Ragi Sangati Recipe: షుగర్, వెయిట్ కంట్రోల్‌ చేసి ఉక్కులాంటి బలం అందించే రాయలసీమ రాగి సంగటి ఇలా చేసేయండి.!

Ragi Sangati Recipe: చాలామందికి రాగి సంగటి అంటే ఇష్టం ఉండకపోవచ్చు. కానీ ఒకసారి సరైన పద్ధతిలో చేస్తే, ఇష్టం లేని వాళ్లూ కూడా ఎంతో ఇష్టంగా తింటారు దీనిని. నోట్లో వెన్నెల కరిగినట్టుగా మెత్తగా ఉండే రాగి సంగటి రుచి అద్భుతంగా ఉంటుంది. ఆరోగ్యానికి ఎంతో మేలు చేసే రాగి సంగటిని సరైన కొలతల్లో, కరెక్ట్ కన్సిస్టెన్సీతో ఎలా తయారు చేయాలో ఇక్కడ తెలుసుకుందాం.

రాగి సంగటి మన పెద్దల కాలం నాటి బలమైన ఆహారం. అందుకే అప్పట్లో వారు స్ట్రాంగ్‌గా, హెల్దీగా ఉండేవారు. ఈ సంప్రదాయ వంటకం దక్షిణ భారత రాష్ట్రాల్లో బాగా సుపరిచితం. హెల్త్‌కు చాలా మంచిదైన ఈ రాగి సంగటిని ఇప్పుడు ఇంట్లో సులువుగా ఎలా చేసుకోవచ్చో చూద్దాం.

కావలసిన పదార్థాలు:
ఈ రెసిపీ కోసం ఒక చిన్న గ్లాస్‌తో బియ్యాన్ని తీసుకోండి. మీరు ఇంట్లో ఉన్న ఏ బియ్యమైనా వాడుకోవచ్చు (రేషన్ బియ్యం అయినా, సోనా మసూరి అయినా) సరిపోతాయి. ఈ చిన్న గ్లాస్ బియ్యంతో చేసిన రాగి సంగటి కనీసం ముగ్గురికి సరిపోతుంది. అలాగే రాగి పిండి, ఉప్పు, నెయ్యి అవసరం.

చేసే విధానం:
ముందుగా బియ్యాన్ని ఒక గిన్నెలో వేసుకుని బాగా కడిగి, నీళ్లు పోసి కనీసం అరగంట నుంచి గంట వరకు నానబెట్టాలి. నానబెట్టిన తర్వాత స్టవ్‌పై ఒక గిన్నె పెట్టుకుని, అదే గ్లాస్‌తో 10 నుంచి 12 గ్లాసుల నీళ్లు పోయాలి. కొత్త బియ్యం అయితే ఒక గ్లాస్ నీరు తగ్గించండి. పాత బియ్యం అయితే ఒక గ్లాస్ నీరు ఎక్కువ వేసుకోవచ్చు. ఇప్పుడు నానబెట్టిన బియ్యాన్ని నీళ్లలో వేసి, రుచికి సరిపడా ఉప్పు కలపాలి. మంటను మీడియం ఫ్లేమ్‌లో పెట్టి, మధ్య మధ్యలో కలుపుతూ మూత పెట్టుకుని అన్నాన్ని చాలా మెత్తగా ఉడికించాలి. చిన్న గ్లాస్ బియ్యం కాబట్టి త్వరగానే బాగా ఉడికిపోతుంది.

రాగి పిండి వేసే పద్ధతి:
అన్నం పూర్తిగా మెత్తగా ఉడికిన తర్వాత మంటను లో ఫ్లేమ్‌కు తగ్గించండి. ఇప్పుడు అదే గ్లాస్‌తో రెండు గ్లాసుల రాగి పిండి తీసుకుని, కలుపకుండా పైన ఒక లేయర్‌లా చల్లి వేయాలి. రాగి పిండి వేసిన తర్వాత మూత పెట్టి, చిన్న మంటపై 2 నుంచి 3 నిమిషాలు ఉడకనివ్వాలి. ఆ వేడి, ఆవిరికి రాగి పిండి చక్కగా మగ్గుతుంది. ఇప్పుడు మూత తీసి, చిన్న మంటపైనే గట్టిగా గరిటతో బాగా కలపాలి. నీటి ఎసరు కరెక్ట్‌గా ఉంటే, రాగి పిండి ఉండలు కట్టకుండా అన్నంతో చక్కగా మిక్స్ అవుతుంది. ఎక్కడా పొడి భాగాలు లేకుండా మెత్తగా మాష్ చేసుకుంటూ కలపాలి.

ఇలా మొత్తం బాగా కలిసిన తర్వాత, చిన్న మంటపై మూత పెట్టి మరో 5 నిమిషాలు ఉడికించాలి. ఆ తర్వాత మూత తీసి ఒకసారి మళ్లీ బాగా కలిపి, గిన్నెను దించి మళ్లీ మూత పెట్టి 5 నిమిషాలు విశ్రాంతి ఇవ్వాలి. తరువాత వేడి వేడిగా సర్వ్ చేయాలి. రాగి సంగటిని వేడి వేడిగానే ముద్దలుగా చేసుకుని తినాలి. ఒక ప్లేట్‌కు కొద్దిగా నెయ్యి రాసుకుని, చేతులు కాలకుండా తడుపుకుంటూ సంగటిని ముద్దలుగా చేయండి. ఈ రాగి సంగటికి చికెన్ కర్రీ, మటన్ కర్రీ అద్భుతమైన కాంబినేషన్. నాన్‌వెజ్ తినని వారికి కొంచెం స్పైసీగా ఉండే రోటి పచ్చడి సరిగ్గా సరిపోతుంది. మరి ఇంట్లో ట్రై చేసిన తర్వాత మీ అనుభవాన్ని కామెంట్‌గా షేర్ చేయండి.