Election Commission: గ్రాడ్యుయేట్ ఓటరు నమోదుకు EPIC నంబర్ అవసరమా? ఎన్నికల కమిషన్ క్లారిటీ

Telangana Graduate Voter Registration: గ్రాడ్యుయేట్ ఓటర్ల నమోదుపై రాష్ట్ర ఎన్నికల కమిషన్ కీలక ఆదేశాలు జారీ చేసింది. మహబూబ్‌నగర్–రంగారెడ్డి–హైదరాబాద్, వరంగల్–ఖమ్మం–నల్గొండ గ్రాడ్యుయేట్స్ నియోజకవర్గాల్లో ఓటర్లుగా నమోదు కావడానికి ఎపిక్ (EPIC) నంబర్ వివరాలు తప్పనిసరి కాదని స్పష్ట చేసింది. ఎపిక్ నంబర్ వివరాలు ఇవ్వాలని పట్టభద్రులపై ఎన్నికల అధికారులు ఒత్తిడి చేస్తున్నట్లు తమ దృష్టికి వచ్చిన నేపథ్యంలో ఈ సూచనలు జారీ చేస్తున్నట్లు ఎన్నికల కమిషన్ వెల్లడించింది. ఎపిక్ నంబర్ వివరాలు అందించలేదనే ఏకైక కారణంతో గ్రాడ్యుయేట్ ఓటరు నమోదు కోసం సమర్పించిన ఫారం-18 దరఖాస్తులను తిరస్కరించకూడదని తెలిపింది. సంబంధిత జిల్లా ఎన్నికల అధికారులు (DEOs), ఎలక్టోరల్ రిజిస్ట్రేషన్ అధికారులు (EROs) ఈ ఆదేశాలను కచ్చితంగా అమలు చేయాలని ఆదేశించింది.

ఇదిలా ఉండగా.. తెలంగాణలో గ్రాడ్యుయేట్‌ ఎమ్మెల్సీ ఎన్నికల ఓటరు జాబితా షెడ్యూల్‌ ఇటీవల విడుదలైంది. మహబూబ్‌నగర్‌-రంగారెడ్డి-హైదరాబాద్‌, వరంగల్‌-ఖమ్మం-నల్గొండ ఎమ్మెల్సీ నియోజకవర్గాల ఓటరు జాబితాను సెప్టెంబర్‌లో ఈసీ విడుదల చేసింది. పట్టభద్రుల ఓట్ల నమోదు కోసం గతనెల 20న ఎన్నికల కమిషన్‌ పబ్లిక్‌ నోటీసు విడుదల చేసింది. ఇక, నవంబరు 6 వరకు ఓటరు దరఖాస్తులు స్వీకరించనుంది. నవంబరు 25న ముసాయిదా ఓటరు జాబితా విడుదల చేయనుంది. నవంబరు 25 నుంచి డిసెంబరు 10 వరకు అభ్యంతరాలు స్వీకరించనుంది. డిసెంబరు 30న పట్టభద్రుల తుది ఓటర్ల జాబితాను ఈసీ విడుదల చేయనుంది.