RBI Repo Rate Hike: ఇప్పటికే రిజర్వ్‌ బ్యాంక్‌ ఆఫ్‌ ఇండియా (RBI) వడ్డీ రేట్లు పెంచడంతో సామాన్యులపై EMIల భారం పెరిగిపోయింది.. అయితే, దేశంలో మరోసారి వడ్డీ రేట్లు పెరిగే అవకాశాలు కనిపిస్తున్నాయి. డిసెంబర్‌లో జరిగే ద్రవ్య పరపతి విధాన సమీక్షలో RBI రెపో రేటును మరో 25 బేసిస్ పాయింట్లు పెంచే అవకాశం ఉందని ఎస్‌బీఐ రీసెర్చ్ తాజా నివేదిక వెల్లడించింది. గతంలో 50 బేసిస్ పాయింట్ల పెంపు ఉంటుందని అంచనా వేయగా.. తాజాగా ఆ అంచనాను తగ్గించింది. ఒకవేళ ఆర్బీఐ రెపో రేటును పెంచితే బ్యాంకులు కూడా రుణాలపై వడ్డీ రేట్లను సవరించే అవకాశం ఉంది. దీంతో హోమ్ లోన్, పర్సనల్ లోన్ వంటి రుణాలు తీసుకున్నవారిపై ఈఎంఐ భారం పెరగవచ్చు.
ఎస్‌బీఐ రీసెర్చ్ అంచనాల్లో మార్పు
గతంలో డిసెంబర్‌లో రెపో రేటును 50 బేసిస్ పాయింట్లు పెంచవచ్చని ఎస్‌బీఐ రీసెర్చ్ అంచనా వేసింది. అయితే ద్రవ్యోల్బణం, రూపాయి విలువ, అంతర్జాతీయ పరిణామాల్లో కొంత ఉపశమనం కనిపిస్తుండటంతో ఇప్పుడు 25 బేసిస్ పాయింట్ల పెంపునకే అవకాశాలు ఎక్కువగా ఉన్నాయని నివేదిక పేర్కొంది. అంతేకాకుండా చివరి రెపో రేటు 6 శాతం నుంచి 5.75 శాతానికి తగ్గే అవకాశానికి కూడా 50 శాతం ప్రాబబిలిటీ ఉందని తెలిపింది.
6 శాతం దాటిన రిటైల్ ద్రవ్యోల్బణం
దేశంలో రిటైల్ ద్రవ్యోల్బణం అక్టోబర్‌లో 6.09 శాతానికి చేరింది. ఆర్బీఐ నిర్దేశించిన గరిష్ఠ పరిమితి 6 శాతం దాటడం గమనార్హం. కొత్త సిరీస్‌లో ద్రవ్యోల్బణం ఈ స్థాయిని దాటడం ఇదే తొలిసారి. నవంబర్‌లో కూడా ద్రవ్యోల్బణం 6 శాతానికి పైనే ఉండే అవకాశం ఉందని, ఆ తర్వాత క్రమంగా తగ్గుతుందని ఎస్‌బీఐ రీసెర్చ్ అంచనా వేసింది. రూపాయి విలువలో ఒడిదుడుకులను తగ్గించేందుకు ఆర్బీఐ చేస్తున్న ప్రయత్నాలు ఫలితాలనిస్తున్నాయని నివేదిక తెలిపింది. విదేశీ పెట్టుబడుల ప్రవాహం కూడా మెరుగుపడుతోందని పేర్కొంది. నవంబర్ 6 నుంచి ఇప్పటివరకు భారత్‌కు సుమారు 7.65 బిలియన్ డాలర్ల విదేశీ పెట్టుబడులు వచ్చినట్లు వెల్లడించింది. మరోవైపు అమెరికా, ఇరాన్ మధ్య ఉద్రిక్తతలు తగ్గడం, అంతర్జాతీయ మార్కెట్‌లో ముడి చమురు ధరలు దిగిరావడం భారత్‌కు ప్రయోజనం చేకూర్చవచ్చని తెలిపింది. అమెరికా ఎన్నికల తర్వాత ముడి చమురు ధరలు సుమారు 11 శాతం తగ్గినట్లు నివేదిక పేర్కొంది.
చివరి రెపో రేటు 6 శాతమేనా?
ఎస్‌బీఐ రీసెర్చ్ అంచనా ప్రకారం రెపో రేటు చివరకు 6 శాతానికి చేరవచ్చు. అయితే అది 5.75 శాతం వద్దే నిలిచిపోయే అవకాశానికి కూడా 50 శాతం ఉందని నివేదిక వెల్లడించింది. ఫిబ్రవరిలో మరోసారి వడ్డీ రేట్ల పెంపు అవసరం ఉండకపోవచ్చని అభిప్రాయపడింది. డిసెంబర్ తర్వాత ఆర్బీఐ తీసుకునే నిర్ణయాలు ద్రవ్యోల్బణంతో పాటు ఇతర ఆర్థిక గణాంకాలపై ఆధారపడి ఉంటాయని తెలిపింది. ఇక, అమెరికా 10 ఏళ్ల బాండ్ ఈల్డ్ 4.75 శాతం దిశగా కదిలే అవకాశం ఉందని ఎస్‌బీఐ రీసెర్చ్ అంచనా వేసింది. భారత్‌లో 10 ఏళ్ల బాండ్ ఈల్డ్ 6.75 నుంచి 7 శాతం మధ్య స్థిరపడవచ్చని పేర్కొంది. అయితే ప్రస్తుతం దీనికి తగ్గుదల వైపు మొగ్గు కనిపిస్తోందని తెలిపింది. గతంలో వరుసగా మూడు నుంచి నాలుగు సార్లు వడ్డీ రేట్లు పెరుగుతాయన్న అంచనాలు వినిపించాయని, ప్రస్తుతం అలాంటి పరిస్థితి ఉండకపోవచ్చని ఎస్‌బీఐ రీసెర్చ్ అభిప్రాయపడింది. చివరి రెపో రేటు 6 శాతం వద్ద స్థిరపడుతుందని, 5.75 శాతానికి తగ్గే అవకాశాన్ని కూడా పరిగణనలోకి తీసుకుంటున్నామని నివేదిక స్పష్టం చేసింది.