Donald Trump: అమెరికాలో జరిగిన మధ్యంతర (మిడ్ టర్మ్) ఎన్నికల్లో రిపబ్లికన్ పార్టీ ఘోరంగా వెనుకబడటంపై ఆ దేశ అధ్యక్షుడు డోనాల్డ్ ట్రంప్ తొలిసారిగా స్పందించారు. ఒకవేళ ఈ ఎన్నికల్లో తన పేరు కూడా బ్యాలెట్‌లో ఉండి ఉంటే తమ పార్టీ అఖండ విజయం సాధించి ఉండేదని ఆయన అన్నారు. తాను ఎన్నికల బరిలో లేనందునే ఈ ఫలితాలు వచ్చాయని, తానే కనుక ఉంటే భారీ మెజార్టీతో గెలిచేవారమని ట్రంప్ పేర్కొన్నారు. ఈ మేరకు ఆయన తన సోషల్ మీడియా వేదిక ‘ట్రూత్ సోషల్’లో పోస్ట్ చేశారు.
ఈ ఎన్నికల్లో పార్టీ వెనుకడుగు వేయడానికి గల అసలు కారణాల గురించి ట్రంప్ నేరుగా ఏమీ మాట్లాడలేదు. కానీ, కేవలం తాను పోటీలో లేకపోవడం వల్లే ఈ పరిస్థితి తలెత్తిందని, తన ఉనికి ఉంటే మాత్రం రిపబ్లికన్లు భారీ తేడాతో గెలిచేవారని ఆయన ధీమా వ్యక్తం చేశారు. మరోవైపు, మీడియాతో మాట్లాడిన ట్రంప్.. ఈ ఎన్నికల ఫలితాలను పూర్తిగా అంగీకరిస్తున్నట్లు స్పష్టం చేశారు. ఫలితాలను గౌరవిస్తారా అని అడిగిన ప్రశ్నకు సానుకూలంగా బదులిచ్చారు. అంతేకాకుండా, డెమొక్రాట్లతో కలిసి పనిచేసేందుకు సిద్ధమని తెలిపారు. ఒకవేళ విపక్షం గెలిచినా సరే, తాము వారితో కలిసి పనిచేస్తామని, ఇరువర్గాలకు ఆమోదయోగ్యమైన మార్గాన్ని కనుగొంటామని చెప్పారు.
మిడ్ టర్మ్ ఎన్నికలు అంటే ఏంటి?
అమెరికా అధ్యక్ష ఎన్నికలు జరిగిన రెండేళ్ల తర్వాత ఈ మిడ్ టర్మ్ ఎన్నికలు జరుగుతుంటాయి. వీటిలో ప్రతినిధుల సభలోని మొత్తం 435 స్థానాలకు, సెనేట్‌లోని మూడింట ఒక వంతు స్థానాలకు ఎన్నికలు జరుగుతాయి. పార్లమెంట్‌లోని రెండు సభల్లో ఏ పార్టీకి మెజార్టీ వస్తుందనేది ఈ ఫలితాలే తేలుస్తాయి. ఒకవేళ డెమొక్రాట్లు ప్రతినిధుల సభలో మెజార్టీ సాధిస్తే, వారు అనేక పార్లమెంటరీ కమిటీల నియంత్రణను చేజిక్కించుకుంటారు. ఈ కమిటీల ద్వారా ట్రంప్ ప్రభుత్వం తీసుకునే నిర్ణయాలను నిలదీయవచ్చు, అధికారులను విచారణకు పిలవవచ్చు, కీలక పత్రాలను కోరవచ్చు. అంతేకాకుండా అవసరమైతే సమన్లు కూడా జారీ చేసే అధికారం వారికి లభిస్తుంది.