Anantapur: రాప్తాడులో పాశవిక ఘటన.. తరగతి గదిలో పదో తరగతి బాలికపై ఎలక్ట్రిక్ రంపంతో దాడి..

Anantapur: అనంతపురం జిల్లా రాప్తాడు మండల కేంద్రంలోని జిల్లా పరిషత్ ఉన్నత పాఠశాలలో శనివారం పాశవిక ఘటన చోటు చేసుకుంది. విద్యార్థుల సందడితో కళకళలాడే పాఠశాల ప్రాంగణం ఒక్కసారిగా కేకలతో హోరెత్తింది. తరగతి గదిలో విద్యార్థులంతా పాఠాలు వింటున్న సమయాన, ఓ ఉన్మాది హఠాత్తుగా స్కూల్ ఆవరణలోకి చొరబడ్డాడు. పదో తరగతి చదువుతున్న ఓ బాలికని లక్ష్యంగా చేసుకుని, చెక్క మొద్దులు కోసే పదునైన ఎలక్ట్రిక్ రంపంతో విచక్షణారహితంగా దాడికి తెగబడ్డాడు. ఆ ఆగంతకుడు బాలిక గొంతును దారుణంగా కోసేశాడు. ఆ బాలిక తీవ్ర రక్తస్రావంతో పాఠశాల ప్రాంగణంలోనే కుప్పకూలిపోయింది. కళ్లెదుటే జరిగిన ఈ ఊహించని ఘోరాన్ని చూసి తోటి విద్యార్థులు, ఉపాధ్యాయులు తీవ్ర భయాందోళనకు గురయ్యారు. ఉపాధ్యాయులు తేరుకుని అతడిని పట్టుకునే లోపే ఆ దుండగుడు అక్కడ నుంచి వేగంగా పరారయ్యాడు.

రక్తపు మడుగులో కొట్టుమిట్టాడుతున్న ఆ విద్యార్థినిని చూసి చలించిపోయిన పాఠశాల సిబ్బంది, స్థానికులు వెంటనే అనంతపురం ప్రభుత్వ సర్వజన ఆసుపత్రికి తరలించారు. ప్రస్తుతం ఆసుపత్రిలోని అత్యవసర విభాగంలో వైద్యులు ఆ బాలికకు చికిత్స అందిస్తున్నారు. పరిస్థితి విషయమంగా ఉందని వైద్యులు చెబుతున్నారు. బాధితురాలి కుడి చేయి తెగిపోగా.. ముఖంపై పెద్ద గాయం అయ్యింది. ప్రస్తుతం వైద్యులు ఆ బాలికను కాపాడేందుకు ప్రయత్నిస్తున్నారు. మరోవైపు.. ఈ ఘటన గురించి సమాచారం అందగానే పోలీసులు ఘటనా స్థలానికి చేరుకున్నారు. ప్రత్యక్ష సాక్షుల నుంచి వివరాలు సేకరించి, కేసు నమోదు చేసి దర్యాప్తు వేగవంతం చేశారు. బాధితురాలు అయ్యవారిపల్లెకు చెందిన బాలికగా గుర్తించారు. ఆ దుండగుడి కోసం పోలీసులు గాలింపు చర్యలు చేపట్టారు. ఇక, రంపంతో స్కూల్‌లోకి దుండగుడు ప్రవేశించడంపై బంధువులు ఆగ్రహం వ్యక్తం చేస్తున్నారు.. “ఎవరూ వేధిస్తున్నట్లు మా పాప చెప్పలేదు. రోజూ ఆటోలో స్కూల్‌కు వెళ్తుంది. నిందితుడిని కఠినంగా శిక్షించాలి. నిందితుడు ఎవడైనా, ఆఖరికి మా బంధువైనా శిక్షించాల్సిందే” అని బాలిక మేనత్త స్పష్టం చేసింది.