వినియోగదారులు ఫుడ్ ఆర్డర్ చేసిన కేవలం 10 నిమిషాల్లోనే డెలివరీ చేస్తామని చేసిన ప్రకటనపై జొమాటో క్లారిటీ ఇచ్చింది. 10 నిమిషాల్లో ఫుడ్ డెలివరీ చేసే కాన్సెప్ట్పై పలు వర్గాల నుంచి వస్తున్న ఆగ్రహాన్ని దృష్టిలో పెట్టుకొని తమ కాన్సెప్ట్ ఎలా పనిచేస్తుందో జొమాటో ఫౌండర్ దీపిందర్ గోయల్ వివరణ ఇచ్చారు. 10 నిమిషాల్లో ఫుడ్ డెలివరీ సర్వీస్ అందరికీ కాదని, కొన్ని సమీప ప్రాంతాలకు మాత్రమేనని స్పష్టం చేశారు. అది కూడా పాపులర్ ఐటమ్స్కి మాత్రమే వర్తిస్తుందని దీపిందర్ గోయల్ వివరించారు.
కాగా పది నిమిషాల్లోనే డెలివరీ అంటూ ప్రకటన చేయడంతో సోషల్ మీడియాలో ఇది వైరల్ అయింది. దీంతో జొమాటోను ఉద్దేశించి సోషల్ మీడియాలో నెటిజన్లు ఏకిపారేశారు. 10 నిమిషాల్లో డెలివరీ చేసే ఆ ఫుడ్ సేఫేనా.. అసలు వండే తెస్తారా.. లేక కూరగాయలు తెచ్చి ఇచ్చి మమ్మల్నే వండుకోమంటారా అంటూ నెటిజన్లు ఫన్నీ కామెంట్లు చేశారు. దీంతో 10 నిమిషాల ఫుడ్ డెలివరీపై తమ ఏజెంట్లకు చెప్పలేదని.. డెలివరీ ఏజెంట్ల భద్రత, ఆహార నాణ్యత లాంటి విషయాల్లో తాము రాజీపడబోమని జొమాటో ఫౌండర్ దీపిందర్ గోయల్ వివరించారు.