Telangana Vahan Portal: రాష్ట్రంలో అమల్లోకి వచ్చిన వాహన్ పోర్టల్.. ఇక మీ ఇంటి నుంచే వాహన సేవలు!

Telangana Vahan Portal: తెలంగాణలో వాహన్ పోర్టల్ అమలు ప్రారంభమైంది. వాహన సేవలను పూర్తిగా డిజిటలైజ్ చేయడానికి రవాణా శాఖ కీలక చర్యలు చేపట్టింది. దశల వారీగా వాహన్ వ్యవస్థను అమలు చేస్తూ రాష్ట్రవ్యాప్తంగా సేవలను అందుబాటులోకి తీసుకొస్తోంది. ఇప్పటికే రాష్ట్రవ్యాప్తంగా 68,846 టెంపరరీ రిజిస్ట్రేషన్లు నమోదు అయినట్లు అధికారులు వెల్లడించారు. ఫ్యాన్సీ నంబర్ మాడ్యూల్ కూడా విజయవంతంగా అమలవుతుండగా, 1,880 ఫ్యాన్సీ నంబర్లకు ఆన్‌లైన్ రిజర్వేషన్లు నమోదయ్యాయి. పారదర్శకంగా నంబర్ల కేటాయింపునకు వాహన్ ప్లాట్‌ఫారమ్ ఉపయోగపడుతోందని అధికారులు తెలిపారు. ఇప్పటివరకు 23,705 వాహనాలకు పర్మినెంట్ రిజిస్ట్రేషన్ నంబర్లు జారీ చేశారు. వాహన్ వ్యవస్థ పనితీరును మెరుగుపర్చేందుకు పెండింగ్ కేసులపై రోజువారీ సమీక్షలు నిర్వహిస్తున్నారు. ఎన్‌ఐసీ సాంకేతిక సహకారంతో అమలు ప్రక్రియను వేగవంతం చేస్తున్నారు. ఇంకా మిగిలిన అదనపు మాడ్యూల్స్‌ను కూడా దశల వారీగా ప్రారంభించనున్నట్లు అధికారులు తెలిపారు. మరో 15 రోజుల్లో వ్యవస్థ పూర్తిస్థాయిలో స్థిరపడే అవకాశం ఉందని అంచనా వేస్తున్నారు. పారదర్శక, సమర్థవంతమైన డిజిటల్ సేవలను ప్రజలకు అందించడం రవాణా శాఖ ప్రధాన లక్ష్యమని అధికారులు పేర్కొన్నారు.