Rishabh Pant Ruled Out: రిషబ్ పంత్‌ అవుట్.. కీలక ప్లేయర్ ఇన్.!

Rishabh Pant Ruled Out: న్యూజిలాండ్-A తో జరగనున్న మూడు అనధికారిక టెస్టు మ్యాచ్‌ల సిరీస్‌కు ముందు ఇండియా-A జట్టులో కీలక మార్పు చోటుచేసుకుంది. స్టార్ వికెట్ కీపర్, బ్యాటర్ రిషభ్ పంత్ గాయం కారణంగా తొలి రెండు మ్యాచ్‌లకు దూరమయ్యాడు. అతడి స్థానంలో 21 ఏళ్ల యువ వికెట్ కీపర్ కమ్ బ్యాటర్ కుమార్ కుశాగ్రను బీసీసీఐ జట్టులోకి తీసుకుంది. ప్రస్తుతానికి తొలి రెండు మ్యాచ్‌లకు మాత్రమే కుశాగ్రను ఎంపిక చేసింది. మూడో మ్యాచ్‌లో పంత్ ఆడతాడా.? లేదా.? అనే విషయంపై తర్వాత నిర్ణయం తీసుకోనున్నారు.

ఇటీవల జరిగిన ఇరానీ కప్‌లో రెస్ట్ ఆఫ్ ఇండియా జట్టుకు రిషభ్ పంత్ కెప్టెన్‌గా వ్యవహరించాడు. ఆ సమయంలో అతడి ఎడమ వైపు కండరాల్లో స్ట్రెయిన్ ఏర్పడినట్లు బీసీసీఐ వెల్లడించింది. ప్రస్తుతం పంత్ బీసీసీఐ మెడికల్ టీమ్ పర్యవేక్షణలో కోలుకుంటున్నాడు. న్యూజిలాండ్-A తో తొలి రెండు మ్యాచ్‌లకు అతడు అందుబాటులో ఉండడని స్పష్టం చేసింది. మూడో మ్యాచ్‌కు అతడి ఫిట్‌నెస్‌ను పరిశీలించిన తర్వాత నిర్ణయం తీసుకోనుంది.

ఇండియా-A జట్టును ప్రకటించిన సమయంలోనే పంత్ ఎంపిక ఫిట్‌నెస్‌పై ఆధారపడి ఉంటుందని బీసీసీఐ తెలిపింది. అయితే అతడు ఇంకా పూర్తి ఫిట్‌నెస్ సాధించకపోవడంతో తొలి రెండు మ్యాచ్‌ల నుంచి తప్పుకోవాల్సి వచ్చింది. ఇరానీ కప్‌లో రెస్ట్ ఆఫ్ ఇండియా జట్టు జమ్మూ-కశ్మీర్‌ను ఓడించి టైటిల్ సాధించినప్పటికీ పంత్ బ్యాటింగ్‌లో నిరాశపరిచాడు. రెండు ఇన్నింగ్స్‌ల్లో వరుసగా 10, 8 పరుగులు మాత్రమే చేశాడు.

పంత్ స్థానంలో 21 ఏళ్ల వికెట్ కీపర్-బ్యాటర్ కుమార్ కుశాగ్రకు బీసీసీఐ అవకాశం కల్పించింది. తొలి, రెండో అనధికారిక టెస్టులకు అతడు జట్టులో ఉంటాడు. అయితే ఇండియా-A కెప్టెన్ ధ్రువ్ జురెల్ ప్రధాన వికెట్ కీపర్‌గా బాధ్యతలు నిర్వర్తించే అవకాశం ఉంది. ఇండియా-A, న్యూజిలాండ్-A మధ్య మూడు నాలుగు రోజుల మ్యాచ్‌లు జరగనున్నాయి. తొలి మ్యాచ్ అక్టోబర్ 24 నుంచి 28 వరకు లింకన్‌లో జరుగుతుంది. రెండో మ్యాచ్ అక్టోబర్ 31 నుంచి నవంబర్ 3 వరకు క్రైస్ట్‌చర్చ్‌లో జరగనుంది. మూడో మ్యాచ్ నవంబర్ 7 నుంచి 10 వరకు తిరిగి లింకన్‌లో నిర్వహించనున్నారు.

ఈ సిరీస్‌లో ఇండియా-A జట్టుకు ధ్రువ్ జురెల్ కెప్టెన్‌గా వ్యవహరించనున్నాడు. జట్టులో కేఎల్ రాహుల్, యశస్వి జైస్వాల్, దేవదత్ పడిక్కల్, వాషింగ్టన్ సుందర్ సహా పలువురు టెస్టు అనుభవం ఉన్న ఆటగాళ్లు ఉన్నారు. అయితే కేఎల్ రాహుల్, యశస్వి జైస్వాల్, వాషింగ్టన్ సుందర్ వంటి ఆటగాళ్లు మూడు మ్యాచ్‌ల్లోనూ ఆడతారా అనే విషయంలో స్పష్టత లేదు. వీరు న్యూజిలాండ్‌తో జరిగే వన్డే సిరీస్‌కు భారత సీనియర్ జట్టులోనూ ఉన్నారు. ఆ వన్డే మ్యాచ్‌లు నవంబర్ 4, 7, 10 తేదీల్లో జరగనున్న నేపథ్యంలో ఇండియా-ఏ తరఫున మూడు మ్యాచ్‌ల్లోనూ వీరు బరిలోకి దిగడం సాధ్యం కాకపోవచ్చు.

ఇండియా-A అప్డేటెడ్ టీం

యశస్వి జైస్వాల్, కేఎల్ రాహుల్, దేవదత్ పడిక్కల్, రవిచంద్రన్ స్మరణ్, ధ్రువ్ జురెల్ (C & W), వాషింగ్టన్ సుందర్, ఆకిబ్ నబీ, ఆకాశ్ దీప్, అన్షుల్ కాంబోజ్, మానవ్ సుతార్, ముఖేష్ చౌదరి, సాయి సుదర్శన్, యశ్ రాథోడ్, ముఖేష్ కుమార్, కుమార్ కుశాగ్ర (W).