తమిళ సూపర్ స్టార్ దళపతి విజయ్ నటించిన లేటెస్ట్ మూవీ ‘జన నాయగన్’ విడుదలకు ముందు వరుస అడ్డంకులను ఎదుర్కొంటోంది. ఈ సినిమా సెన్సార్ క్లియరెన్స్ విషయంలో తలెత్తిన వివాదంపై తాజాగా సుప్రీంకోర్టులో నిర్మాతలకు నిరాశే ఎదురైంది. ఈ సినిమాకు సెన్సార్ బోర్డు కేవలం ‘A’ (అడల్ట్) సర్టిఫికేట్ మాత్రమే ఇస్తామని పట్టుబట్టడంతో, నిర్మాతలు దీన్ని వ్యతిరేకిస్తూ కోర్టును ఆశ్రయించారు. అయితే, ఈ విషయాన్ని నేరుగా విచారించేందుకు సుప్రీంకోర్టు నిరాకరించింది. వెంటనే మద్రాస్ హైకోర్టు డివిజన్ బెంచ్ను ఆశ్రయించాలని నిర్మాతలకు సూచించింది.
Also Read : Sardar 2 : సర్దార్ 2 వచ్చేస్తోంది.. ఈ ఏడాదే కార్తీ యాక్షన్ ధమాకా!
ఈ వివాదంపై కాలపరిమితిని కూడా సుప్రీంకోర్టు నిర్ణయించింది. జనవరి 20వ తేదీ లోపు ఈ సెన్సార్ సమస్యపై తుది నిర్ణయం తీసుకోవాలని మద్రాస్ హైకోర్టుకు సుప్రీంకోర్టు ఆదేశాలు జారీ చేసింది. రాజకీయ నేపథ్యంలో సాగే ఈ సినిమాలో కొన్ని వివాదాస్పద సన్నివేశాలు ఉన్నాయని, అందుకే యూ/ఏ (U/A) సర్టిఫికేట్ ఇచ్చేందుకు సెన్సార్ బోర్డు నిరాకరిస్తోందని తెలుస్తోంది. పండుగ సీజన్లో భారీ అంచనాలతో ఉన్న విజయ్ అభిమానులు, ఈ న్యాయపరమైన చిక్కుల వల్ల సినిమా విడుదల ఆలస్యం అవుతుందేమోనని ఆందోళన చెందుతున్నారు. హైకోర్టు ఇచ్చే తీర్పు పైనే ఇప్పుడు ‘జన నాయగన్’ భవిష్యత్తు ఆధారపడి ఉంది.