తెలంగాణ రాష్ట్రవ్యాప్తంగా నూతన లబ్ధిదారులకు ‘చేయూత’ పింఛన్ల మంజూరు పత్రాల పంపిణీ కార్యక్రమం గురువారం ఘనంగా ప్రారంభమైంది. ప్రజా ప్రభుత్వం ప్రతిష్టాత్మకంగా చేపట్టిన ఈ కార్యక్రమంలో భాగంగా రాష్ట్రవ్యాప్తంగా ఏకకాలంలో మరో 4.5 లక్షల మంది అర్హులకు కొత్తగా పింఛన్లను మంజూరు చేశారు. ఈ నెల 12వ తేదీ నుంచి 18వ తేదీ వరకు అన్ని జిల్లాల్లో మంజూరు పత్రాల పంపిణీ ప్రక్రియ కొనసాగనుంది.
అసెంబ్లీ నియోజకవర్గాలు, మండల కేంద్రాలు, మున్సిపాలిటీల వారీగా నిర్వహిస్తున్న ఈ ప్రత్యేక కార్యక్రమాలకు స్థానిక ఎమ్మెల్యేలు, ఎంపీలు, ఇతర ప్రజాప్రతినిధులు, ప్రముఖులు హాజరై లబ్ధిదారులకు స్వయంగా ప్రొసీడింగ్ పత్రాలను అందజేస్తున్నారు. ఏళ్లుగా పింఛన్ల కోసం ఎదురుచూస్తున్న నిరుపేదలు, వితంతువులు, దివ్యాంగులు, వృద్ధుల చేతికి మంజూరు పత్రాలు అందడంతో వారి కుటుంబాల్లో ఆనందోత్సాహాలు వెల్లివిరుస్తున్నాయి. ముఖ్యంగా ఈ కొత్త పింఛన్లలో మహిళలకు పెద్దపీట వేయడం పట్ల సర్వత్రా హర్షం వ్యక్తమవుతోంది.
లబ్ధిదారులకు ఎలాంటి అసౌకర్యం కలగకుండా పంచాయతీరాజ్, గ్రామీణాభివృద్ధి శాఖతో పాటు గ్రామీణ పేదరిక నిర్మూలనా సంస్థ (సెర్ప్) అధికారులు పకడ్బందీ ఏర్పాట్లు చేశారు. దరఖాస్తుదారులకు ఏవైనా అభ్యంతరాలు లేదా సాంకేతిక సమస్యలు ఉంటే అక్కడికక్కడే పరిష్కరించేందుకు వేదికల వద్ద ప్రత్యేక కౌంటర్లను కూడా అందుబాటులో ఉంచారు.
మంజూరు పత్రాల పంపిణీ ప్రక్రియ పూర్తయిన వెంటనే, మాజీ ప్రధాని ఇందిరాగాంధీ జయంతి సందర్భంగా ఈ నెల 19న నూతన లబ్ధిదారుల బ్యాంకు ఖాతాల్లో నేరుగా పింఛన్ సొమ్మును జమ చేయడానికి ప్రభుత్వం అన్ని ఏర్పాట్లు పూర్తి చేసింది. ప్రజా ప్రభుత్వం ఏర్పాటైన తర్వాత ఇప్పటికే 1,23,625 మందికి కొత్తగా పింఛన్లు మంజూరు చేయగా, తాజాగా మంజూరు చేసిన 4.5 లక్షల పింఛన్లతో కలిపి మొత్తం కొత్త లబ్ధిదారుల సంఖ్య 5,73,625కు చేరుకుంది.