Vanitha TV 18th Anniversary Special Song: స్త్రీ శక్తికి సలాం.. ‘వనిత టీవీ’ 18వ వార్షికోత్సవం సందర్భంగా ప్రత్యేక పాట..

Vanitha TV 18th Anniversary Special Song: తెలుగు టెలివిజన్ రంగంలో మహిళల కోసం ప్రత్యేక గుర్తింపు తెచ్చుకున్న ఛానెల్‌ వనిత టీవీ 18వ వార్షికోత్సవాన్ని జరుపుకుంటోంది. 2008 అక్టోబర్ 9న ప్రారంభమైన ఈ ఛానెల్‌ 18 వసంతాలు పూర్తి చేసుకుని మరో మైలురాయిని చేరుకుంది. మహిళా కేంద్రంగా కార్యక్రమాలను ప్రసారం చేస్తూ, మహిళల సాధికారత, ఆరోగ్యం, జీవనశైలి, సంక్షేమం వంటి అంశాలకు ప్రాధాన్యతనిస్తూ తనకంటూ ప్రత్యేక గుర్తింపును సంపాదించుకుంది.

స్త్రీ గొప్పతనాన్ని చాటే అద్భుతమైన పాట
వనిత టీవీ 18వ వార్షికోత్సవం సందర్భంగా స్త్రీ గొప్పతనాన్ని, సమాజంలో ఆమెకున్న ప్రాధాన్యతను చాటిచెప్పే అద్భుతమైన పాట ప్రత్యేక ఆకర్షణగా నిలుస్తోంది. స్త్రీని సృష్టికి మూలాధారంగా, మమకారానికి ప్రతిరూపంగా, సహనానికి నిలువెత్తు నిదర్శనంగా ఈ పాటలో అభివర్ణించారు. మహిళ జీవితంలోని గొప్పతనాన్ని, కుటుంబానికి, సమాజానికి ఆమె అందించే సేవలను హృద్యంగా ఆవిష్కరించారు.

“జన ధరణికి నీవే మూలాధారం..
నీవే.. నీవే.. జగజ్జనని అవతారం..
ప్రతి బతుకున్న పరిమళము సుకుమారం..
నీవే ఈ సృష్టికి అలంకారం” అంటూ సాగే గీతం స్త్రీ ఔన్నత్యాన్ని చాటుతోంది.

“మనుగడకే నువ్‌ ఆభరణం..
మమకారానికి వ్యాకరణం..
సహనం నీ సహజ గుణం..
శిరోధార్యమే నీ శ్రీ చరణం” అంటూ మహిళలోని ప్రేమ, సహనం, మమకారం వంటి గొప్ప లక్షణాలను కీర్తిస్తోంది.

“వనితా.. వనితా.. వనితా.. వనితా.. నీ వలనే మా చరిత.. భవిత..” అంటూ సాగే పల్లవి మహిళ ప్రాధాన్యతను, సమాజ భవిష్యత్తులో ఆమె పాత్రను చాటిచెబుతోంది. వనిత టీవీ వార్షికోత్సవానికి ప్రత్యేక ఆకర్షణగా నిలిచే ఈ పాట మహిళల గొప్పతనాన్ని మరోసారి గుర్తుచేస్తోంది.

కింది లింక్‌ను క్లిక్‌ చేసి.. వనిత టీవీ వార్షికోత్సవం ప్రత్యేక గీతాన్ని వీక్షించవచ్చు