ఎండల తీవ్రత పెరిగే కొద్దీ కూరగాయల ధరలు పెరగడమే కాకుండా, తెచ్చిన కూరగాయలు రెండు రోజులకే పాడైపోతున్నాయి. టమాటాలు మెత్తబడటం, ఆకుకూరలు వాడిపోవడం, బెండకాయలు నల్లబడటం వంటి సమస్యలను నివారించడానికి ఈ క్రింది పద్ధతులను అనుసరించండి.
1. శుభ్రం చేయడం , ఆరబెట్టడం
మార్కెట్ నుండి తెచ్చిన కూరగాయలను ముందుగా నీటితో బాగా కడగాలి. ముఖ్యంగా ఆకుకూరల విషయంలో ఒక టీస్పూన్ బేకింగ్ సోడా లేదా కొద్దిగా వెనిగర్ కలిపిన గోరువెచ్చని నీటిలో నానబెట్టి కడగడం వల్ల వాటిపై ఉండే బ్యాక్టీరియా, కెమికల్స్ తొలగిపోతాయి. కడిగిన తర్వాత ఒక పొడి బట్టతో లేదా పేపర్ టవల్తో తేమ లేకుండా పూర్తిగా తుడిచి ఆరబెట్టాలి. తేమ ఉంటే బ్యాక్టీరియా త్వరగా వృద్ధి చెంది కూరగాయలు కుళ్లిపోతాయి.
2. ఆకుకూరల నిల్వ
ఆకుకూరలను ఎక్కువ కాలం తాజాగా ఉంచాలంటే, వాటిలో కుళ్లిపోయిన ఆకులను ముందుగానే వేరు చేయాలి. వీటిని కట్ చేసి కొద్దిసేపు ఆరబెట్టిన తర్వాత విడివిడిగా జిప్ లాక్ బ్యాగ్లలో లేదా ప్లాస్టిక్ కంటైనర్లలో నిల్వ చేయాలి. ఆకుకూరలను ఒకదానిపై ఒకటి గాలి ఆడకుండా కుక్కకూడదు.
3. టమాటాలు పాడవకుండా ఉండాలంటే..
టమాటాలను ప్లాస్టిక్ కవర్లో ఉంచేటప్పుడు ఆ కవర్కు చిన్న చిన్న రంధ్రాలు చేయాలి. దీనివల్ల గాలి ఆడి టమాటాలు ఎక్కువ రోజులు గట్టిగా ఉంటాయి. లేదా టమాటాలను ముక్కలుగా కోసి, వాటిని ఆలివ్ ఆయిల్ ఉన్న కంటైనర్లో వేసి ఫ్రిజ్లో నిల్వ చేయడం వల్ల కూడా ఎక్కువ కాలం నిల్వ ఉంటాయి.
4. ఆలుగడ్డలు, ఉల్లిపాయలు , వెల్లుల్లి
వీటిని ఎప్పుడూ ఫ్రిజ్లో పెట్టకూడదు. వెల్లుల్లిని గాలి ఆడే జ్యూట్ (జనపనార) బ్యాగ్లలో ఉంచి చల్లని ప్రదేశంలో వేలాడదీయాలి. ముఖ్యంగా ఆలుగడ్డలు , ఉల్లిపాయలను కలిపి ఒకే చోట ఉంచకూడదు; ఇలా చేయడం వల్ల అవి త్వరగా మొలకలు వచ్చి పాడైపోతాయి.
5. ఇతర కూరగాయలు
క్యారెట్, క్యాప్సికమ్, క్యాబేజీ , బ్రోకలీ వంటి కూరగాయలను ప్లాస్టిక్ కవర్లలో లేదా డబ్బాల్లో ఉంచి ఫ్రిజ్లోని వెజిటబుల్ ట్రేలో నిల్వ చేయాలి. కూరగాయలను ఎప్పుడూ నేరుగా సూర్యరశ్మి పడే చోట లేదా గ్యాస్ పొయ్యి దగ్గర ఉంచకూడదు.
కూరగాయలను నిల్వ చేసే ముందు సరైన శుభ్రత , సరైన ఉష్ణోగ్రతను పాటించడం వల్ల వాటిలోని పోషకాలు కోల్పోకుండా, ఎక్కువ కాలం తాజాగా వాడుకోవచ్చు. ఈ చిన్న చిన్న కిచెన్ హ్యాక్స్ మీ డబ్బును ఆదా చేయడమే కాకుండా ఆరోగ్యకరమైన ఆహారాన్ని అందిస్తాయి.
