Tax on Gifted Stocks: మీ బంధువులకు షేర్లను గిఫ్ట్ గా ఇస్తున్నారా.. పన్ను మోతమోగిపోద్ది

Tax on Gifted Stocks: మారుతున్న కాలంతో పాటు ప్రజల పెట్టుబడి విధానం కూడా మారిపోయింది. ఎక్కువ రాబడులు పొందేందుకు ప్రజలు ఇప్పుడు స్టాక్ మార్కెట్ వైపు మొగ్గు చూపుతున్నారు. అవగాహన పెరగడంతో ప్రజలు ఇప్పుడు పెట్టుబడి పెట్టిన షేర్లను తమ ఇష్టమైన వారికి బహుమతిగా ఇవ్వడం ప్రారంభించారు. మీరు మీ భాగస్వామికి లేదా కుటుంబ సభ్యునికి షేర్‌లను బహుమతిగా ఇచ్చి ఉండవచ్చు లేదా అలా చేయడానికి సిద్ధపడుతున్నట్లైతే ఈ విషయాన్ని కచ్చితంగా తెలుసుకోవాలి. షేర్లను బహుమతిగా ఇచ్చే విషయంలో పన్ను నియమాలు ఎలా వర్తిస్తాయో అవగాహన తప్పకుండా కలిగి ఉండాలి. ఒక ఆర్థిక సంవత్సరంలో రూ. 50,000 వరకు ఉండే బహుమతులు పన్ను నుండి మినహాయించబడ్డాయి. సింపుల్‌గా చెప్పాలంటే ఏడాదిలోపు అందుకున్న అన్ని బహుమతుల మొత్తం విలువ రూ. 50,000 కంటే తక్కువగా ఉంటే, అప్పుడు ఎలాంటి పన్ను విధించబడదు. రూ. 50,000 కంటే ఎక్కువ విలువైన బహుమతులు అందుకున్నప్పుడు ఆ మొత్తంపై పన్ను చెల్లించాలి. బహుమతి పొందిన వ్యక్తి పన్ను చెల్లించాలి. డబ్బు, ఆస్తి, వాహనం, నగలు లేదా షేర్లతో సహా ఇతర చర, స్థిరాస్తులను బహుమతిగా ఇవ్వవచ్చు.

Read Also:Richest MPs: ధనవంత ఎంపీలు తెలుగువారే.. 225 మంది రాజ్యసభ సభ్యుల ఆస్తులు రూ.18,210 కోట్లు

బహుమతిపై పన్ను కూడా ఎవరు ఇస్తున్నారనే దానిపై ఆధారపడి ఉంటుంది. బహుమతి విలువతో సంబంధం లేకుండా ‘బంధువు’ వర్గంలోకి వచ్చే వ్యక్తుల నుండి స్వీకరించే బహుమతులపై పన్ను ఉండదు. భార్యాభర్తలు బంధువుల పరిధిలోకి వస్తారు. అంటే మీరు మీ భాగస్వామికి షేర్లను బహుమతిగా ఇస్తే, అప్పుడు అతను ఎలాంటి పన్ను చెల్లించాల్సిన అవసరం లేదు. భార్యతో పాటు, సోదరులు, సోదరీమణులు, తల్లిదండ్రులు, భార్య తల్లిదండ్రులు సహా ఇతర వ్యక్తులు కూడా ‘బంధువులు’ వర్గంలో ఉన్నారు. వీలునామా ద్వారా సంక్రమించిన ఆస్తిపై కూడా పన్ను లేదు. అంటే కుటుంబ సభ్యులకు షేర్లను బహుమతిగా ఇస్తే పన్ను వర్తించదు. అయితే, కొన్ని సందర్భాల్లో ఇక్కడ కూడా పన్ను విధించబడుతుంది. ఉదాహరణకు, మీరు బహుమతిగా ఇచ్చిన వారు షేర్లను విక్రయించినా లేదా డివిడెండ్‌ల నుండి సంపాదించినా అప్పుడు ఖచ్చితంగా పన్ను విధించబడుతుంది. మీరు ఈ షేర్‌లను కొనుగోలు చేసి ఎవరికైనా ఇచ్చినందున ఆదాయపు పన్ను చట్టంలోని సెక్షన్ 64 ప్రకారం నిబంధనలు వర్తిస్తాయి.

Read Also:Isha Ambani: ఇషా అంబానీ కంపెనీలో ముఖేష్ అంబానీ ఎన్ని వేలకోట్లు పెట్టుబడి పెట్టారో తెలుసా?

హోల్డింగ్ వ్యవధి ప్రకారం కూడా పన్ను వర్తిస్తుంది. లిస్టెడ్ షేర్లను కొనుగోలు చేసిన తేదీ నుండి 12 నెలల కంటే తక్కువ వ్యవధిలో విక్రయించినట్లయితే, లాభంపై 15 శాతం చొప్పున స్వల్పకాలిక మూలధన లాభాల పన్ను (STCG) చెల్లించాలి. 12 నెలల తర్వాత విక్రయిస్తే లాభం దీర్ఘకాలిక మూలధన లాభంగా పరిగణించబడుతుంది. 1 లక్ష కంటే ఎక్కువ లాభాలపై 10శాతం పన్ను విధించబడుతుంది. రెండు సందర్భాల్లోనూ సెస్సు, సర్‌చార్జి కూడా చెల్లించాల్సి ఉంటుంది. అన్‌లిస్టెడ్ షేర్ల విషయంలో.. 24 నెలల కంటే తక్కువ సమయంలో విక్రయించినట్లయితే లాభం స్వల్పకాలిక మూలధన లాభంగా పరిగణించబడుతుంది. అయితే 24 నెలల తర్వాత విక్రయిస్తే అది దీర్ఘకాలిక మూలధన లాభంగా పరిగణించబడుతుంది. స్వల్పకాలిక లాభాల విషయంలో స్లాబ్ రేటులో పన్ను విధించబడుతుంది. అయితే దీర్ఘకాలిక లాభాల విషయంలో ఇండెక్సేషన్ ప్రయోజనంతో 20 శాతం చొప్పున పన్ను చెల్లించాలి.