Team India Coach: సూటిగా, సుత్తిలేకుండా చెప్తాడు.. టీమిండియా కోచ్‌గా అతడే బెస్ట్‌ ఆప్షన్‌!

Wasim Akram on Team India Coach: భారత సీనియర్ జట్టు హెడ్ కోచ్‌ పదవి కోసం బీసీసీఐ ఇప్పటికే దరఖాస్తులను ఆహ్వానించింది. కొత్త కోచ్‌ 2027 వన్డే ప్రపంచకప్‌ వరకు పదవిలో ఉంటాడు. కోచ్‌ పదవి కోసం దరఖాస్తు చేసుకొనేందుకు ఈ నెల 27 తుది గడువు. దాంతో హెడ్ కోచ్‌ పదవిని బీసీసీఐ ఎవరితో భర్తీ చేస్తుందని ఆసక్తికరంగా మారింది. ప్రస్తుత హెడ్ కోచ్ రాహుల్ ద్రవిడ్ మరోసారి కొనసాగడానికి సముఖంగా లేడు. కోచ్‌ పదవి రేసులో స్టీఫెన్ ఫ్లెమింగ్, జస్టిన్‌ లాంగర్, గౌతమ్ గంభీర్, రికీ పాంటింగ్‌, మహేళ జయవర్థెనెల పేర్లు ప్రముఖంగా వినిపిస్తున్నాయి. అయితే టీమిండియా కోచ్‌గా గంభీర్ బెస్ట్‌ ఆప్షన్‌ అని పాకిస్తాన్ మాజీ కెప్టెన్ వసీమ్ అక్రమ్‌ పేర్కొన్నాడు.

స్పోర్ట్స్‌కీడాలో ఇంటరాక్షన్ సందర్భంగా వసీమ్ అక్రమ్‌ టీమిండియా హెడ్ కోచ్‌ పదవిపై స్పందించాడు. తన ఓటు గౌతమ్ గంభీర్‌కే అని తెలిపాడు. సూటిగా సుత్తిలేకుండా చెప్పే గౌతీ.. ఏ విషయంపై అయినా రెండు రకాల మాటలు చెప్పడన్నాడు. ‘టీమిండియా హెడ్ కోచ్‌ రేసులో గౌతమ్ గంభీర్‌ ముందుంటాడు. ఎందుకంటే.. అతడు సూటిగా మాట్లాడుతాడు. అతడిని అర్థం చేసుకోవడం పెద్ద కష్టమేం కాదు. గౌతీ సాధారణ వ్యక్తే. అయితే కోచ్ పదవిని అతడు అంగీకరిస్తాడా? లేదా? అనేది కీలకం. తనకు ఇష్టమైన క్రికెట్‌ కోసం ఇప్పటికే రాజకీయాలను కూడా పక్కన పెట్టేశాడు. కాబట్టి అతడికి తగినంత సమయం ఉంది. ఎందుకంటే టీమిండియా కోచ్‌గా ఎక్కువ టైమ్‌ వెచ్చించాల్సిన అవసరం ఉంటుంది’ అని అక్రమ్‌ అన్నాడు.

Also Read: Janhvi Kapoor: ‘దేవర’లో తన పాత్రను రివీల్ చేసిన జాన్వీ కపూర్‌!

‘గౌతమ్ గంభీర్‌కు ఇద్దరు కుమార్తెలు ఉన్నారు. కాబట్టి అతడు ఎలాంటి నిర్ణయం తీసుకుంటాడనేది ఆసక్తికరంగా మారింది. ఏ విషయాన్ని అయినా స్పష్టంగా వెల్లడించే తెలివైన వ్యక్తి గంభీర్‌. దేని గురించీ రెండు రకాల మాటలు చెప్పడు. ఎక్కడ పొరపాటు జరిగినా.. మొహం మీదే చెప్పేస్తాడు. ఆ లక్షణాల కారణంగానే అతడిని చాలా మంది అభిమానిస్తున్నారు. గంభీర్‌ మాటల్లో దూకుడు కనిపిస్తోంది. ఒకవేళ భారత జట్టు కోచ్‌గా వస్తే జట్టులోకి దానిని తీసుకొస్తాడనంలో ఎలాంటి సందేహం లేదు’ అని వసీమ్ అక్రమ్‌ పేర్కొన్నాడు. ఐపీఎల్ 2024లో కోల్‌కతాకు మెంటార్‌గా ఉన్నాడు. అతడి మార్గనిర్ధేశంలో కోల్‌కతా ఫైనల్‌కు చేరిన విషయం తెలిసిందే.