TG Police Recruitment 2026: తెలంగాణలో ఖాళీగా ఉన్న పోలీస్ పోస్టుల భర్తీ కోసం ఎదురుచూస్తున్న నిరుద్యోగులకు పోలీస్ రిక్రూట్మెంట్ బోర్డు త్వరలోనే తీపి కబురు అందించనుంది. రాష్ట్ర పోలీస్ శాఖలో ఖాళీగా ఉన్న మొత్తం 7,437 పోస్టుల భర్తీకి సంబంధించి భారీ నోటిఫికేషన్ను జారీ చేసేందుకు రిక్రూట్మెంట్ బోర్డు అన్ని ఏర్పాట్లు పూర్తి చేస్తోంది. ఇందుకు సంబంధించిన డ్రాఫ్ట్ నోటిఫికేషన్ (Draft Notification) సైతం ఇప్పటికే సిద్ధమైంది. ఈ భారీ నియామక ప్రక్రియను పక్కా ప్రణాళికతో పూర్తి చేసేందుకు బోర్డు కసరత్తు ముమ్మరం చేసింది.
ఈ మొత్తం 7,437 పోస్టులలో వివిధ విభాగాలకు సంబంధించిన ఖాళీలను భర్తీ చేయనున్నారు. అందులో అత్యధికంగా 3,697 సివిల్ కానిస్టేబుల్ పోస్టులు, 1,052 ఏఆర్ (AR) కానిస్టేబుల్ పోస్టుల భర్తీకి బోర్డు గ్రీన్ సిగ్నల్ ఇవ్వనుంది. వీటితో పాటు యువత ఎంతగానో ఎదురుచూసే 148 సివిల్ సబ్ ఇన్స్పెక్టర్ (SI) పోస్టులను సైతం ఈ నోటిఫికేషన్ ద్వారా భర్తీ చేయనున్నారు. అలాగే, భద్రతా విభాగమైన స్పెషల్ ప్రొటెక్షన్ ఫోర్స్ (SPF) లో అత్యధికంగా 1,380 కానిస్టేబుల్ పోస్టుల భర్తీకి ప్రత్యేక ఏర్పాట్లు జరుగుతున్నాయి. పోలీస్ శాఖతో పాటు జైళ్ల శాఖ, ఫైర్ (అగ్నిమాపక) డిపార్ట్మెంట్లకు సంబంధించిన వార్డెన్ల పోస్టులను కూడా ఈ సింగిల్ నోటిఫికేషన్ పరిధిలోనే భర్తీ చేసేందుకు బోర్డు తుది నిర్ణయం తీసుకుంది. నోటిఫికేషన్ విడుదలకు సంబంధించిన డ్రాఫ్ట్ కాపీని రిక్రూట్మెంట్ బోర్డు ఇప్పటికే క్షుణ్ణంగా పరిశీలించిందని, అన్నీ సవ్యంగా ఉన్నందున చాలా త్వరలోనే అధికారికంగా నోటిఫికేషన్ను జారీ చేస్తామని తెలంగాణ పోలీస్ రిక్రూట్మెంట్ బోర్డు ఛైర్మన్ శ్రీనివాసరావు అధికారికంగా ప్రకటించారు. ఈ ప్రకటనతో రాష్ట్రవ్యాప్తంగా పోలీస్ ఉద్యోగాల కోసం తీవ్రంగా శ్రమిస్తూ, కోచింగ్ తీసుకుంటున్న వేలాది మంది అభ్యర్థుల్లో సరికొత్త ఉత్సాహం నెలకొంది.