Brinda Release Date: స్టార్ హీరోయిన్ తొలి వెబ్ సిరీస్‌.. స్ట్రీమింగ్‌ ఎక్కడ, ఎప్పుడంటే?

Trisha’s Brinda Web Series Teaser Out: ప్రపంచవ్యాప్తంగా ప్రస్తుతం వెబ్‌ సిరీస్‌ల హవా నడుస్తోంది. ఇప్పటికే పలువురు స్టార్ హీరో, హీరోయిన్స్ వెబ్‌ సిరీస్‌లలో నటించి.. ప్రేక్షకులను ఆకట్టుకున్నారు. తాజాగా ఈ జాబితాలో స్టార్ హీరోయిన్ త్రిష కృష్ణన్ చేరారు. ‘సౌత్ క్వీన్’ త్రిష నటించిన తొలి వెబ్‌ సిరీస్‌ ‘బృందా’. సూర్య మనోజ్ వంగల దర్శకత్వంలో ఈ సిరీస్‌ తెరకెక్కింది. ఇందులో ఇంద్రజిత్ సుకుమారన్ ప్రధాన పాత్ర చేశారు. తాజాగా బృందా రిలీజ్ డేట్, టీజర్‌ను మేకర్స్ రిలీజ్ చేశారు.

ఓటీటీ వేదికగా ‘సోనీలివ్‌’లో ఆగస్టు 2 నుంచి బృందా వెబ్ సిరీస్‌ స్ట్రీమింగ్‌ కానుంది. తెలుగు, తమిళ్‌, కన్నడ, మలయాళం, హిందీ, మరాఠీ మరియు బెంగాలీలో ఈ సిరీస్ విడుదలవుతుంది. ఈ విషయాన్ని తెలియజేస్తూ మేకర్స్ టీజర్‌ని సోషల్ మీడియాలో రిలీజ్‌ చేశారు. ఒక నిమిషం 28 సెకండ్ల నిడివి గల టీజర్‌.. ‘మనలో ఉన్న కోపం, మోసం, ద్వేషం.. వీటితో కాదు మనం పోరాడాల్సింది. మనలో ఉన్న మంచితో.. అది మన నుంచి పోకుండా’ అనే డైలాగ్‌తో ఆరంభమైంది. ‘బృందా.. ఈ ప్రపంచంలో మనం రాకముందు ఎంత చెడైనా ఉండొచ్చు. కానీ వెళ్లేముందు ఎంతో కొంత మంచి చేసి వెళ్లడం మన బాధ్యత’ అనే డైలాగ్ అందరిని ఆకట్టుకుంటోంది.

Also Read: Nag Ashwin-Kalki 2898 AD: బిగ్గెస్ట్‌ ఐమాక్స్‌లో ‘కల్కి’ చూడనున్న నాగ్‌ అశ్విన్‌!

మూఢనమ్మకాలు, హత్యలు, ఇన్వెస్టిగేషన్ అంశాలతో బృందా టీజర్ ఆసక్తికరంగా ఉంది. మిస్టరీతో కూడిన కేసును పోలీస్ ఆఫీసర్ బృందా దర్యాప్తు చేయనున్నారని టీజర్ బట్టి అర్థమవుతోంది. బృందాపై ఇప్పుడు భారీ అంచనాలు నెలకొన్నాయి. ఈ సిరీస్‍లో జయ ప్రకాశ్, ఆమని, రవీంద్ర విజయ్, ఆనంద్ సామి, రాకేందు మౌళి కీలక పాత్రలు చేశారు. యాడింగ్ అడ్వర్టైజింగ్ పతాకంపై కొల్ల ఆశిష్ బృందాను నిర్మించారు. ఈ సిరీస్‍కు శక్తికాంత్ కార్తీక్ సంగీతం అందించారు.