Shubman Gill: భారత క్రికెట్ చరిత్రను మార్చనున్న కెప్టెన్ గిల్.. విరాట్, రోహిత్‌కి కూడా సాధ్యం కాలేదు..

Shubman Gill: శ్రీలంకతో గాల్ వేదికగా శనివారం నుంచి ప్రారంభం కానున్న రెండు టెస్టుల సిరీస్‌లో భారత జట్టును యువ స్టార్ శుభ్‌మన్ గిల్ నడిపించబోతున్నాడు. ప్రస్తుతం అద్భుతమైన ఫామ్‌లో ఉన్న గిల్‌కు ఈ సిరీస్ ద్వారా వరల్డ్ టెస్ట్ ఛాంపియన్‌షిప్ (WTC) చరిత్రలో తన పేరును సువర్ణాక్షరాలతో లిఖించుకునే సువర్ణావకాశం లభించింది. ఈ రెండు మ్యాచ్‌లలో గిల్ మరో 157 పరుగులు చేస్తే చాలు, డబ్ల్యూటీసీ చరిత్రలోనే 3000 పరుగుల మార్కును అందుకున్న తొలి భారతీయ బ్యాటర్‌గా సరికొత్త చరిత్ర సృష్టిస్తాడు.

ఇప్పటికే డబ్ల్యూటీసీలో గిల్ పేరిట అద్భుత రికార్డు ఉంది. 40 మ్యాచ్‌ల్లోని 73 ఇన్నింగ్స్‌లలో 43.07 సగటుతో 2843 పరుగులు సాధించాడు. ఇందులో 10 సెంచరీలు, 8 అర్ధసెంచరీలు ఉన్నాయి. భారత బ్యాటర్లలో ప్రస్తుతం ఎవరూ కూడా గిల్ రికార్డుకు సమీపంలో లేకపోవడం విశేషం. ఈ జాబితాలో వికెట్ కీపర్ బ్యాటర్ రిషబ్ పంత్ 40 మ్యాచ్‌ల్లో 2780 పరుగులతో (బెస్ట్ స్కోరు: 146, సగటు: 41.49, 6 సెంచరీలు, 16 అర్ధసెంచరీలు) రెండో స్థానంలో ఉండగా, మాజీ కెప్టెన్ రోహిత్ శర్మ 40 మ్యాచ్‌ల్లో 2716 పరుగులతో (బెస్ట్ స్కోరు: 212, సగటు: 41.15, 9 సెంచరీలు) మూడో స్థానంలో ఉన్నాడు. ఇక ఆ తర్వాతి స్థానాల్లో విరాట్ కోహ్లీ 46 మ్యాచ్‌ల్లో 2617 పరుగులు (బెస్ట్ స్కోరు: 254, సగటు: 35.36, 5 సెంచరీలు, 11 అర్ధసెంచరీలు), రవీంద్ర జడేజా 48 మ్యాచ్‌ల్లో 2610 పరుగులతో (బెస్ట్ స్కోరు: 175, సగటు: 42.78, 5 సెంచరీలు, 18 అర్ధసెంచరీలు) ఉన్నారు. ప్రపంచ వ్యాప్తంగా చూస్తే మాత్రం డబ్ల్యూటీసీలో ఇంగ్లాండ్ కెప్టెన్ జో రూట్ 6651 పరుగులతో అగ్రస్థానంలో కొనసాగుతున్నాడు.

బ్యాటర్‌గానే కాకుండా కెప్టెన్‌గా కూడా గిల్ ఓ అరుదైన ఘనతకు అత్యంత చేరువలో ఉన్నాడు. ప్రస్తుత 2025-27 డబ్ల్యూటీసీ సైకిల్‌లో భారత కెప్టెన్‌గా గిల్ 8 మ్యాచ్‌లలోనే 950 పరుగులు చేశాడు. శ్రీలంకపై కేవలం మరో 50 పరుగులు జోడిస్తే, ఒకే డబ్ల్యూటీసీ సైకిల్‌లో 1000 పరుగులు పూర్తి చేసిన తొలి భారతీయ కెప్టెన్‌గా గిల్ నిలుస్తాడు. గతంలో విరాట్ కోహ్లీ (2019-21లో 934 పరుగులు), రోహిత్ శర్మ (2023-25లో 864 పరుగులు) కెప్టెన్లుగా ఉన్న సమయంలో ఈ మైలురాయిని అందుకోలేకపోయారు. ఇక ఓవరాల్‌గా ఒకే డబ్ల్యూటీసీ సైకిల్‌లో 1000 ప్లస్ పరుగులు చేసిన భారత ప్లేయర్ల జాబితాను పరిశీలిస్తే.. ఇప్పటివరకు అజింక్య రహానే, రోహిత్ శర్మ, యశస్వి జైస్వాల్ మాత్రమే ఈ ఫీట్ సాధించారు. శ్రీలంక సిరీస్‌లో ఆ ఒక్క 50 పరుగుల మార్కును దాటితే, ఈ మైలురాయిని చేరుకున్న నాలుగో భారతీయ బ్యాటర్‌గా గిల్ సరికొత్త అధ్యాయాన్ని లిఖిస్తాడు.