Tilak Varma: “నువ్వు అస్సలు తగ్గొద్దు”.. శ్రీలంకతో ఫైనల్ ఫైట్‌కు ముందు వైభవ్‌కు తిలక్ ఫుల్ సపోర్ట్..

Tilak Varma: రంగిరి దంబుల్లా అంతర్జాతీయ స్టేడియం వేదికగా ఆదివారం జరగబోయే త్రైపాక్షిక సిరీస్ ఫైనల్ పోరులో శ్రీలంక ‘ఎ’ జట్టుతో తలపడటానికి ఇండియా ‘ఎ’ జట్టు సర్వసిద్ధమైంది. ఈ వారం ప్రారంభంలో జరిగిన రౌండ్-రాబిన్ దశ జరిగిన మ్యాచ్‌లో ఇండియా ‘ఎ’ పరాజయం పాలైంది. ఆ సమయంలో మైదానంలో శ్రీలంక ఆటగాడు విషెన్ హలంబాగేతో 15 ఏళ్ల భారత యువ సంచలనం వైభవ్ సూర్యవంశీ తీవ్రమైన వాగ్వాదానికి దిగడం పెద్ద చర్చకు దారితీసింది. ఈ నేపథ్యంలో ఫైనల్ మ్యాచ్‌కు ముందు ఇండియా ‘ఎ’ కెప్టెన్ తిలక్ వర్మ విలేఖరులతో మాట్లాడుతూ.. ఈ యువ ఆటగాడి దూకుడు స్వభావం (టెంపరామెంట్) పై వస్తున్న విమర్శలను కొట్టిపారేశారు. వైభవ్ తన సహజ సిద్ధమైన శైలిలోనే స్వేచ్ఛగా ఆడాలని తాను సూచించినట్లు చెప్తూ అతనికి పూర్తి మద్దతు ప్రకటించాడు.

“వైభవ్ తన సహజమైన ఆటను కొనసాగించాలని, ఒత్తిడి తీసుకోకుండా ఆటను ఆస్వాదించాలని నేను అతనికి చెప్పాను. ఈ వయసులోనే అతను కొత్త విషయాలు నేర్చుకోవాలి, తన ప్రతిభను ప్రపంచానికి చూపించాలి. ఇప్పటివరకు అతను సాధించిన విజయాలన్నీ సానుకూల (పాజిటివ్) దృక్పథంతో ఆడటం వల్లే వచ్చాయి. కాబట్టి ఇప్పుడు ఆ శైలిని మార్చుకోవాల్సిన అవసరం అస్సలు లేదు” అని తిలక్ వర్మ ‘స్పోర్ట్‌స్టార్’ ఇంటర్వ్యూలో స్పష్టం చేశాడు. ఫైనల్ మ్యాచ్‌లో వైభవ్ సూర్యవంశీ ఖచ్చితంగా రాణిస్తాడనే నమ్మకాన్ని వ్యక్తం చేసిన తిలక్.. తన బలాన్ని నమ్ముకుని ఆడాలని ఈ 15 ఏళ్ల వండర్ కిడ్‌కు సూచించాడు. కెప్టెన్‌గా తాను ఎల్లప్పుడూ వైభవ్‌కు తోడుగా ఉంటానని, అతను క్రీజులో సెట్ అయితే ఒంటిచేత్తో మ్యాచ్‌ను గెలిపించగల సామర్థ్యం అతనికి ఉందని ప్రశంసించాడు.

ఇక, భారత సీనియర్ పురుషుల జట్టు త్వరలోనే ఐర్లాండ్, ఇంగ్లాండ్‌ పర్యటనలకు వెళ్లనుంది. ఈ టీ20 సిరీస్‌లకు వైస్ కెప్టెన్‌గా ఎంపికైన తిలక్ వర్మతో పాటు.. 15 ఏళ్ల వైభవ్ సూర్యవంశీ సైతం మొదటిసారిగా సీనియర్ జాతీయ జట్టులో స్థానం సంపాదించుకున్నాడు. అయితే, జూనియర్ స్థాయి నుంచి సీనియర్ అంతర్జాతీయ క్రికెట్ స్థాయికి మారడం అనేది ఈ యువ సంచలనానికి ఒక నిజమైన పరీక్ష కానుంది. అండర్-19 క్రికెట్ నుంచి వచ్చి, ఐపీఎల్‌లో అద్భుత ప్రదర్శన చేసి, ఇప్పుడు సీనియర్ జట్టుకు ప్రాతినిధ్యం వహించడం ఖచ్చితంగా అతనికి సవాలుతో కూడుకున్నదేనని తిలక్ సైతం అభిప్రాయపడ్డాడు. అయినప్పటికీ వైభవ్ అత్యంత ప్రతిభావంతుడని, ఇలాంటి యువ ఆటగాళ్లకు జట్టు యాజమాన్యం నుంచి పూర్తి మద్దతు, మైదానంలో స్వేచ్ఛగా ఆడే అవకాశం కల్పించడం చాలా ముఖ్యమని తిలక్ వర్మ వివరించాడు.