భారత సీనియర్ ఫాస్ట్ బౌలర్ భువనేశ్వర్ కుమార్‌కు టీమిండియా తలుపులు ఇక మూసుకుపోయినట్లేనని లెజెండరీ స్పిన్నర్ రవిచంద్రన్ అశ్విన్ అభిప్రాయపడ్డారు. దాదాపు నాలుగేళ్ల తర్వాత భారత T20 జాతీయ జట్టులోకి పునరాగమనం చేసిన భువనేశ్వర్, న్యూజిలాండ్‌తో జరిగిన నాలుగు మ్యాచ్‌ల్లో కేవలం ఒకే ఒక్క వికెట్ మాత్రమే తీసి తీవ్రంగా నిరాశపరిచారని తెలిపారు. ఐపీఎల్ 2026 సీజన్‌లో 16 మ్యాచ్‌ల్లో 28 వికెట్లతో మెరిసిన భువనేశ్వర్, అంతర్జాతీయ మ్యాచ్‌ల్లో మాత్రం ఆ స్థాయిలో రాణించలేకపోయారని అశ్విన్ పేర్కొన్నారు.
తన యూట్యూబ్ ఛానెల్‌లో మాట్లాడిన అశ్విన్, ఐపీఎల్ రూపానికి, అంతర్జాతీయ మ్యాచ్‌ల ప్రదర్శనకు మధ్య రాత్రికి, పగలుకి ఉన్నంత తేడా కనిపించిందని తెలిపారు. పరుగులివ్వడం పక్కన పెడితే, ఆయన రన్-అప్ స్పీడ్, బౌలింగ్ వేగం, పట్టుదల లోపించడం ఆందోళన కలిగించిందని చెప్పారు. సరైన ఫిట్‌నెస్‌తో ఆయన ఈ సిరీస్‌కు రాలేదనిపించిందని అశ్విన్ వ్యాఖ్యానించారు. యువ ఆటగాళ్లకు వరుసగా పది అవకాశాలు లభిస్తాయి కానీ, సుదీర్ఘ అనుభవం ఉన్న సీనియర్ బౌలర్ వచ్చి ఇలా నిరాశపరిస్తే సెలక్టర్లు మళ్లీ అవకాశం ఇవ్వడం చాలా కష్టమని స్పష్టం చేశారు. దీంతో భువనేశ్వర్ కుమార్ అంతర్జాతీయ కెరీర్ అధ్యాయం దాదాపు ముగిసినట్లేనని అభిప్రాయపడ్డారు.
ఇదే సమయంలో మరొక సీనియర్ ఫాస్ట్ బౌలర్ మహమ్మద్ షమీ పునరాగమనంపై అశ్విన్ ఆశాభావం వ్యక్తం చేశారు. ఏడాదిన్నరకు పైగా టీమిండియాకు దూరంగా ఉన్నప్పటికీ, ప్రస్తుతం రంజీ ట్రోఫీలో బెంగాల్ తరఫున ఆడుతున్న షమీ అద్భుతమైన రిథమ్‌లో బౌలింగ్ చేస్తున్నారని కొనియాడారు. భువనేశ్వర్ కుమార్‌తో పోలిస్తే షమీ బౌలింగ్ వేగం, లయ ప్రస్తుతం చాలా బాగున్నాయని, కాబట్టి భవిష్యత్తులో షమీకే జాతీయ జట్టులోకి వచ్చే అవకాశాలు ఎక్కువగా ఉన్నాయని అశ్విన్ వెల్లడించారు. టీమిండియా తమ తదుపరి T20 సిరీస్‌ను డిసెంబర్‌లో శ్రీలంకతో సొంతగడ్డపై ఆడనుంది.