వాలెంటైన్స్ డే అంటేనే ఇద్దరు వ్యక్తుల మధ్య ఉండే ఆత్మీయ అనుబంధాన్ని వేడుక చేసుకోవడం. ఇక ఈ సారి 2026 ఫిబ్రవరి 14 శనివారం నాడు రావడంతో, సెలవుల గురించి పెద్దగా ఆలోచించకుండానే ఒక చిన్నపాటి విహారయాత్రను ప్లాన్ చేసుకోవచ్చు. కొందరు ముందే రిజర్వేషన్లు చేసుకుని సిద్ధంగా ఉంటే, మరికొందరు ఆఖరి నిమిషం వరకు వాయిదా వేస్తుంటారు. మీరు కూడా ఆ ‘లాస్ట్ మినిట్’ జాబితాలో ఉంటే, మీ భాగస్వామితో కలిసి ఏకాంతంగా గడపడానికి రొటీన్కు భిన్నంగా ఉండే కొన్ని ప్రదేశాలు ఇక్కడ ఉన్నాయి.
ప్రేమలో మునిగి తేలాలనుకునే జంటలకు కేరళలోని వాయనాడ్ ఒక స్వర్గధామం. దట్టమైన అడవులు, ఎత్తైన కొండల మధ్య ఉండే అందమైన రిసార్టులు మీ వీకెండ్ను కలర్ఫుల్గా మారుస్తాయి. కాస్త విభిన్నంగా ఉండాలనుకుంటే, కర్ణాటకలోని కూర్గ్ ఉత్తమ ఎంపిక. ఇక్కడి కాఫీ తోటలు, జలపాతాల హోరులో భాగస్వామితో గడిపే సమయం మర్చిపోలేని జ్ఞాపకంగా మిగిలిపోతుంది. సముద్ర తీరం.. సాహస యాత్రలను ఇష్టపడే వారు అండమాన్లోని హావ్ లాక్ ఐలాండ్ను సందర్శించవచ్చు. తెల్లని ఇసుక తిన్నెలు, స్కూబా డైవింగ్ వంటివి మీ ట్రిప్కు గ్రాండ్ లుక్ ఇస్తాయి.
ఇక మంచులో ‘వైట్ వాలెంటైన్స్ డే’ జరుపుకోవాలనుకుంటే అరుణాచల్ ప్రదేశ్లోని తవాంగ్ సరైన ప్రదేశం. మంచుతో కూడిన పర్వత శిఖరాలు, నిశ్శబ్దంగా ఉండే లోయలు ప్రేమికులకు కొత్త అనుభూతిని ఇస్తాయి. ఇక హడావుడి లేకుండా హిమాలయాల అందాలను ఆస్వాదించాలనుకుంటే ఉత్తరాఖండ్లోని కౌసానికి వెళ్లొచ్చు. 1900 మీటర్ల ఎత్తులో ఉండే ఈ చిన్న పట్టణం నుంచి నందాదేవి శిఖరాలను చూడటం గొప్ప అనుభూతి. ఈ ఐదు ప్రదేశాల్లో ఏదో ఒకటి ఎంచుకుని, మీ భాగస్వామికి మర్చిపోలేని సర్ప్రైజ్ ఇవ్వండి.
