Vaibhav Sooryavanshi: భారత్-వెస్టిండీస్ మధ్య 5 మ్యాచ్‌ల టీ20 సిరీస్‌లో కీలక సమరం నేడు బెంగళూరు వేదికగా జరగనుంది. నాలుగు మ్యాచ్‌లు ముగిసే సరికి ఇరు జట్లు 2-2తో సమంగా ఉండటంతో నేడు బెంగళూరులోని ఎం.చిన్నస్వామి స్టేడియంలో జరిగే ఐదో టీ20 సిరీస్ డిసైడర్‌గా మారింది. ఈ నేపథ్యంలో యువ ఆటగాడు వైభవ్ సూర్యవంశీ చేసిన సోషల్ మీడియా పోస్ట్ ఇప్పుడు వైరల్‌గా మారింది.
వెస్టిండీస్‌తో సిరీస్‌లో ఇప్పటివరకు ఒక్క మ్యాచ్‌లోనూ వైభవ్‌కు అవకాశం రాలేదు. కేవలం వాటర్ బాయ్ గా మాత్రమే జట్టుకు సేవలు అందిస్తున్నాడు వైభవ్. తాజాగా ఐదో టీ20కి ముందు తన ఇన్‌స్టాగ్రామ్ స్టోరీలో ఓ ఫొటోను షేర్ చేసిన వైభవ్.. ‘స్టిల్ బిలీవింగ్’ అంటూ క్యాప్షన్ ఇచ్చాడు. దీనితో తనకు అవకాశం వస్తుందనే నమ్మకంతోనే ఉన్నాడనే సంకేతాన్ని చెప్పకనే చెప్పేసాడు. ఇంగ్లండ్ పర్యటనలో అంతర్జాతీయ అరంగేట్రం చేసిన వైభవ్.. కేవలం రెండు మ్యాచ్‌ల ఆడిన తర్వాత జట్టుకు దూరమయ్యాడు. ఆ తర్వాత జింబాబ్వే పర్యటనలో సంచలన బ్యాటింగ్‌తో అదరగొట్టి ‘ప్లేయర్ ఆఫ్ ద సిరీస్’ అవార్డు అందుకున్నాడు. ఆ తర్వాత జరిగిన ఆఫ్ఘనిస్థాన్‌తో సిరీస్‌లో మూడు మ్యాచ్‌ల్లోనూ బెంచ్‌కే పరిమితమయ్యాడు.
వెస్టిండీస్‌తో జరుగుతున్న సిరీస్‌లోనూ ఇదే పరిస్థితి కొనసాగుతోంది. ప్రస్తుతం సంజూ శాంసన్, అభిషేక్ శర్మ ఓపెనర్లుగా కొనసాగుతుండటంతో వైభవ్‌కు తుది జట్టులో చోటు దక్కడం లేదు. ఐదో టీ20 సిరీస్ డిసైడర్ కావడంతో ఓపెనింగ్ కాంబినేషన్‌ను మార్చే అవకాశాలు కూడా తక్కువగానే కనిపిస్తున్నాయి. కాబట్టి ఈ మ్యాచ్ లో కూడా వైభవ్ ఆడడం అసాధ్యమే.. వైభవ్ విషయంలో టీమిండియా హెడ్ కోచ్ గౌతమ్ గంభీర్ ఇప్పటికే స్పష్టత ఇచ్చినట్లు తెలుస్తోంది. ప్రపంచకప్ గెలిచిన ఓపెనింగ్ జోడీకి ప్రస్తుతానికి కొనసాగింపు ఇస్తామని, వైభవ్ తన అవకాశం కోసం వేచి చూడాల్సి ఉంటుందని ఆయన పేర్కొన్నారు. దీంతో వైభవ్ తన అవకాశం కోసం ఓపికగా ఎదురుచూస్తున్నాడు.