PayPal Layoffs: పేపాల్‌లో భారీ లేఆఫ్స్.. భారత్‌లో వందలాది మంది ఉద్యోగులకు పింక్ స్లిప్స్..

అమెరికన్ ఫిన్‌టెక్ దిగ్గజం పేపాల్ (PayPal) వ్యయాలను తగ్గించుకోవడంలో భాగంగా నిర్వహించిన గ్లోబల్ రీస్ట్రక్చరింగ్‌లో భాగంగా భారతదేశంలో భారీగా లేఆఫ్స్ చేపట్టింది. చెన్నై, బెంగళూరు, హైదరాబాద్ ఆఫీసుల్లోని టెక్నాలజీ, ఇంజనీరింగ్, ఆపరేషన్స్, పేమెంట్స్, ఫైనాన్స్ విభాగాలకు చెందిన ఉద్యోగులపై ఈ ప్రభావం పడింది. తెలిసిన సమాచారం ప్రకారం.. దాదాపు 600 మంది ఉద్యోగులను తొలిగించారని, ఇది భారతీయ మొత్తం సిబ్బందిలో 10 శాతమని తెలుస్తోంది. అయితే పేపాల్ ప్రతినిధి ఈ వార్తలను స్పష్టం చేస్తూ, ఆగస్టు 31న దాదాపు 220 మంది (4 శాతం) ఉద్యోగులను మాత్రమే తొలగించామని తెలిపారు. బాధితులకు ముందస్తు నోటీసులు ఇవ్వకుండా, సోమవారం ఉదయం కాల్ ద్వారా సమాచారం అందించి తక్షణమే సిస్టమ్ యాక్సెస్‌ను రద్దు చేశారని బాధిత ఉద్యోగులు ఆవేదన వ్యక్తం చేశారు.

సంస్థను సరళతరం చేయడం, దీర్ఘకాలిక వృద్ధి కోసం కనీసం 1.5 బిలియన్ డాలర్ల వ్యయాన్ని తగ్గించుకోవడానికి మే 2026లో రాబోయే 2-3 ఏళ్లలో గ్లోబల్ వర్క్‌ఫోర్స్‌లో 20 శాతాన్ని తగ్గించనున్నట్లు ప్రకటించింది. ఇందులో భాగంగానే ఆసియా-పాసిఫిక్ ప్రాంతం నుంచి ప్రారంభించి, ఐర్లాండ్ (164 మంది), అమెరికా, యూరప్, మిడిల్ ఈస్ట్‌లలో ఉద్యోగుల తొలగింపు ప్రక్రియను చేపట్టింది. భారత్‌లో 2008లో ప్రారంభమైన చెన్నై సెంటర్ పేపాల్‌కు అత్యంత పెద్ద టెక్నాలజీ హబ్ కాగా, బెంగళూరు, హైదరాబాద్ సెంటర్లు ఆర్టిఫిషియల్ ఇంటెలిజెన్స్, రిస్క్ మేనేజ్‌మెంట్ వంటి కీలక రంగాల్లో పనిచేస్తున్నాయి.

ప్రపంచ ఆర్థిక మందగమనం, ఏఐ సాంకేతికత వాడకం పెరగడం వల్ల భారతదేశంలోని గ్లోబల్ కేపబిలిటీ సెంటర్లు (GCCs) తీవ్ర ప్రతికూల ప్రభావాలను ఎదుర్కొంటున్నాయి. ఇటీవలే ఒరాకిల్ (Oracle) భారత్‌లో 3,000 మందిని, ఊబర్ (Uber) తమ సిబ్బందిని తగ్గించుకున్నాయి. 2025లో గ్లోబల్ పరంగా వచ్చిన ఒత్తిళ్ల వల్ల టెక్నికలర్ (3,000 మంది), ఆమోవియో (1,000 మంది) సంస్థలతో పాటు వెల్స్ ఫార్గో, వాల్‌మార్ట్ వంటి సంస్థలు కూడా భారత్‌లో ఉద్యోగుల సంఖ్యను తగ్గించాయి. ఈ పరిణామాలు భారత ఐటీ, జీసీసీ రంగానికి పెద్ద సవాలుగా మారాయి.