటికి స్కూల్లో ఆమె కుమార్తె కనిపించదు. స్కూల్ యాజమాన్యం అసలు “మీ కుమార్తె మా స్కూల్లోనే చదవడం లేదు” అని తేల్చి చెబుతారు. అయితే అదే రోజు రాత్రి తన కుమార్తె ప్రిన్సిపల్ రూమ్ నుంచి ఫోన్ చేయడంతో లక్ష్మి అక్కడికి వెళుతుంది. అక్కడ తన కుమార్తెను ముగ్గురు వ్యక్తులు రేప్ చేశారనే విషయం తెలిసి తల్లడిల్లిపోతుంది.
తన కుమార్తె పరువు పోకూడదని ఆమె శవాన్ని తానే స్వయంగా స్మశానానికి తీసుకువెళ్లి పూడ్చి పెడుతుంది. ఉదయాన్నే వెళ్లి పోలీస్ కంప్లైంట్ ఇస్తే, పోలీసులు వచ్చి వెతికినా ఆమె శవం కనిపించదు. దీంతో పోలీసులు ఈ విషయాన్ని లైట్ తీసుకుంటారు. అయినా న్యాయం కోసం ఎన్నో ప్రయత్నాలు చేసిన లక్ష్మి, చివరికి లాయర్ రామానుజం (ప్రకాష్ రాజ్) వద్దకు వెళుతుంది. ఈ కేసులో ఎలాంటి ఆధారాలు లేకపోయినా ఆయన కేస్ టేకప్ చేసి కోర్టులో కేసు ఫైల్ చేస్తారు. అయితే అసలు లక్ష్మి కుమార్తెను రేప్ చేసింది ఎవరు? కోర్టులో రామానుజం ఏమని ప్రూవ్ చేశాడు? అసలు లక్ష్మి తన భర్త (జీవ) నుంచి ఎందుకు విడిపోయింది? ఈ సినిమాలో ప్రియమణి, రాధికా శరత్ కుమార్ పాత్రలు ఏమిటి? అనేది తెలియాలంటే సినిమాని బిగ్ స్క్రీన్ మీద చూడాల్సిందే.
‘ఎస్ సరస్వతి’ విశ్లేషణ:
ఈ సినిమా ప్రమోషనల్ కంటెంట్ చూస్తేనే, తన కుమార్తె మిస్ అవ్వడం, ఆ తర్వాత ఆమె కోసం వరలక్ష్మి శరత్ కుమార్ చేసే న్యాయపోరాటం అని ఈజీగా అర్థమవుతుంది. అయితే సినిమా ప్రారంభమైన కొద్దిసేపటికే సినిమా మీద ప్రేక్షకులలో ఆసక్తి పెంచడంలో దర్శకురాలిగా వరలక్ష్మి శరత్ కుమార్ సక్సెస్ అయింది. మొదటి సినిమా కావడంతో అనుభవలేమి కొన్ని చోట్ల కనిపించినా, సినిమాని ఆద్యంతం ఎంగేజింగ్గా నడిపించడంలో ఆమె సక్సెస్ అయింది.
ఇందులో కొసమెరుపు ఏమిటంటే, సినిమా ప్రారంభమైన కొద్దిసేపటికే ప్రమోషనల్ కంటెంట్ చూసిన వారికి సినిమా కథ ఏమిటో అర్థం అయిపోతుంది. అయినా సరే ఎక్కడా పట్టు సడలకుండా ప్రేక్షకులను ఎంగేజ్ చేయడంలో ఈ సినిమా సక్సెస్ అయింది. కానీ కొన్నిచోట్ల లాజిక్ లేస్ సీన్స్, అనవసరమైన సీన్స్ చూస్తున్నామనే ఫీలింగ్ మాత్రం ప్రేక్షకులకు కలుగుతుంది. కొన్ని కెమెరా యాంగిల్స్ కూడా భిన్నంగా ప్రయత్నించాలని అనుకున్నారో ఏమో తెలియదు కానీ, అవి రొటీన్కి భిన్నంగా ఉన్నా ప్రేక్షకులను మాత్రం ఆకట్టుకోవడంలో సక్సెస్ కాలేదు.
తన కుమార్తె రేప్ కాబడి చనిపోతే, ఆ రేప్ చేసిన వాళ్లను చట్టపరంగా శిక్షించడం కోసం ఓ తల్లి చేసే పోరాటమే ఈ సినిమా అని ప్రమోషనల్ కంటెంట్ మనకి అర్థమయ్యేలా చెప్పింది. కానీ సినిమా మాత్రం అందుకు పూర్తి భిన్నం. నిజానికి ఈ సినిమాని స్క్రీన్ ప్లేతోనే పూర్తిస్థాయిలో నడిపించారు; అది చాలాచోట్ల వర్కౌట్ అయింది, కొన్నిచోట్ల బోర్ కొట్టించింది. నిజానికి ఈ సినిమా పాయింట్ చాలా అద్భుతంగా ఉంది. ఈ దేశంలో జాతీయ జంతువు లేదా జాతీయ పక్షికి హాని కలిగిస్తే ఉండే శిక్ష కన్నా, ఒక అమ్మాయి మీద అఘాయిత్యం చేస్తే ఉండే శిక్ష చాలా తక్కువ అనే పాయింట్ ఇంట్రెస్టింగ్గా అనిపించింది.
కానీ పేపర్ మీద అద్భుతంగా అనిపించిన స్టోరీని పూర్తిస్థాయిలో తెరమీదకు తీసుకురావడంలో దర్శకురాలిగా వరలక్ష్మి శరత్ కుమార్ తడబడింది. అయితే మొదటి ప్రయత్నంలో ఆమె చాలావరకు సినిమాని ఫైన్ ట్యూన్ చేసి ప్రేక్షకుల ముందుకు తీసుకువచ్చినట్లే అనిపించింది. తొలుత థ్రిల్లర్గా ప్రారంభమైన ఈ సినిమా, ఆ తర్వాత మెడికల్ కాంప్లికేషన్స్తో పలు ట్విస్టులతో ప్రేక్షకులను ఆద్యంతం అలరించేందుకు ప్రయత్నించి, కొంతవరకు ఎంగేజ్ చేయగలిగింది.
నటీనటులు & సాంకేతిక వర్గం:
నటీనటుల విషయానికి వస్తే, లక్ష్మి పాత్రలో వరలక్ష్మి శరత్ కుమార్ ఒదిగిపోయింది. అతిథి పాత్రలో కనిపించిన జీవ తన పాత్రకు న్యాయం చేశాడు. ఎప్పటిలాగే ప్రకాష్ రాజ్ తన పాత్రలో అద్భుతంగా నటించాడు. ఇక రాధికా శరత్ కుమార్, ప్రియమణి వంటి వాళ్ళవి కూడా ఈ సినిమాలో అతిథి పాత్రలనే చెప్పాలి. ఇక మిగతా పాత్రధారులు అందరూ ఈ సినిమాలో తమ పాత్రల పరిధి మేరకు ఆకట్టుకునేలా నటించారు.
టెక్నికల్ టీం విషయానికి వస్తే, వరలక్ష్మి శరత్ కుమార్కి ఇది మొదటి సినిమా అయినా దర్శకురాలిగా తన మార్క్ వేసుకునే ప్రయత్నం చేసింది. ఇక తమన్ అందించిన సంగీతం విషయానికి వస్తే, గతంలో ఆయన చేసిన కొన్ని సినిమాలకు వదిలేసిన ట్యూన్స్ ఈ సినిమాకి ఇచ్చేసాడా అనిపించింది. నేపథ్య సంగీతం అంత వరస్ట్ అనిపించింది, అలాగే పాటలు కూడా అసలు ఏమాత్రం గుర్తుంచుకునేలా లేవు. నిజానికి చిన్న సినిమాల మేకర్స్ చిన్న సంగీత దర్శకులతో వర్క్ చేయించుకుంటే మంచిది అనే అభిప్రాయాన్ని తీసుకురావడంలో ఈ సినిమాతో తమన్ సక్సెస్ అయ్యాడు. ఇక కెమెరా వర్క్ కొత్తగా ట్రై చేశారు కానీ సాధారణ ప్రేక్షకులకు వింతగా అనిపిస్తుంది. అయితే తక్కువ సమయంలో ఈ మాత్రం అవుట్పుట్ తీసుకురావడంలో సినిమా టీం పడిన కష్టం కనిపించింది. నిర్మాణ విలువలు బాగున్నాయి.
ఫైనల్లీ: ‘సరస్వతి’.. పూర్తిస్థాయిలో థ్రిల్ పంచలేకపోయింది.
