Rohit-Kuldeep: కుల్దీప్ ఏం మాట్లాడుతున్నావ్.. రోహిత్ అసహనం! వీడియో వైరల్

Rohit Sharma is glad to have not taken the review: వైజాగ్ వేదికగా భారత్, ఇంగ్లండ్‌ జట్ల మధ్య రెండో టెస్టు‌ జరుగుతున్న విషయం తెలిసిందే. ఈ టెస్టు‌లో టీమిండియా కెప్టెన్ రోహిత్ శర్మ అభిమానులకు మంచి ఎంటర్‌టైన్‌మెంట్‌ ఇస్తున్నాడు. ఫోర్లు, సిక్సులతో కాకుండా.. తన హాస్య చతురతతో అభిమానులను అలరిస్తున్నాడు. ఇప్పటికే రివ్యూ విషయంలో అంపైర్‌ సలహాను తీసుకోవడానికి ప్రయత్నించిన రోహిత్.. తాజాగా మణికట్టు స్పిన్నర్ కుల్దీప్ యాదవ్‌పై అసహనం వ్యక్తం చేశాడు. ఆపై తనదైన శైలిలో సంబరాలు చేసుకుని సోషల్ మీడియాలో వైరల్‌గా మారాడు. ఇంతకీ విషయం ఏంటంటే..

ఆదివారం మూడో రోజు ఆటలో ఇంగ్లండ్ చేధనకు దిగింది. మూడో ఓవర్‌లో ఓపెనర్ జాక్ క్రాలేకు జస్ప్రీత్ బుమ్రా ఔట్ స్వింగర్ విసిరాడు. బంతి బ్యాటు దగ్గరగా వెళ్లడంతో టీమిండియా ప్లేయర్స్ ఔట్ కోసం అపీలు చేశారు. అయితే అంపైర్ నాటౌట్ అని ప్రకటించాడు. దాంతో రివ్యూ తీసుకోవాలా? వద్దా? అని ఆటగాళ్లతో కెప్టెన్ రోహిత్ శర్మ చర్చించాడు. ఆ సమయంలో కుల్దీప్ యాదవ్‌ స్పందిస్తూ ఔట్ అని వాదించాడు, రివ్యూ తీసుకోమని రోహిత్‌తో అన్నాడు. అతడి మాటలకు రోహిత్ సంతృప్తి చెందలేదు. ‘ఏం మాట్లాడుతున్నావో అర్థమైతుందా?’ అన్నట్లుగా కుల్దీప్ వైపు రోహిత్ ఓ లుక్ ఇచ్చాడు.

Also Read: Virat Kohli: ఆల్‌టైమ్‌ గ్రేటెస్ట్‌ అథ్లెట్ల జాబితాలో విరాట్‌ కోహ్లీ.. ఏకైక క్రికెటర్‌గా..!

ఈ లోగా రివ్యూ కోరే సమయం 15 సెకండ్లు అయిపోయాయి. కాసేపటికి జాక్ క్రాలే నాటౌట్‌ అని రిప్లేలో తేలింది. దీంతో రివ్యూ తీసుకోకుండా.. మంచి నిర్ణయం తీసుకున్నానని రోహిత్ శర్మ సంబరపడ్డాడు. క్లాప్స్ కొడుతూ.. థంబ్స్ అప్ సింబల్స్ చూపించాడు. ఇది చూసిన కుల్దీప్ యాదవ్‌ నవ్వుకున్నాడు. ఇందుకు సంబంధించిన వీడియో సోషల్ మీడియాలో వైరల్ అయింది. వీడియో చూసిన వారు ఫన్నీగా కామెంట్స్ పెడుతున్నారు.