TSRTC: తెలంగాణ రాష్ట్ర రోడ్డు ర‌వాణా సంస్థ(టీఎస్ఆర్టీసీ) ప్రయాణికులకు గుడ్ న్యూస్ ప్రకటించింది. ముందుస్తు రిజర్వేషన్ చేసుకుంటే టిక్కెట్ రేట్లపై భారీ డిస్కౌంట్ ఆఫర్ తీసుకొచ్చింది. 31 రోజుల నుంచి 45 రోజుల ముందు రిజర్వేషన్ చేసుకుంటే టికెట్‌లో 5 శాతం రాయితీ క‌ల్పించింది. 46 రోజుల నుంచి 60 రోజుల ముందు టికెట్ బుక్ చేసుకుంటే 10 శాతం రాయితీ ప్రకటించింది. ఆ మేర‌కు ఆన్‌లైన్ ప్యాసెంజ‌ర్ రిజర్వేషన్ సిస్టం(ఓపీఆర్ఎస్) సాప్ట్‌వేర్‌ను అప్‌డేట్ చేసింది. ముంద‌స్తు రిజర్వేషన్ స‌దుపాయం ఉన్న అన్ని స‌ర్వీస్‌ల‌కు ఈ రాయితీ వ‌ర్తిస్తుంద‌ని టీఎస్ఆర్టీసీ సంస్థ స్పష్టం చేసింది. సంక్రాంతి సంద‌ర్భంగా ముంద‌స్తు రిజ‌ర్వేష‌న్‌ను 30 రోజుల నుంచి 60 రోజులకు టీఎస్ ఆర్టీసీ పెంచింది. ఈ ఏడాది జూన్ వ‌ర‌కు ఈ సౌక‌ర్యాన్ని క‌ల్పిస్తోంది. ఈ స‌దుపాయానికి ప్రయాణికుల నుంచి అనూహ్య స్పంద‌న వ‌చ్చింది. ఎలాంటి ఇబ్బందులు పడకుండా ఆన్ లైన్ లో సులువుగా తమ టికెట్లను రిజర్వేషన్ చేసుకున్నారు.
Read Also: RTC Bus: బెజవాడలో హోటల్‌లోకి దూసుకెళ్లిన ఆర్టీసీ బస్సు..
“రాబోయే రోజుల్లో శుభ‌కార్యాలు, పెళ్లిళ్లు, పండుగ‌లు ఎక్కువ‌గా ఉన్నాయి. ప్రజలపై ఆర్థిక భారాన్ని త‌గ్గించేందుకు ఈ నిర్ణయం తీసుకోవ‌డం జ‌రిగింది. టీఎస్ఆర్టీసీ అందిస్తున్న ఆఫర్లను ప్రయాణికులు స‌ద్వినియోగం చేసుకోవాలి.. తద్వారా సంస్థను కాపాడాలి. సుర‌క్షిత, సౌక‌ర్యవంతమైన ప్రయాణం ఆర్టీసీ బస్సుల్లోనే సాధ్యం. ముంద‌స్తు రిజర్వేషన్ విధానానికి మంచి స్పంద‌న ల‌భిస్తోంది. ప్రయాణీకుల‌కు ర‌వాణా సేవ‌లను మ‌రింత మెరుగుప‌ర‌చ‌డానికి త‌గిన కృషి చేస్తాము” అని టీఎస్ఆర్టీసీ చైర్మన్ బాజిరెడ్డి గోవ‌ర్ధన్, ఎండీ వీసీ స‌జ్జనార్ పేర్కొన్నారు. టీఎస్ఆర్టీసీ బ‌స్సుల్లో ముంద‌స్తు రిజర్వేషన్ కోసం అధికారిక వెబ్‌సైట్ ను సంద‌ర్శించాలని వారు కోరారు.
